.jpg)
កម្មករកំពុងពិនិត្យមើលចង្វាក់ផលិតកម្មក្នុងរោងចក្រផលិតនំស្រួយ លី លី កាលពីពេលកន្លងមក។ រូបថត ហ៊ឹន ពិសី
ភ្នំពេញៈ ធនាគារសហគ្រាសធុនតូច និងមធ្យមកម្ពុជា (ផ.ស.ក) ដែលជាធនាគារគ្រប់គ្រងដោយរដ្ឋមានដើមទុនដំបូង ១០០ លានដុល្លារ បានដាក់ឲ្យដំណើរការជាផ្លូវការហើយកាលពីថ្ងៃសុក្រក្នុងគោលបំណងដើម្បីផ្តល់នូវមូលនិធិសម្រាប់ជួយពង្រឹងដល់ចង្វាក់ផលិតកម្ម និងភាពប្រកួតប្រជែងរបស់អ្នកនៅក្នុងវិស័យនេះឲ្យកាន់តែមានភាពរឹងមាំជាងពេលមុន។
សេចក្តីប្រកាសព័ត៌មានបានឲ្យដឹងថា គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមនេះបង្កើតឡើងក្នុងគោលបំណងផ្តល់ឥណទានមានការប្រាក់ទាប ដើម្បីជំរុញការអភិវឌ្ឍសហគ្រាសធុនតូច និងមធ្យមក្នុងវិស័យអាទិភាព រួមមានផ្នែកកម្មន្តសាល និងសិប្បកម្ម។
មូលនិធិក្រោមគម្រោងសហហិរញ្ញប្បទាននេះមានទំហំទឹកប្រាក់ ១០០ លានដុល្លារ ដែលផ្តល់សហហិរញ្ញប្បទានបដិភាគស្មើគ្នារវាងធនាគារ សហគ្រាសធុនតូច និងមធ្យមកម្ពុជាជាមួយនឹងគ្រឹះស្ថានធនាគារ និងមីក្រូហិរញ្ញវត្ថុចំនួន ៣៣ ក្នុងនោះរួមមាន ធនាគារពាណិជ្ជចំនួន ២៣ ធនាគារឯកទេស ២ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៥ និងគ្រឹះស្ថានមីក្រូហិរញ្ញវត្ថុ ២។
សហគ្រាសធុនតូច និងមធ្យមអាចខ្ចីប្រាក់ចំនួន ២០ ម៉ឺនដុល្លារ សម្រាប់ទុនបង្វិល និង ៣០ ម៉ឺនដុល្លារ សម្រាប់ទុនវិនិយោគដែលអត្រាការប្រាក់អតិបរមា ៧ ភាគរយ ក្នុង ១ ឆ្នាំ និងមានរយៈពេលសងត្រឡប់មិនលើសពី ៤ ឆ្នាំ។
តាមសេចក្តីប្រកាសព័ត៌មាន «លក្ខខណ្ឌខ្ចីប្រាក់អាស្រ័យទៅលើលក្ខខណ្ឌឥណទានរបស់គ្រឹះស្ថានហិរញ្ញវត្ថុចូលរួមនីមួយៗ»។
សេចក្តីប្រកាសព័ត៌មាននេះបន្តថា ដើម្បីអាចទទួលបានឥណទាននេះ សហគ្រាសធុនតូច និងមធ្យមត្រូវជាសហគ្រាសដែលចុះបញ្ជីផ្លូវការស្របច្បាប់នៅកម្ពុជា។
សេចក្តីប្រកាសព័ត៌មានបានសរសេរថា៖«សហគ្រាសធុនតូចសំដៅទៅដល់សហគ្រាសអាជីវកម្មគ្រប់ប្រភេទដែលមានផលរបរប្រចាំឆ្នាំចាប់ពី ២៥០ ០០០ ០០០រៀល ឬមានចំនួននិយោជិតចាប់ពី ១០ នាក់ទៅ ៥០ នាក់។ ចំណែកសហគ្រាសធុនមធ្យមសំដៅដល់សហគ្រាសអាជីវកម្មគ្រប់ប្រភេទដែលមានផលរបរប្រចាំឆ្នាំចាប់ពី ៧០០ ០០០ ០០០ រៀល ឬមានចំនួននិយោជិតចាប់ពី ៥១ នាក់ដល់ ១០០ នាក់»។
