ភ្នំពេញៈ ធនាគារឯកទេស វីង ជាក្រុមហ៊ុនផ្ដល់សេវាទូទាត់អេឡិចត្រូនិក បានដាក់ដំណើរការសេវាកាបូបប្រាក់អេឡិចត្រូនិកថ្មីមួយដែលអនុញ្ញាតឲ្យអតិថិជនប្រើប្រាស់ទូរស័ព្ទចល័តក្នុងការប្រតិបត្តិការទូទាត់។ នេះបើតាមសេចក្ដីប្រកាសព័ត៌មាន។
ផលិតផលដែលហៅថា WingPay នៅពេលនេះអាចរកបាននៅក្នុងដៃគូពាណិជ្ជកម្មជាង ២០ ០០០ កន្លែងទូទាំងប្រទេសដែលចាប់ពីរ៉ឺម៉កម៉ូតូដល់អ្នកលក់ដូរតាមដងផ្លូវ និងហាងលក់រាយធំៗ។
កម្មវិធីនេះអាចឲ្យអតិថិជនផ្ទេរមូលនិធិ និងបង់ប្រាក់វិក្កយបត្រតាមទាំងទូរស័ព្ទស្មាតហ្វូន និងទូរស័ព្ទធម្មតា។
លោក Jojo Malolos អគ្គនាយក Wing ថ្លែងថាដំណោះស្រាយការទូទាត់ចល័តគ្មានសាច់ប្រាក់ថ្មីនេះនឹងជំនួសការទូទាត់ជាសាច់ប្រាក់នៅកម្ពុជាពេលណាមួយនាអនាគត ដោយសារតែប្រជាជនជិតពាក់កណ្ដាលក្នុងចំណោមប្រជាជនកម្ពុជាសរុបមានទូរស័ព្ទចល័ត។
កម្មវិធីទូទាត់ចល័តកំពុងទទួលបានការទាក់ទាញយ៉ាងរហ័ស និងផ្ដល់បណ្ដាញថ្មីដើម្បីលើកកម្ពស់ការរួមបញ្ចូលសេវាហិរញ្ញវត្ថុនៅកម្ពុជា។
Pi Pay បាននាំមុខគេក្នុងចំណោមសេវាទូទាត់ចល័តដោយសារកម្មវិធីនេះ ត្រូវបានទាញយកជាង ២១០ ០០០ ដងតាំងពីការដាក់ដំណើរការរបស់ខ្លួនកាលពីខែកក្កដាឆ្នាំមុន។
កម្មវិធីផ្សេងទៀតកំពុងប្រកួតប្រជែងដណ្ដើមចំណែកទីផ្សារទូទាត់ចល័តដែលរីកចម្រើនរួមមានកម្មវិធី DaraPay កម្មវិធី Bongluy កម្មវិធី Speedpay កម្មវិធី GrabPay និងកម្មវិធី Smartluy។ ធនាគារមួយចំនួនក៏បានដាក់ចេញកម្មវិធីទូទាត់ផ្ទាល់ជាផ្នែកមួយនៃធនាគារអនឡាញផងដែរ៕LA