.jpg)
អ្នកដំណើរជិះម៉ូតូកាត់មុខការិយាល័យកណ្តាលធនាគារ អេស៊ីលីដា នៅមហាវិថីព្រះមុនីវង្ស។ ហុង មិនា
ភ្នំពេញៈ ធនាគារ អេស៊ីលីដា ដែលគ្រោងចុះបញ្ជីនឹងធ្វើរ៉ូដសូ ភាគហ៊ុនរយៈពេល ៣ ថ្ងៃ ដើម្បីផ្ដល់ព័ត៌មានបន្ថែមអំពីធនាគារនេះដល់សាធារណជន និងក្រុមវិនិយោគិនដែលចង់ទិញភាគហ៊ុនរបស់ពួកគេ ខណៈធនាគារនេះត្រូវបានគេរំពឹងថានឹងឡើងផ្សារហ៊ុននៅពេលណាមួយនៅចុងត្រីមាសទី ៤ ឬដើមត្រីមាសទី ២ ឆ្នាំនេះ។
អេស៊ីលីដាជាធនាគារពាណិជ្ជកម្មដំបូងគេដែលបានទទួលការយល់ព្រមជាគោលការណ៍លើការពិនិត្យលទ្ធភាពចុះបញ្ជីមូលបត្រពីផ្សារមូលបត្រកម្ពុជា (CSX) បន្ទាប់ពីធនាគារនេះទទួលបានលិខិតផ្លូវការមួយពីធនាគារជាតិនៃកម្ពុជាកាលពីថ្ងៃទី ២៦ ខែវិច្ឆិកា។
លោកស្រី ប៊ុត ប៊ុនសីហា អនុប្រធាន និងជាប្រធានផ្នែកច្បាប់របស់ក្រុមហ៊ុន បានប្រាប់ភ្នំពេញប៉ុស្ដិ៍កាលពីម្សិលមិញថា ធនាគារនេះនឹងធ្វើរ៉ូដសូរយៈពេល ៣ ថ្ងៃនៅថ្ងៃទី ១០ ទី ១៥ និងទី ១៨ ខែមករា ដើម្បីផ្ដល់ព័ត៌មានបន្ថែមដល់ក្រុមវិនិយោគិន។
លោកស្រីថ្លែងថា៖ «រាល់ក្រុមវិនិយោគិនទាំងអស់អាចចូលរួមនៅក្នុងការធ្វើរ៉ូដសូនេះ ដូច្នេះពួកគេនឹងទទួលបានព័ត៌មានបន្ថែម និងអាចសួរពួកយើងនូវសំណួរនានាមុនពេលពួកគេធ្វើការសម្រេចចិត្តក្នុងការទិញមូលបត្ររបស់យើង។ នេះជាឱកាសដ៏ល្អដែលយើងអាចជួបជាមួយសាធារណជន និងក្រុមវិនិយោគិន»។ លោកស្រីបញ្ជាក់ថា៖ «វាជាពេលវេលាដ៏ល្អមួយសម្រាប់ក្រុមវិនិយោគិនក្នុងការត្រៀមខ្លួន ដើម្បីធានាថា ពួកគេទទួលបានការកំណត់អត្តសញ្ញាណវិនិយោគិន ប្រសិនបើពួកគេចង់ទិញភាគហ៊ុនរបស់យើង»។
លោកស្រី ប៊ុនសីហា ឲ្យដឹងថា បន្ទាប់ពីការធ្វើរ៉ូដសូរយៈពេល ៣ ថ្ងៃធនាគារនេះនឹងរៀបចំធ្វើការស្ទាបស្ទង់តម្លៃជាសាធារណៈ នៅពេលទទួលបានការយល់ព្រមពីគណៈកម្មការមូលបត្រកម្ពុជា (SECC)។ លោកស្រីឲ្យដឹងថា៖ «យើងសង្ឃឹមថានឹងទទួលបានការយល់ព្រមពី SECC នៅត្រីមាសទី ១ ឆ្នាំនេះ ដោយសារយើងបានដាក់ជូនឯកសារដែលចាំបាច់រួចហើយ។ បន្ទាប់ពីនោះយើងនឹងចុះបញ្ជីនៅ CSX នៅចុងត្រីមាសទី ១ ឬដើមត្រីមាសទី ២ ឆ្នាំនេះ»។
