The Phnom Penh Post Search

Search form

Logo of Phnom Penh Post newspaper Phnom Penh Post - ធនាគារ​ពិភពលោក​ជំរុញ​ឲ្យ​កម្ពុជា​កែ​លម្អ​ប្រព័ន្ធ​ដឹក​ជញ្ជូន




ធនាគារ​ពិភពលោក​ជំរុញ​ឲ្យ​កម្ពុជា​កែ​លម្អ​ប្រព័ន្ធ​ដឹក​ជញ្ជូន

ធនាគារ​ពិភពលោក​ជំរុញ​ឲ្យ​កម្ពុជា​កែ​លម្អ​ប្រព័ន្ធ​ដឹក​ជញ្ជូន

ភ្នំពេញៈ កម្ពុជា ត្រូវ​ការ​បង្កើត​កម្មវិធី​ថ្នាក់​ជាតិ​ក្នុង​ការ​សម្រួល​ដល់​វិស័យ​ដឹក​ជញ្ជូន​របស់​ខ្លួន​ដើម្បី​អាច​ធ្វើ​សមាហរណកម្ម​ក្នុង​បណ្តាញ​ផលិតកម្ម​ក្នុង​តំបន់​អាស៊ាន។ នេះ​បើ​តាម​មន្ត្រី​ជាន់​ខ្ពស់​នៃ​ធនាគារ​ពិភពលោក​នៅ​កម្ពុជា។

ថ្លែង​ក្នុង​បទ​ឧទ្ទេស​នាម​ក្នុង​អង្គ​សិក្ខាសាលា «កម្មវិធី​គោល​ថ្នាក់​ជាតិ​អំពី​ភ័ស្តុភារ​ពាណិជ្ជកម្ម» ដែល​រៀបចំ​ដោយ​ក្រសួង​ពាណិជ្ជកម្ម​កាល​ពី​ម្សិល​មិញ លោក Julian Latimer Clarke អ្នក​សេដ្ឋវិទូ​ជាន់​ខ្ពស់​របស់​ធនាគារ​ពិភពលោក​នៅ​កម្ពុជា បាន​ឲ្យ​ដឹង​ថា បើ​ទោះ​បី​មាន​ការ​វិវត្ត​ក្នុង​ប្រសិទ្ធ​ភាព​ផ្នែក​ភ័ស្តុភារ​នៅ​រយៈ​ពេល ៥​ឆ្នាំ ចុង​ក្រោយ​នេះ​ក្តី កម្ពុជា​ត្រូវ​បាន​មើល​ឃើញ​ថា នៅ​តែ​ដើរ​ក្រោយ​ប្រទេស​ជិត​ខាង​នៅ​ក្នុង​តំបន់​។

លោក​បន្ត​ថា ការ​ធ្វើ​ឲ្យ​ប្រសើរ​ឡើង​ក្នុង​ការ​បំពេញ​ឯកសារ​ពាក់​ព័ន្ធ​នឹង​ពន្ធ​គយ និង​ការ​វិនិយោគ​លើ​ហេដ្ឋា​រចនា​សម្ព័ន្ធ​នឹង​អាច​ជួយ​ឲ្យ​តម្លៃ​នៃ​ការ​បញ្ជូន​ទំនិញ​ចេញ និង​ចូល​មក​ក្នុង​កម្ពុជា​ទាប​ជាង​មុន ហើយ​ដែល​នឹង​ធ្វើ​ឲ្យ​ថ្លៃ​ប្រតិបត្តិការ​សម្រាប់​រោងចក្រ​និង​ផលិតកម្ម​ដើម្បី​នាំ​ចេញ​ថយ​ចុះ​ដែរ។

លោក​ថ្លែង​ថា៖ «ថ្លៃ​នៃ​ការ​ផលិត​គឺ​មាន​ពាក់​ព័ន្ធ​នឹង​ថ្លៃ​នៃ​ការ​បញ្ជូន។ វា​សំខាន់​ណាស់​សម្រាប់​កម្ពុជា ព្រោះ​ថា ក្រុម​ហ៊ុន​ធំៗ និង​វិនិយោគិន​បរទេស​ដែល​បណ្តាក់​ទុន​នៅ​កម្ពុជា មាន​បំណង​ផលិត​ដើម្បី​នាំ​ចេញ​ដោយ​កម្ពុជា ខុស​ពី ឥណ្ឌូនេស៊ី ដែល​ជា​ប្រទេស​មាន​ទីផ្សារ​ក្នុង​ស្រុក​ធំ»។

