ភ្នំពេញៈ ធនាគារស្ថាបនា និងក្រុមហ៊ុនទូទាត់គ្មានសាច់ប្រាក់ Pi Pay បានចុះកិច្ចព្រមព្រៀងភាពជាដៃគូលើការទូទាត់តាមអនឡាញ និងការផ្ទេរប្រាក់រវាងគណនីនៃស្ថាប័នទាំង ២។
កិច្ចព្រមព្រៀងនេះត្រូវបានធ្វើឡើងកាលពីថ្ងៃអាទិត្យរវាងលោក Norihiko Kato នាយកប្រតិបត្តិធនាគារស្ថាបនា និងលោក Tomas Pokorny នាយកប្រតិបត្តិក្រុមហ៊ុន Pi Pay។
កិច្ចព្រមព្រៀងនេះនឹងអនុញ្ញាតឲ្យអតិថិជនធនាគារស្ថាបនា និង Pi Pay អាចផ្ទេរប្រាក់ទៅគណនីគ្នាទៅវិញទៅមកដោយឥតគិតថ្លៃ។
លោក Norihiko Kato បាននិយាយថាការសហការជាមួយក្រុមហ៊ុន Pi Pay គឺជាជម្រើសដ៏ល្អព្រោះ Pi Pay ជាក្រុមហ៊ុនដែលប្រើប្រាស់បច្ចេកវិទ្យាទំនើបចុងក្រោយបង្អស់ទាក់ទងនឹងសេវាហិរញ្ញវត្ថុនៅកម្ពុជា។
លោកថ្លែងថា៖ «យើងចង់ឲ្យអតិថិជនទទួលបាននូវភាពងាយស្រួល និងអត្ថប្រយោជន៍ពីការរីកចម្រើននៃបច្ចេកវិទ្យាក្នុងវិស័យហិរញ្ញវត្ថុពេលបច្ចុប្បន្ន។ នេះជាហេតុផលដែលយើងធ្វើកិច្ចសហការជាមួយ Pi Pay»។
លោក Norihiko Kato បានឲ្យដឹងថាបច្ចុប្បន្នធនាគារស្ថាបនាមានសាខាចំនួន ១៦៩ កន្លែងគ្របដណ្តប់លើខេត្តក្រុងទូទាំងប្រទេសកម្ពុជា។
នាយកប្រតិបត្តិក្រុមហ៊ុន Pi Pay លោក Tomas Pokorny បានឲ្យដឹងថា ខណៈបច្ចុប្បន្នប្រជាជនខ្មែរប្រហែល ២០ ភាគរយប៉ុណ្ណោះប្រើប្រាស់សេវាកម្មតាមរយៈធនាគារ ដូច្នេះតាមរយៈការចាប់ដៃគូជាមួយក្រុមហ៊ុនប្រតិបត្តិការហិរញ្ញវត្ថុដែលមានបច្ចេកវិទ្យាទំនើបនឹងជួយធ្វើឲ្យការប្រើប្រាស់សេវាកម្មតាមរយៈធនាគារកាន់តែកើនឡើងផងដែរ»។
តាមលោក Tomas Pokorny ពេលនេះ Pi Pay មានកន្លែងដាក់ប្រាក់នៅរាជធានីភ្នំពេញ និងខេត្តសៀមរាបហើយនឹងមាននៅខេត្តព្រះសីហនុបន្ថែមទៀតក្នុងពេលឆាប់ៗនេះ៕ LA