លោក ស៊ូ សុជាតិ អគ្គនាយក SECC បានប្រាប់ភ្នំពេញប៉ុស្ដិ៍កាលពីថ្ងៃអាទិត្យថា SECC នឹងបើកកិច្ចប្រជុំផ្ទៃក្នុងមួយ ដើម្បីត្រួតពិនិត្យការដាក់ពាក្យសុំរបស់ធនាគារអេស៊ីលីដា។
IPO ធនាគារអេស៊ីលីដានឹងត្រូវបានផ្សព្វផ្សាយជា « IPO របស់ប្រជាជន» ដែលលើកទឹកចិត្តដល់ក្រុមវិនិយោគិនលក់រាយ និងសាធារណជនទូទៅឲ្យចូលរួមនៅក្នុង IPO តាមសមត្ថភាពហិរញ្ញវត្ថុរបស់ពួកគេ។
លោក Han Kyung Tae នាយកគ្រប់គ្រងក្រុមហ៊ុន Yuanta Securities (Cambodia) Plc ដែលនឹងគ្រប់គ្រងគម្រោង IPO សម្រាប់ធនាគារអេស៊ីលីដា បានឲ្យដឹងថា វត្តមានរបស់ធនាគារនេះនឹងផ្ដល់ផលវិជ្ជមានលើផ្សារហ៊ុន ខណៈដែលធនាគារនេះគឺជាធនាគារមួយក្នុងចំណោមធនាគារពាណិជ្ជឈានមុខគេជាច្រើននៅក្នុងប្រទេសកម្ពុជា។
លោកថ្លែងថា៖ «យើងមានភាពរីករាយក្នុងការធ្វើជាផ្នែកមួយនៃគម្រោងដ៏ធំបែបនោះក្នុងនាមជាទីប្រឹក្សាផ្នែកហិរញ្ញវត្ថុតែមួយគត់។ ទំហំជួញដូរដែលបានជំរុញ និងការកើនឡើងចំនួនក្រុមវិនិយោគិនបណ្ដាលមកពី IPO របស់ធនាគារអេស៊ីលីដា ពិតណាស់នឹងផ្លាស់ប្តូរសម្ទុះផ្សារហ៊ុននេះ និងការផ្លាស់ប្តូរជាមូលដ្ឋាននូវទីផ្សារមូលធនកម្ពុជា ដើម្បីឈានដល់ដំណាក់កាលថ្មីមួយនៃការអភិវឌ្ឍ»។
លោកបន្តថា មូលធនីយកម្មទីផ្សារសរុបរបស់ CSX អាចកើនឡើង ៣ ដងដោយសារតែ IPO របស់ ACLEDA Bank Plc ។
SECC កាលពីឆ្នាំ ២០១៩ ឲ្យដឹងថា មូលធនីយកម្មទីផ្សារបានកើនឡើង ១៥៧ ភាគរយ ដល់ ៨០០,៣៩ លានដុល្លារ។ បច្ចុប្បន្នមានក្រុមហ៊ុន ៥ ចេញភាគហ៊ុន និងក្រុមហ៊ុន ៣ ចេញមូលបត្របំណុលដែលបានប្រមូលមូលនិធិសរុបរហូតដល់ ១៥១ លានដុល្លារ។ ចំនួនក្រុមវិនិយោគិនបានកើនឡើងដល់ ២២ ៣៣៨ នាក់ក្នុងនោះ ១៧ ភាគរយ ជាជនបរទេស។ ទំហំជួញដូរជាមធ្យមមានចំនួន ១ ៧៥០ ៥០២ ភាគហ៊ុន ក្នុង ១ ខែ ស្មើនឹង ៤២២១ ៤៩០ ដុល្លារ ក្នុង ១ ខែ៕LA
