ភ្នំពេញៈ ធនាគារអេស៊ីលីដាគ្រោងនឹងរៀបចំកម្មវិធីបង្ហាញព័ត៌មានលម្អិត (រ៉ូដសូ) រយៈពេល ២ ថ្ងៃ ដើម្បីឲ្យក្រុមវិនិយោគិនសាធារណៈយល់ដឹងកាន់តែច្រើនអំពីប្រតិបត្តិការអាជីវកម្ម ស្ថានភាពហិរញ្ញវត្ថុរបស់ធនាគារនេះមុនពេលពួកគេសម្រេចចិត្តទិញភាគហ៊ុនរបស់អេស៊ីលីដា។
សេចក្ដីប្រកាសដែលបានធ្វើឡើង ១ ថ្ងៃបន្ទាប់ពីធនាគារនេះទទួលបានការយល់ព្រមជាគោលការណ៍លើការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) ពីគណៈកម្មការមូលបត្រកម្ពុជា (SECC) កាលពីថ្ងៃអង្គារ។
ធនាគារអេស៊ីលីដា ភីអិលស៊ី កា្លយជាធនាគារពាណិជ្ជទី ១ នៅកម្ពុជាក្នុងការចុះបញ្ជីបោះផ្សាយលក់មូលត្រកម្មសិទិ្ធលើកដំបូងជាសាធារណៈនៅលើក្រុមហ៊ុនផ្សារមូលបត្រកម្ពុជា (CSX)។ ធនាគារនេះគ្រោងនឹងបោះផ្សាយលក់មូលបត្រកម្មសិទ្ធិថ្មីចំនួន ៨ ៧៥១ ៣៩១ ភាគហ៊ុន និងភាគហ៊ុនដែលមានស្រាប់រហូតដល់ ១៣ ១២៧ ០៨៦ ភាគហ៊ុនដល់សាធារណជន។
លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានឲ្យដឹងថា អេស៊ីលីដានឹងរៀបចំកម្មវិធីបង្ហាញព័ត៌មានលម្អិតរយៈពេល ២ លើកនៅទីស្នាក់ការកណ្ដាលធនាគារអេស៊ីលីដា ភីអិលស៊ី នៅថ្ងៃទី ៣ ខែមីនា និងថ្ងៃទី ១០ ខែមីនា ឆ្នាំ ២០២០ ដែលនឹងមានបទបង្ហាញអំពីទិដ្ឋភាពទូទៅនៃប្រតិបត្តិការអាជីវកម្ម និងហិរញ្ញវត្ថុរបស់ធនាគារនេះ និងពេលវេលារំពឹងទុកនៃ IPO ព្រមទាំងគោលការណ៍ណែនាំវិនិយោគិនស្ដីពីរបៀបក្នុងការទិញភាគហ៊ុនរបស់ធនាគារនេះក្នុងអំឡុងពេល IPO ។
លោកថ្លែងថា៖ «ប្រាក់ដែលបានមកពី IPO នឹងត្រូវយកទៅប្រើប្រាស់ដើម្បីអភិវឌ្ឍសេវាកម្មធនាគារឌីជីថលរបស់ធនាគារនេះព្រមទាំងសម្រាប់គោលបំណងសាជីវកម្មទូទៅរបស់ធនាគារ។ យើងរីករាយក្នុងការអញ្ជើញ វិនិយោគិនសាធារណៈទាំងអស់វិនិយោគលើ IPO របស់ធនាគារអេស៊ីលីដា»។
លោក Han Kyung Tae អគ្គនាយកក្រុមហ៊ុន យន់តា ស៊ីឃ្យូរីធី (ខេមបូឌា) ភីអិលស៊ី ដែលរៀបចំគម្រោង IPO របស់ធនាគារនេះបានឲ្យដឹងថា អ្វីដែលធ្វើឲ្យ IPO របស់ធនាគារអេស៊ីលីដាមានលក្ខណៈពិសេស និងខុសប្លែកពីការបោះផ្សាយលក់មូលបត្រកម្មសិទ្ធិលើកដំបូងជាសាធារណៈមុនៗគឺធនាគារមិនមានលៃបម្រុងទុកភាគហ៊ុនសម្រាប់វិនិយោគិន និងស្ថាប័នដែលមានសក្ដានុពលនោះទេ។ រាល់ភាគហ៊ុនដែលនឹងបោះផ្សាយលក់ទាំងអស់នឹងត្រូវលក់ជូនវិនិយោគិន និងសាធារណជន។
