.jpg)
កម្មករកំពុងលីស្រូវដាក់ឡានពេលប្រមូលទិញពីកសិករនៅខេត្តតាកែវកន្លងមក។ ហេង ជីវ័ន
ភ្នំពេញ: ធនាគារអភិវឌ្ឍន៍ជនបទ (RDB) បានប្រកាសផ្តល់ទុន ៥០ លានដុល្លារ សម្រាប់ជាកម្ចីផ្តល់ឲ្យអ្នកនៅក្នុងវិស័យស្រូវអង្ករនៅកម្ពុជា ដើម្បីដោះស្រាយបញ្ហាកង្វះទុនបង្វិលទិញស្រូវ និងជួយរក្សាស្ថិរភាពតម្លៃ។
សហព័ន្ធស្រូវអង្ករកម្ពុជា (CRF) បានឲ្យដឹងថា ទុននេះអាចនឹងជួយទិញស្រូវបានជិត ៣០ ម៉ឺនតោនក្នុងរដូវប្រមូលផលស្រូវស្រាលនេះ។
ការផ្តល់ទុនបន្ថែម ៥០ លានដុល្លារនេះបានធ្វើឡើងបន្ទាប់ពីសហព័ន្ធស្រូវអង្ករកម្ពុជាបានស្នើសុំឲ្យរដ្ឋាភិបាលជួយផ្តល់ទុន ២០០ លានដុល្លារ សម្រាប់ជាកម្ចីដល់ម្ចាស់រោងម៉ាស៊ីនកិនស្រូវនៅចុងខែវិច្ឆិកាឆ្នាំនេះ។
សេចក្តីប្រកាសព័ត៌មានរបស់ធនាគារអភិវឌ្ឍន៍ជនបទដែលបានផ្សព្វផ្សាយកាលពីថ្ងៃពុធ សប្តាហ៍មុនបានឲ្យដឹងថាតាមរយៈក្រសួងសេដ្ឋកិច្ច និងហិរញ្ញវត្ថុ ធនាគារអភិវឌ្ឍន៍ជនបទបានទទួលដើមទុនបន្ថែមពីរដ្ឋាភិបាលចំនួន ៥០ លានដុល្លារ ដើម្បីជាកម្ចីសម្រាប់ឲ្យម្ចាស់រោងម៉ាស៊ីនកិនស្រូវនៅកម្ពុជា ធ្វើជាដើមទុនទិញស្រូវស្តុកទុកបន្ថែមនៅរដូវប្រមូលផលនេះ។
សេចក្តីប្រកាសនេះបន្ថែមថា ទុននេះនឹងចាប់ផ្តើមប្រើប្រាស់បានចាប់ពីថ្ងៃទី ៩ ខែធ្នូនេះតទៅសម្រាប់បម្រើឲ្យវិស័យកសិកម្ម ពិសេសប្រើប្រាស់សម្រាប់រក្សាស្ថិរភាពតម្លៃ និងប្រមូលទិញស្រូវពីកសិករ ដើម្បីស្តុកទុក កែច្នៃ និងនាំចេញ។ សេចក្តីប្រកាសនេះបន្តថា៖ «សូមម្ចាស់រោងម៉ាស៊ីនកិនស្រូវ និងអ្នកប្រមូលទិញបន្តទិញស្រូវក្នុងតម្លៃសមស្របសម្រាប់ស្តុកទុកធ្វើជាវត្ថុធានាបំណុល ដើម្បីទទួលបានឥណទានស្របតាមលក្ខខណ្ឌរបស់ RDB»។
