.jpg)
អ្នកដំណើរកំពុងធ្វើដំណើរកាត់មុខធនាគារអេស៊ីលីដានៅមហាវិថីព្រះមុនីវង្ស។ ហុង មិនា
ភ្នំពេញៈ ធនាគារពាណិជ្ជឈានមុខគេ ២ គឺធនាគារ អេស៊ីលីដាគ្រប់គ្រងដោយវិនិយោគិនក្នុងស្រុក និងធនាគារភ្នំពេញពាណិជ្ជ (PPCBank) គ្រប់គ្រងដោយវិនិយោគិនកូរ៉េខាងត្បូងទទួលបានការយល់ព្រមពីផ្សារមូលបត្រកម្ពុជា (CSX) លើពាក្យស្នើសុំពិនិត្យលើលទ្ធភាពចុះបញ្ជីក្នុងផ្សារហ៊ុន។ នេះបើយោងតាមសេចក្តីប្រកាសរបស់ CSX។
អេស៊ីលីដា ភីអិលស៊ី គឺជាធនាគារពាណិជ្ជដំបូងដែលបានទទួលការយល់ព្រមជាគោលការណ៍លើពាក្យស្នើសុំពិនិត្យលើលទ្ធភាពចុះបញ្ជីលក់មូលបត្រកម្មសិទ្ធិពី CSX ខណៈ PPCBank Plc បានទទួលការយល់ព្រមជាគោលការណ៍លើការពិនិត្យលើលទ្ធភាពចុះបញ្ចីលក់មូលបត្របំណុល។
សេចក្ដីប្រកាសព័ត៌មានបានពី CSX ដែលទទួលបានដោយភ្នំពេញប៉ុស្ដិ៍កាលពីម្សិលមិញបានឲ្យដឹងថា CSX បានអនុម័តលើការពិនិត្យលើលទ្ធភាពចុះបញ្ជីមូលបត្រដល់ អេស៊ីលីដា និងការត្រួតពិនិត្យសិទ្ធិចុះបញ្ជីមូលបត្របំណុលដល់ PPCBank Plc កាលពីថ្ងៃទី ២៤ ខែ ធ្នូ ឆ្នាំ ២០១៩។
សេចក្ដីប្រកាសព័ត៌មាននេះបានឲ្យដឹងថា៖ «ដើម្បីចុះបញ្ជីផ្លូវការ និងមានមូលបត្ររបស់ខ្លួនជួញដូរលើ CSX ធនាគារអេស៊ីលីដា និង PPCBank Plc នឹងទទួលបានការយល់ព្រមសម្រាប់ការបោះផ្សាយមូលបត្រសាធារណៈលើកដំបូង (IPO) ពីគណៈកម្មការមូលបត្រកម្ពុជា (SECC) និងឆ្លើយតបតាមលក្ខខណ្ឌតម្រូវចុះបញ្ជីបន្ថែមទៀតរបស់ CSX »។
ធនាគារអេស៊ីលីដាបានទទួលលិខិតផ្លូវការមួយពីធនាគារជាតិនៃកម្ពុជា (NBC) កាលពីថ្ងៃទី ២៦ ខែវិច្ឆិកាដែលអាចឲ្យធនាគារនេះបន្តផែនការរបស់ខ្លួនសម្រាប់ IPO ។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានថ្លែងថា៖ «ភាគទុនិករបស់យើងបានយល់ព្រមជាឯកច្ឆន្ទថា ធនាគារនេះគួរតែក្លាយជាសាធារណៈដើម្បីធ្វើពិពិធកម្មធនធានរបស់យើងនៃការផ្ដល់ហិរញ្ញប្បទាន និងប្រើប្រាស់ទីផ្សារមូលធនកម្ពុជាសម្រាប់កំណើននៅពេលអនាគតរបស់យើង។ ក្នុងឱកាសនេះយើងចង់ជូនដំណឹងដល់អតិថិជនរបស់យើង និងសាធារណជនថា ភាគហ៊ុនរបស់ធនាគារអេស៊ីលីដានឹងអាចរកបានសម្រាប់ការវិនិយោគ បន្ទាប់ពីការទទួលបានការយល់ព្រមបន្ថែមពី CSX និង SECC»។
