ទីក្រុងហាណូយៈ បើទោះបីមានការធ្លាក់ចុះឥណទានក្នុងឆមាសទី ១ ឆ្នាំ ២០២០ ធនាគារពាណិជ្ជឯកជនខ្លះបានស្នើដល់ធនាគារជាតិវៀតណាម (SBV) សម្រាប់ការពង្រីកបន្ថែមដល់អត្រាឥណទាន ដើម្បីត្រៀមរៀបចំសម្រាប់រដូវកាលខ្ចីប្រាក់កើនឡើងវិញ ដែលគេរំពឹងនៅចុងឆ្នាំនេះ។
យោងតាមគោលនយោបាយរបស់ធនាគារ SBV ដែលបានកំណត់ចំនួនកំណើនឥណទានចំពោះធនាគារពាណិជ្ជនីមួយៗផ្អែកលើប្រតិបត្តិការអាជីវកម្ម និង អនុបាតបំណុលអាក្រក់ ដើម្បីគ្រប់គ្រងការផ្តល់កម្ចីនៃប្រព័ន្ធធនាគារទាំងមូល និងធានាការផ្តល់សាច់ប្រាក់ និងការគ្រប់គ្រងអតិផរណា ដូចដែលបានកំណត់ទិសដៅដោយរដ្ឋាភិបាល។
កំណើនឥណទានក្នុងឆមាសដំបូងឆ្នាំនេះ គឺស្មើពាក់កណ្តាលនៃរយៈពេលដូចគ្នាកាលពីឆ្នាំមុន។ ស្ថិតិរបស់ធនាគារកណ្តាលវៀតណាមបង្ហាញថា មូលធនប្រមូលផ្តុំរបស់ធនាគារទាំងអស់កើនឡើងត្រឹម ៥,៣១ ភាគរយ ខណៈប្រាក់កម្ចីកើនឡើងត្រឹមតែ ៣,៤៥ ភាគរយក្នុងរយៈពេលដូចគ្នានេះ។
ទោះបីជាយ៉ាងណាធនាគារពាណិជ្ជបានឲ្យដឹងថា ប្រាក់កម្ចីជាធម្មតាកើនឡើងយ៉ាងរហ័សនៅចុងឆ្នាំជាពេលដែលតម្រូវការហិរញ្ញវត្ថុពីក្រុមហ៊ុន និងឯកជនច្រើនគួរជាទីកត់សម្គាល់ ដើម្បីត្រៀមសម្រាប់ការឈប់សម្រាក និងកម្មវិធីផ្សេងៗ។
យោងតាមអ្នកជំនាញហិរញ្ញវត្ថុលោក Huynh Trung Minh វាអាចទៅរួចសម្រាប់ធនាគារកណ្តាលវៀតណាម SBV ដើម្បីបន្ធូរកម្រិតកំណើនឥណទាន សម្រាប់ធនាគារពាណិជ្ជឯកជន ប៉ុន្តែធនាគារត្រូវតែធានាផ្តល់កម្ចីដល់គម្រោងដែលមានប្រសិទ្ធភាពប៉ុណ្ណោះ។
SBV ថ្មីៗនេះបានពង្រីកការដាក់កម្រិតកំណើនឥណទានសម្រាប់ធនាគារឯកជនដែលសកម្មភាពអាជីវកម្មមានដំណើរការល្អ ដើម្បីបង្កើនកំណើនសេដ្ឋកិច្ចរបស់ប្រទេស។ ធនាគារ Techcombank, VIB, VPBank, TPBank និង Sacombank ត្រូវបានអនុម័តឲ្យបង្កើនកម្រិតកំណើនឥណទានរបស់ពួកគេដល់ចន្លោះ ១៩ ទៅ ២៣ ភាគរយ។
ទោះបីមានការពង្រីករបាយការណ៍របស់ក្រុមហ៊ុនមូលបត្រ BSC របស់ធនាគារ BIDV បានព្យាករថា កំណើនឥណទាននៃប្រព័ន្ធធនាគារទាំងមូលសម្រាប់ឆ្នាំនេះនឹងមានត្រឹមតែ ៩ ភាគរយប៉ុណ្ណោះធៀប ១៣ ភាគរយ ក្នុង ២០១៩។
BSC បានកត់សម្គាល់ថា ធនាគារពាណិជ្ជឯកជនបានបន្ថយសមាមាត្រនៃការផ្តល់ប្រាក់កម្ចីសម្រាប់បុគ្គល និងសហគ្រាសខ្នាតតូច និងមធ្យម (SMEs) ខណៈដែលផ្តោតលើអាជីវកម្មធុនធំដែលមានភាពសុំាល្អទល់នឹងការរីករាលដាលកូវីដ ១៩។
មានការយល់ឃើញដូចគ្នានេះ ក្រុមហ៊ុនមូលបត្រ VCBS នៃធនាគារ Vietcombank ក៏បានឲ្យដឹងថា SBV បានបន្ធូរកម្រិតកំណើនឥណទានសម្រាប់ធនាគារ ពាណិជ្ជមួយចំនួន ប៉ុន្តែកំណើនឥណទាននៃប្រព័ន្ធធនាគារទាំងមូលនឹងតិចជាង ១០ ភាគរយក្នុងឆ្នាំ ២០២០។
ក្រុមអ្នកវិភាគនៃសាជីវកម្មមូលបត្រ Saigon (SSI) បានព្យាករថា សូម្បីតែអត្រាទាបក៏ដោយរបាយការណ៍របស់ SSI ថ្មីៗនេះលើទស្សនៈវិស័យសម្រាប់ឧស្សាហកម្មធនាគារក្នុងឆមាសទី ២ ឆ្នាំ ២០២០ កំណើនឥណទានដែលបានព្យាករក្នុងឆ្នាំ ២០២០ នឹងនៅក្នុងរង្វង់ ៧,៥ ទៅ ៨,៥ ភាគរយ។
យោងតាមអ្នកវិភាគហិរញ្ញវត្ថុតម្រូវការឥណទានប្រហែលបន្តចុះខ្សោយក្នុងពេលខាងមុខ ស្របពេលដែលប្រទេសនៅតែរងគ្រោះដោយសារផលប៉ះពាល់នៃការរីករាលដាលកូវីដ ១៩ ខណៈធនាគារជាពិសេស ធនាគារពាណិជ្ជឯកជនធំៗប្រហែលមិនទម្លាក់ស្តង់ដាផ្តល់ឥណទានរបស់ពួកគេក្នុងអំឡុងពេលនេះទេ៕ VNS_ANN/RR