លោកលើកឡើងថា៖ «IPO របស់ធនាគារអេស៊ីលីដា នឹងត្រូវបានចាត់ទុកថា ជា «ការបោះផ្សាយលក់មូលបត្រកម្មសិទ្ធិជូនប្រជាជន» ដែលលើកទឹកចិត្តដល់វិនិយោគិន រូបវន្តបុគ្គល និងសាធារណជនទូទៅឲ្យចូលរួមក្នុងការបោះផ្សាយលក់មូលបត្រកម្មសិទ្ធិនេះទៅតាមសមត្ថភាពហិរញ្ញវត្ថុរបស់ខ្លួន។ យើងបានធ្វើការជាមួយធនាគារ ដើម្បីបង្កើតវិធីសាស្ដ្របែងចែកភាគហ៊ុន ដែលផ្ដល់អាទិភាពដល់វិនិយោគិនរូបវន្តបុគ្គលដែលទិញភាគហ៊ុនចំនួន ១០០០ ភាគហ៊ុន ឬតិចជាងនេះ។ ការបោះផ្សាយលក់មូលបត្រកម្មសិទ្ធិជាសាធារណៈរបស់ធនាគារ គឺជាឱកាសមាសសម្រាប់វិនិយោគិនរូបវន្តបុគ្គល ដើម្បីក្លាយជាម្ចាស់ភាគហ៊ុនរបស់ធនាគារដែលគួរឲ្យទុកចិត្ត និងមានហិរញ្ញវត្ថុដ៏រឹងមាំបំផុតនៅក្នុងប្រទេសកម្ពុជា។
បន្ទាប់ពីការយល់ព្រមជាគោលការណ៍របស់ SECC ធនាគារនេះអាចចាប់ផ្ដើមដំណើរការប៊ុកបៀលឌីងជាផ្លូវការរបស់ខ្លួន និងអញ្ជើញវិនិយោគិន និងសាធារណជនទាំងអស់ចូលរួមកំណត់ថ្លៃភាគហ៊ុននៅក្នុងរវាងចន្លោះថ្លៃចាប់ពី ១៥ ០០០ រៀលដល់ ១៧ ៤០០ រៀលក្នុង ១ ភាគហ៊ុន។ នេះបើតាមសេចក្ដីប្រកាសរបស់ធនាគារនេះ។
ថ្លៃភាគហ៊ុនចុងក្រោយនឹងត្រូវកំណត់ទៅតាមការកំណត់ថ្លៃដែលវិនិយោគិនបានដាក់នៅក្នុងដំណើរការប៊ុកបៀលឌីង ដែលនឹងប្រព្រឹត្តទៅចាប់ពីថ្ងៃទី ៣ ដល់ថ្ងៃទី ១៤ ខែមីនា ឆ្នាំ ២០២០។ បន្ទាប់ពីប៊ុកបៀលឌីង វិនិយោគិន និងសាធារណជនទាំងអស់នឹងត្រូវអញ្ជើញមកចូលរួមក្នុងដំណាក់កាលបរិវិសកម្ម ដើម្បីទិញភាគហ៊ុនរបស់ធនាគារអេស៊ីលីដាលើថ្លៃភាគហ៊ុនចុងក្រោយចាប់ពីថ្ងៃទី ២៣ ខែមីនា ដល់ថ្ងៃទី ៤ ខែមេសា ឆ្នាំ ២០២០។
លោក អ៊ិន ចាន់នី បានថ្លែងថា៖ «ដើម្បីចូលរួមក្នុងដំណាក់កាលប៊ុកបៀលឌីង និងដំណាក់កាលបរិវិសកម្ម វិនិយោគិនត្រូវមានលេខអត្តសញ្ញាណវិនិយោគិន និងគណនីជួញដូរជាមួយក្រុមហ៊ុនមូលបត្រណាមួយដែលទទួលបានអាជ្ញាប័ណ្ណពីគណៈកម្មការមូលបត្រកម្ពុជា»។
លោកបន្តថា៖ «ធនាគាររំពឹងថា នឹងចុះបញ្ជីនៅក្នុងផ្សារមូលបត្រកម្ពុជាត្រឹមចុងខែមេសា ឆ្នាំ ២០២០ នេះ។ ក្នុងនាមជាធនាគារពាណិជ្ជទី ១ ដែលនឹងត្រូវចុះបញ្ជីនៅក្នុងផ្សារមូលបត្រកម្ពុជា ធនាគារអេស៊ីលីដានឹងបម្រើជាធនាគារគំរូមួយសម្រាប់ធនាគារផ្សេងទៀតនៅក្នុងវិស័យធនាគារ និងហិរញ្ញវត្ថុដែលកំពុងស្វែងរកការប្រមូលទុនតាមរយៈការប្រើប្រាស់ទីផ្សារមូលធនកម្ពុជា»៕LA