.jpg)
ធនាគារពិភពលោកកាលពីថ្ងៃអង្គារ បានកែតម្រូវការព្យាករកំណើនសេដ្ឋកិច្ចប្រទេសកម្ពុជា សម្រាប់ឆ្នាំ ២០២០ នេះមកនៅត្រឹមដក ២ ភាគរយ។ ហុង មិនា
ភ្នំពេញ: ធនាគារពិភពលោកកាលពីថ្ងៃអង្គារ បានកែតម្រូវការព្យាករកំណើនសេដ្ឋកិច្ចប្រទេសកម្ពុជា សម្រាប់ឆ្នាំ ២០២០ នេះមកនៅត្រឹមដក ២ ភាគរយ ដោយសារតែវិស័យជំរុញកំណើនសំខាន់ៗដូចជាសំណង់ ទេសចរណ៍ និងការនាំចេញទំនិញបន្តរងផលប៉ះពាល់យ៉ាងខ្លាំងពីការរីករាលដាលជំងឺកូវីដ ១៩។
ធនាគារពិភពលោកបានឱ្យដឹងថា ការព្យាករកំណើនចុងក្រោយ ដែលបានកែតម្រូវពីចន្លោះដក ១ ភាគរយ និងដក ២,៩ ភាគរយ កាលពីខែឧសភា។ ធនាគារនេះបន្តថា ការធ្វើអន្តរាគមន៍សារពើពន្ធរបស់រដ្ឋាភិបាលគឺមិនធ្លាប់មានពីមុនដែលមានចំនួន ៥ ភាគរយ នៃផលិតផលក្នុងស្រុកសរុបស្របនឹងគោលនយោបាយរូបិយវត្ថុ ហើយវាមានសារៈសំខាន់ណាស់ដែលថា អាជ្ញាធររៀបចំការស្ដារសេដ្ឋកិច្ចក្រោយជំងឺកូវីដ១៩ប្រកបដោយប្រសិទ្ធភាព។
ក្នុងឆ្នាំ ២០២០ ការរីករាលដាលជំងឺនេះបានប៉ះពាល់យ៉ាងខ្លាំងដល់កត្តាជំរុញកំណើនសេដ្ឋកិច្ចសំខាន់ៗរបស់ប្រទេសកម្ពុជា ដែលបានរួមចំណែកជាង ៧០ ភាគរយ នៃកំណើនសេដ្ឋកិច្ច និង ៣៩ ភាគរយ នៃការងារមានប្រាក់ខែសរុបកាលពីឆ្នាំ ២០១៩។
ជំងឺកូវីដ ១៩ បានធ្វើឱ្យជាប់គាំងវិស័យសំណង់ និងការរីកចម្រើននៃវិស័យអចលនទ្រព្យដែលពឹងផ្អែកយ៉ាងខ្លាំងលើការវិនិយោគបរទេស។ ការនាំចេញដែកថែប និងស៊ីម៉ងត៍ក្នុងរយៈពេល ៦ ខែដំបូងឆ្នាំ ២០២០ បានធ្លាក់ចុះ ៤៥,១ ភាគរយ និង ៨,២ ភាគរយធៀបនឹងរយៈពេលដូចគ្នាកាលពីឆ្នាំមុន ដោយសារតែគម្រោងអភិវឌ្ឍន៍ធំៗមួយចំនួនត្រូវបានផ្អាកសកម្មភាព។
ដោយសារតែការរឹតបន្តឹងការធ្វើដំណើរ និងការបិទប្រទេស វិស័យទេសចរណ៍ និងបដិសណ្ឋារកិច្ចរបស់កម្ពុជាបានដួលរលំ។ ការមកដល់ភ្ញៀវអន្តរជាតិបានធ្លាក់ចុះ ៦៤,៥ ភាគរយក្នុងឆមាសទី ១ ឆ្នាំ ២០២០។
ការធ្លាក់ចុះតម្រូវការយ៉ាងគំហុកក្នុងពិភពលោកបានបណ្ដាលឱ្យវិស័យកម្មន្តសាលរបស់ប្រទេសកម្ពុជាចុះខ្សោយ។ ការនាំចេញផលិតផលកាត់ដេរ សម្ភារធ្វើដំណើរ និងស្បែកជើង (GTF) បានធ្លាក់ចុះ ៧,២ ភាគរយ ក្នុងអំឡុងពេល ៦ ខែដំបូងនៃឆ្នាំ ២០២០។ ទន្ទឹមគ្នានោះដែរ ការនាំចូលក្រណាត់សម្រាប់យកមកកាត់ដេរបានធ្លាក់ចុះ ៨៥,៤ ភាគរយ។