លោក HA Jong Weon ប្រធានផ្នែកប្រតិបត្តិការបានប្រាប់ភ្នំពេញប៉ុស្ដិ៍កាលពីម្សិលមិញថា មូលហេតុនេះគឺថាធនាគារជាច្រើននឹងបោះផ្សាយមូលបត្របំណុលសាធារណៈលើកដំបូង ហើយការចេញមូលបត្របំណុលនឹងបង្កើនសមត្ថភាពរបស់ក្រុមហ៊ុនដើម្បីពង្រីកប្រតិបត្តិការ និងពង្រឹងសមត្ថភាពប្រកួតប្រជែង។
លោកថ្លែងថា៖ «ធនាគារពាណិជ្ជពីរចង់ទទួលបានកេរ្តិ៍ឈ្មោះកាន់តែខ្ពស់ និងអត្ថប្រយោជន៍ការប្រកួតប្រជែងកាន់តែប្រសើរ តាមរយៈការចុះបញ្ជីនៅផ្សារមូលបត្រ។ ការទទួលយកគំនិតផ្ដួចផ្ដើមទាំងនេះធនាគារផ្សេងទៀតត្រូវបានរំពឹងថានឹងអនុវត្តតាមករណីរបស់ពួកគេ»។
លោកបញ្ជាក់ថា៖ «មូលបត្រ និងមូលបត្រដែលបានចេញដោយធនាគារពាណិជ្ជឈានមុខគេទាំង ២ នឹងមិនគ្រាន់តែលើកកម្ពស់ទំហំ និងគុណភាពរបស់ផ្សារមូលបត្រប៉ុណ្ណោះទេ ប៉ុន្តែថែមទាំងដើរតួនាទីដ៏សំខាន់សម្រាប់ការចូលរួមជាបន្តបន្ទាប់នៅទីផ្សារនេះផងដែរ»។
លោក Ha ឲ្យដឹងថា សម្រាប់វិនិយោគិន ពួកគេនឹងមានផលិតផលមានគុណភាពល្អកាន់តែច្រើន ដើម្បីវិនិយោគបន្ថែមលើភាគហ៊ុនដែលមានស្រាប់។
លោកថា៖ «ខ្ញុំជឿជាក់ថា ឧស្សាហកម្មធនាគារល្បីចំពោះប្រជាជនកម្ពុជាទាក់ទងនឹងប្រាក់ចំណេញ គណនេយ្យភាព តម្លាភាព និងការគោរពតាមច្បាប់របស់ខ្លួន។ ធនាគារពាណិជ្ជកម្ម ២ នេះនឹងទាក់ទាញចំណាប់អារម្មណ៍ច្រើនពីក្រុមវិនិយោគិន ហើយភាពជោគជ័យនៃការចេញនេះនឹងជាឧទាហរណ៍ដ៏ល្អដើម្បីទាក់ទាញក្រុមហ៊ុនផ្សេងទៀត ពិសេសធនាគារពាណិជ្ជផ្សេងទៀតដើម្បីបន្តចុះបញ្ជី»។
ធនាគារ PPCBank នឹងចេញមូលបត្របំណុលសាជីវកម្មគិតជារូបិយប័ណ្ណក្នុងស្រុក (ប្រាក់រៀល)។ បន្ទាប់ពីការយល់របស់ CSX វាប្រហែលជាត្រូវការពេលវេលា ២ ខែក្នុងការចុះបញ្ជី។
CSX បានប្រមូលទុនប្រហែល ១៥១ លានដុល្លារ ពីការជួញដូរមូលបត្រ និងមូលបត្របំណុលសាជីវកម្មគិតត្រឹមចុងឆ្នាំ ២០១៩ កើនឡើងប្រហែល ២៦ ភាគរយ ធៀបនឹង ១២០ លានដុល្លារ កាលពីឆ្នាំ ២០១៨។ នេះបើតាមទិន្នន័យបានពីគណៈកម្មការមូលបត្រកម្ពុជាដែលបានចេញផ្សាយកាលពីសប្ដាហ៍មុន៕LA