លោក កៅ ថាច អគ្គនាយកធនាគារ RDB បានប្រាប់ភ្នំពេញប៉ុស្តិ៍កាលពីថ្ងៃពុធថា បញ្ហាកង្វះទុនក្នុងវិស័យស្រូវអង្ករមានចន្លោះពី ២០០ ទៅ ២៥០ លានដុល្លារ។ លោកថ្លែងថា៖ «ដើម្បីជួយដោះស្រាយបញ្ហាកង្វះទុននេះ ខ្ញុំសូមអំពាវនាវដល់ធនាគារពាណិជ្ជកម្មនានា ជួយផ្តល់កម្ចីបន្ថែមដល់វិស័យស្រូវអង្ករ»។
CRF សង្ឃឹមថាឥណទាន ៥០ លានដុល្លារនេះ នឹងជួយដល់ម្ចាស់រោងម៉ាស៊ីនកិនស្រូវ និងសហគមន៍កសិកម្ម ជាពិសេសសមាជិក CRF ដើម្បីបន្តប្រមូលទិញស្រូវពីកសិករនៅរដូវប្រមូលផលនេះ។ នេះបើតាមសេចក្តីប្រកាសព័ត៌មានដដែល។
សេចក្តីប្រកាសនេះឲ្យដឹងទៀតថា៖ «វានឹងជួយរក្សាលំនឹងទីផ្សារស្រូវរបស់ប្រជាកសិករ និងបង្កើនតម្រូវការដល់រោងម៉ាស៊ីនកិនស្រូវ សហគមន៍កសិកម្មក្នុងការទិញស្រូវបន្ថែម ដើម្បីស្តុកទុកសម្រាប់កិន កែច្នៃ និងនាំចេញទៅទីផ្សារក្នុងស្រុក និងអន្តរជាតិ»។
លោក លន់ យ៉េង អគ្គលេខាធិការ CRF ប្រាប់ភ្នំពេញប៉ុស្តិ៍កាលថ្ងៃអាទិត្យថា សមាជិករបស់ CRF មួយចំនួនបានតៀមខ្លួនរួចរាល់ហើយ សម្រាប់ស្នើសុំកម្ចីពីធនាគារអភិវឌ្ឍន៍ជបបទ ដើម្បីទិញស្រូវស្តុកទុក។ លោកបន្ថែមថា បច្ចុប្បន្នសមាជិករោងម៉ាស៊ីនកិនស្រូវរបស់ CRF ចំនួន ៤៤ ក្នុងចំណោមរោងម៉ាស៊ីនជាង ១០០ នៅមានលទ្ធភាពទិញស្រូវស្តុកទុកឃ្លាំងបន្ថែម។
លោកបន្ថែមថាទំហំកម្ចី ៥០ លានដុល្លារនេះរបស់ RDB នឹងអាចជួយទិញស្រូវពីកសិករបានប្រមាណ ៣០ ម៉ឺនតោនដែលវាជាទុនសំខាន់សម្រាប់វិស័យឯកជនបង្វិលទិញស្រូវនៅរដូវច្រូតកាត់នេះរហូតដល់រដូវច្រូតកាត់នៅដើមឆ្នាំ ២០២០។
លោកបន្ថែមថា៖ «ទុននេះនឹងអាចជួយដោះស្រាយបន្ទាន់ដល់វិស័យឯកជនដែលចង់ទិញស្រូវថែមស្របពេលពួកគេជួបបញ្ហាកង្វះទុនបង្វិល»។
សេចក្តីប្រកាសព័ត៌មាន CRF បានអំពាវនាវដល់សមាជិករបស់ខ្លួនឲ្យធ្វើការយ៉ាងជិតស្និទ្ធជាមួយ RDB ដើម្បីទទួលបានឥណទាននេះ។
កម្ពុជានាំចេញអង្ករបាន ៥១៤ ១៤៩ តោន ក្នុងរយៈពេល ១១ ខែ ឆ្នាំ ២០១៩ កើនឡើង ៣,៤ ភាគរយ បើធៀបនឹងរយៈពេលដូចគ្នាកាលពីឆ្នាំមុនដែលមាន ៤៩៧ ២៤០ តោន៕ LA
