.jpg)
ភ្នំពេញៈ ធនាគារវឌ្ឍនៈបានដាក់ឲ្យដំណើរការសេវាធនាគារចល័ត (Mobile Banking) កាលពីថ្ងៃពុធ ដើម្បីបំពេញតម្រូវការអតិថិជនព្រមទាំងដើម្បីឆ្លើយតបនឹងការកើនឡើងយ៉ាងរហ័សនៃការអភិវឌ្ឍបច្ចេកវិទ្យាឌីជីថលនៅកម្ពុជា។
យោងតាមសេចក្ដីប្រកាសព័ត៌មានបានឲ្យដឹងថា ការដាក់ឲ្យដំណើរការនៃ «សេវាធនាគារចល័ត» ថ្មីនេះគឺបន្ទាប់ពីទទួលបានការអនុញ្ញាតពីធនាគារជាតិនៃកម្ពុជាកាលពីថ្ងៃទី ២១ ខែកក្កដា ឆ្នាំ ២០២០។
ធនាគារនេះបានឲ្យដឹងថា៖ «ការដាក់ឲ្យដំណើរការសេវាធនាគារចល័ត នាពេលនេះគឺជាការបោះជំហានថ្មីមួយប្រកបដោយភាពជោគជ័យរបស់ធនាគារវឌ្ឍនៈក្នុងការចូលរួមអភិវឌ្ឍ លើកស្ទួយការធ្វើទំនើបកម្មសេវាកម្មតាមបែបឌីជីថលក្នុងវិស័យធនាគារ ដើម្បីឆ្លើយតបទាន់ពេលវេលា និងតម្រូវការរបស់អតិថិជនលើសេវាកម្មហិរញ្ញវត្ថុ ១ ប្រកបដោយភាពទំនើប ងាយស្រួល ឆាប់រហ័ស និងមានសុវត្ថិភាពខ្ពស់ស្របតាមចក្ខុវិស័យវែងឆ្ងាយ និងច្បាស់លាស់ក្នុងការធ្វើឌីជីថលូបនីយកម្មលើប្រតិបត្តិការរបស់ធនាគារ»។
ធនាគារត្រូវបានបង្កើតឡើងកាលពីឆ្នាំ ២០០២ ដោយលោក សំ អាង លោកស្រី ឈុន លាង ដែលជាអ្នកមានស្តុកស្តម្ភ និងមានអាជីវកម្មច្រើនប្រភេទនៅកម្ពុជា។ បច្ចុប្បន្នធនាគារនេះមានសាខា ១៩ នៅទីក្រុងភ្នំពេញ និងនៅតាមខេត្តមួយចំនួន។
គិតត្រឹមចុងឆ្នាំ ២០១៩ ធនាគារនេះមានទ្រព្យសកម្មសរុបមានតម្លៃ ៧២០,៧ លានដុល្លារ កើនឡើង ១៣ ភាគរយ ធៀបនឹង ៦៣៥,៩ លានដុល្លារ កាលពីឆ្នាំ ២០១៨។ ធនាគារនេះគ្រោងនឹងបង្កើតសាខាកាន់តែច្រើនថែមទៀតទូទាំងប្រទេសកម្ពុជាក្នុងរយៈពេល ២ ឆ្នាំក្រោយ៕LA