ធនាគារនេះបញ្ជាក់ថា៖ «ការនាំចូលធ្លាក់ចុះខ្លាំង ដែលឆ្លុះបញ្ចាំងឱ្យឃើញនូវការស្រុតចុះតម្រូវការក្នុងស្រុក។ ដោយសារតែការធ្លាក់ចុះនៃការនាំចេញមានទំហំច្រើនជាងការទូទាត់នៃការនាំចូល វាធ្វើឱ្យឱនភាពគណនីចរន្តរីកធំ ហើយត្រូវបានព្យាករទុកថានឹងឡើងដល់ ១២,៨ ភាគរយ នៃផលិតផលក្នុងស្រុកសរុបក្នុងឆ្នាំ ២០២០ ធៀបនឹងអត្រា ១០ ភាគរយ នៃផលិតផលក្នុងស្រុកសរុបកាលពីឆ្នាំ ២០១៩ ដែលរំពឹងថា ចាំបាច់ត្រូវមានការហូរចូលនៃការវិនិយោគផ្ទាល់ពីបរទេសដើម្បីជួយទ្រទ្រង់»។
ទុនបម្រុងជាតិដុលត្រូវបានព្យាករថា នឹងមាននៅត្រឹម ១៩ ពាន់លានដុល្លារ ក្នុងឆ្នាំ ២០២០ ឬសមមូលរយៈពេល ៧ ខែនៃការនាំចូល។
លោក Aaditya Mattoo ប្រធានសេដ្ឋវិទូទទួលបន្ទុកអាស៊ីខាងកើត និងប៉ាស៊ីហ្វិកនៅធនាគារពិភពលោកបានឱ្យដឹងថា ប្រទេសនៅអាស៊ីខាងកើត និងប៉ាស៊ីហ្វិកជាច្រើនបានទទួលជោគជ័យក្នុងការទប់ស្កាត់ជំងឺកូវីដ ១៩ និងផ្ដល់ភាពធូរស្រាល ប៉ុន្តែប្រទេសទាំងនោះនឹងជម្នះក្នុងការស្ទុះងើបឡើងវិញ និងការរីកចម្រើន។
លោក Mattoo ថ្លែងថា៖ «អាទិភាពនៅពេលនេះ គួរតែជាសាលារៀនដែលមានសុវត្ថិភាព ដើម្បីការពារធនធានមនុស្ស ពង្រីកមូលដ្ឋានពន្ធចង្អៀត ដើម្បីចៀសវាងការកាត់បន្ថយការវិនិយោគសាធារណៈ និងការធ្វើកំណែទម្រង់នៃវិស័យសេវាកម្មដែលមានការការពារ ដើម្បីទាញយកអត្ថប្រយោជន៍ពីឱកាសឌីជីថលដែលកំពុងរីកចម្រើនរហ័ស»។
ធនាគារពិភពលោកបានឱ្យដឹងថា វាមានសារៈសំខាន់ណាស់ដែលរដ្ឋាភិបាលកម្ពុជារៀបចំបានយ៉ាងល្អសម្រាប់ការស្ទុះងើបឡើងវិញរបស់សេដ្ឋកិច្ចក្រោយជំងឺកូវីដ ១៩។
នៅពេលនេះការយកចិត្តទុកដាក់យ៉ាងជិតស្និទ្ធផ្ដោតលើការពង្រីកការវិនិយោគ និងពាណិជ្ជកម្មក្នុងតំបន់ដែលកើតចេញពីកិច្ចព្រមព្រៀងពាណិជ្ជកម្មសេរីកម្ពុជា និងចិន។
ធនាគារនេះបន្ថែមថា៖ «មានតម្រូវការបន្ទាន់ចំពោះតម្លៃបន្ថែមក្នុងស្រុកនៅពេលអនាគត និងការបង្កើតការងារកាន់តែច្រើនថែមទៀត។ ការពង្រឹងតម្រូវការក្នុងស្រុកការការពារអំណាចការទិញរបស់អតិថិជនក្នុងស្រុក ចំពេលវិបត្តិសុខភាពសាធារណៈ ឬគ្រោះមហន្តរាយធម្មជាតិខាងក្រៅគឺជាផ្លូវឆ្ពោះទៅមុខ»។
ធនាគារនេះបានបន្តថា៖ «វាជាការចាំបាច់ក្នុងការបន្តការតាមដានយ៉ាងយកចិត្តទុកដាក់បំផុតដល់ភាពងាយរងគ្រោះ ដែលបណ្ដាលមកពីការរីកចម្រើនវិស័យសំណង់ និងអចលនទ្រព្យរយៈពេលយូរ និងការបង្កើនការផ្ដល់ឥណទានដល់វិស័យសំណង់ និងអចលនទ្រព្យ»។
កាលពីសប្ដាហ៍មុន ធនាគារអភិវឌ្ឍន៍អាស៊ី (ADB) ក៏បានកែតម្រូវការព្យាករកំណើនឆ្នាំ ២០២០ របស់ខ្លួនសម្រាប់កម្ពុជាមកនៅត្រឹមដក ៤ ភាគរយធៀបនឹងការព្យាករលើកមុនដក ៥,៥ ភាគរយ។ វានឹងស្ទុះងើបឡើងវិញដល់ ៥,៩ ភាគរយក្នុងឆ្នាំ ២០២១៕LA
វីដេអូ៖