មន្ត្រីជាន់ខ្ពស់នៃ ផ.ស.ក សុំមិនបញ្ចេញឈ្មោះបានប្រាប់ភ្នំពេញប៉ុស្តិ៍កាលពីម្សិលមិញថា ធនាគារចាប់ផ្តើមទទួលពាក្យសើ្នសុំកម្ចីពីសហគ្រាសធុនតូច និងមធ្យមចាប់ពីថ្ងៃជូនដំណឹងនេះតទៅ។ លោកថ្លែងថា៖ «ធនាគារនេះជាធនាគាររបស់រដ្ឋដែលផ្តល់អត្រាការប្រាក់ទាបដល់វិស័យ SME ហើយប្រាក់កម្ចីទទួលបានពីធនាគារនឹងជួយពង្រីកអាជីវកម្មរបស់ពួកគេ»។
លោកស្រី កែវ មុំ អគ្គនាយិកា LYLY Food Industry Co ដែលជារោងចក្រផលិតនំស្រួយ លីលី បានប្រាប់ភ្នំពេញកាលពីម្សិលមិញថា ខណៈលទ្ធភាពក្នុងការទទួលបានហិរញ្ញប្បទានរបស់ SME នៅមានកម្រិតទាប មូលនិធិនេះនឹងធ្វើឲ្យមានភាពងាយស្រួលសម្រាប់ SME ក្នុងការទទួលបានហិរញ្ញប្បទាន។ លោកស្រីបានបន្តថា SME ភាគច្រើនខ្ចីប្រាក់ពីគ្រឹះស្ថានហិរញ្ញវត្ថុសម្រាប់ធ្វើជាទុនបង្វិល និងទុនវិនិយោគ។
លោកស្រីថ្លែងថា៖ «យើងខ្ចីប្រាក់ដើម្បីធ្វើការពង្រីកអាជីវកម្មរួមមានទិញវត្ថុធាតុដើម និងនាំចូលម៉ាស៊ីនផលិត កែច្នៃ ហើយយើងសូមអំពាវនាវឲ្យរដ្ឋាភិបាលជួយសម្រួលបន្ធូរបន្ថយនូវវត្ថុបញ្ចាំ ដើម្បីផ្តល់ភាពងាយស្រួលដល់សហគ្រាសធុនតូច និងមធ្យមក្នុងការទទួលបានកម្ចី»។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានប្រាប់ភ្នំពេញប៉ុស្តិ៍ថា បន្ទាប់ពីធនាគារ SME ដាក់ឲ្យដំណើរការជាផ្លូវការភ្លាម សមាជិកប្រមាណ ៣០០ នៅទូទាំងប្រទេសនឹងទទួលបានប្រយោជន៍ពីធនាគារនេះ។ លោកថ្លែងថា៖ «សមាគមកំពុងត្រៀមឯកសារដើម្បីស្នើសុំកម្ចីដែលគ្រោងនឹងដាក់នៅសប្តាហ៍ក្រោយ»។
របាយការណ៍សាជីវកម្មហិរញ្ញវត្ថុអន្តរជាតិ (IFC) បានចេញផ្សាយកាលពីខែសីហា ឆ្នាំ ២០១៩ បង្ហាញថា សហគ្រិនស្ត្រីរបស់កម្ពុជាបានបន្តជួបការលំបាកដោយសារលទ្ធភាពនៅមានកម្រិតក្នុងការទទួលបានកម្ចីសម្រាប់ពង្រីកអាជីវកម្ម។ របាយការណ៍បញ្ជាក់ថា មានតែ ៣ ភាគរយប៉ុណ្ណោះដែលមានលទ្ធភាពទទួលបានឥណទានផ្លូវការពីគ្រឹះស្ថានមីក្រូហិរញ្ញវត្ថុ និងធនាគារ។
របាយការណ៍បានប៉ាន់ប្រមាណថា តម្រូវការឥណទានពីសហគ្រិនស្ត្រីបច្ចុប្បន្នមានចំនួន ៤,២ ពាន់លានដុល្លារ ដែលស្មើនឹងជិត ៦៣ ភាគរយ នៃថវិកា ៦,៧ ពាន់លានដុល្លារ របស់ប្រទេស កម្ពុជា សម្រាប់ឆ្នាំ ២០១៩។
ការស្ទង់មតិមួយដោយក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ក្នុងចំណោមសហគ្រាស ៧១ នាពេលថ្មីនេះក្នុងប្រទេសកម្ពុជាបានរកឃើញថា ពួកគេត្រូវការជំនួយសម្រាប់ការស្រាវជ្រាវទីផ្សារ ការអភិវឌ្ឍសេវា ការវេចខ្ចប់ បច្ចេកវិទ្យា ធនធានមនុស្ស ហិរញ្ញវត្ថុ ការចុះបញ្ជីអាជីវកម្មពន្ធដារ ព្រមទាំងការលម្អស្តង់ដារអនាម័យ៕