លោក​បន្ថែម​ថា៖ «កម្ពុជា​ដើម្បី​ក្លាយ​ជា​ទិស​ដៅ​នៃ​ការ​វិនិយោគ និង​ជា​សមាជិក​នៃ​សមាហរណកម្ម​សេដ្ឋកិច្ច​អាស៊ាន ការ​ធ្វើ​ឲ្យ​ប្រសើរ​ឡើង​វិស័យ​ភ័ស្តុភារ និង​ការ​តភ្ជាប់​ព្រំដែន​គឺជា​កត្តា​សំខាន់​សម្រាប់​ការ​អភិវឌ្ឍ​រយៈ​ពេល​មធ្យម​របស់​ខ្លួន។ នេះ​ជា​ឱកាស​សម្រាប់​កម្ពុជា ក្នុង​រង្វង់ ៣ ទៅ ៥ ឆ្នាំ​ដើម្បី​សម្រប​ខ្លួន​ទៅ​ក្នុង​បណ្តាញ​ផលិតកម្ម​នៅ​ក្នុង​តំបន់»។

លោក ស៊ុន ចាន់ថុល រដ្ឋ​មន្រ្តី​ក្រសួង​ពាណិជ្ជកម្ម បាន​ឲ្យ​ដឹង​ថា ការ​ចំណាយ​លើ​ការងារ​ភ័ស្តុភារ​នៅ​កម្ពុជា នៅ​តែ​ខ្ពស់ ហើយ​ចំណេះ​ដឹង​ក្នុង​វិស័យ​ភ័ស្តុភារ​នេះ​នៅ​មាន​កម្រិត។

លោក​បន្ត​ថា៖ «យើង​សង្កេត​ឃើញ​ថា ការ​ចំណាយ​ចំពោះ​ភ័ស្តុភារ​ពាណិជ្ជកម្ម​នៅ​មាន​កម្រិត​ខ្ពស់​បើ​ធៀប​នឹង​ប្រទេស​ជិត​ខាង។ កម្ពុជា នៅ​ជួប​ឧបសគ្គ​មួយ​ចំនួន​ធំ​ពាក់​ព័ន្ធ​នឹង​ហេដ្ឋា​រចនា​សម្ព័ន្ធ បញ្ញត្តិ​ច្បាប់ និង​បញ្ហា​ដទៃ​ទៀត​ទាក់​ទង​នឹង​ភ័ស្តុភារ​ពាណិជ្ជកម្ម​ដែល​បញ្ហា​ទាំង​នេះ​កំពុង​ប៉ះពាល់​ដល់​កិច្ច​ខិត​ខំ​ប្រឹង​ប្រែង​សម្រួល និង​ជំរុញ​ពាណិជ្ជកម្ម»។

លោក ស៊ិន ចន្ធី ប្រធាន​សមាគម​ភ្នាក់ងារ​បញ្ជូន​ទំនិញ​កម្ពុជា​ស្វាគមន៍​ដល់​ការ​ផ្ដួច​ផ្ដើម​គំនិត​ផែនការ​ភ័ស្តុភារ​ថ្នាក់​ជាតិ​នេះ។ លោក​មាន​សុទិដ្ឋិ​និយម​ថា កម្ពុជា នឹង​អាច​កាត់​បន្ថយ​ថ្លៃ​លើ​ការ​បញ្ជូន​ទំនិញ​បើ​ភាគី​ពាក់​ព័ន្ធ​សហការ​គ្នា​ដើម្បី​ដោះ​ស្រាយ​បញ្ហា​ប្រឈម​ដែល​កំពុង​កើត​មាន​ក្នុង​វិស័យ​នេះ។

លោក​បន្ត​ថា៖ «យើង​នឹង​អាច​ពង្រឹង​ប្រសិទ្ធភាព​ក្នុង​វិស័យ​ភ័ស្តុភារ​នេះ​បើ​គ្រប់​គ្នា​ក្រោក​ឡើង​រួម​គ្នា​ដោះ​ស្រាយ​បញ្ហា​ប្រឈម​នេះ។ បើ​ធៀប​នឹង​ប្រទេស​ក្នុង​តំបន់​កម្ពុជា ប្រសើរ​ជាង​ឡាវ​មួយ។ យើង​នៅ​ក្រោយ​ប្រទេស​ផ្សេង​ទៀត​នៅ​ក្នុង​តំបន់។ បើ​យើង​មិន​ចាប់​ផ្ដើម​ពេល​នេះ ក្រុម​ហ៊ុន​ដឹក​ជញ្ជូន​បរទេស​នឹង​ដណ្តើម​យក​ទីផ្សារ​នេះ»៕

អត្ថបទគួរចាប់អារម្មណ៍