The Phnom Penh Post Search

Search form




Logo of Phnom Penh Post newspaper Phnom Penh Post - ធនាគារ​អភិវឌ្ឍន៍​អាស៊ី​ព្យាករ​សេដ្ឋ​កិច្ច​កើន ៧,២%

ធនាគារ​អភិវឌ្ឍន៍​អាស៊ី​ព្យាករ​សេដ្ឋ​កិច្ច​កើន ៧,២%

ធនាគារ​អភិវឌ្ឍន៍​អាស៊ី​ព្យាករ​សេដ្ឋ​កិច្ច​កើន ៧,២%

131003_10
កសិករនៅខេត្តកំពង់ចាមកំពុងហាលស្រូវក្រោយពីការប្រមូលផល ហុង មិនា

ភ្នំពេញៈ​ ធនាគារអភិ​វឌ្ឍន៍​អាស៊ី ​(ADB​) បាន​ចេ​ញការ​ព្យាករ​កំណើន​សេដ្ឋកិច្ច​កម្ពុជា​ដោយ​រក្សា​កំណើន ៧,២ ​ភាគរយ។

ធនាគារអភិវឌ្ឍន៍​អាស៊ី​មាន​មូលដ្ឋាន​នៅ​ទីក្រុង​ម៉ានីល ប្រទេស​ហ្វីលីពីន ​បាន​និយាយ​នៅ​ក្នុងការ​កែប្រែ​ចក្ខុ​វិស័យ​អភិវឌ្ឍន៍​អាស៊ី​ឆ្នាំ ២០១៣ ចេញ​ផ្សាយ​កាល​ពី​​ម្សិល​មិញ ដែល​ជា​ការ​កែប្រែ​ឡើង​វិញ​នៃ​ចក្ខុ​វិស័យ​ចេញ​ផ្សាយ​កាល​ពី ៦​ខែ ​កន្លង​​មក​ថា៖ «រហូត​មក​ដល់​ឆ្នាំ​នេះ​ ​វិស័យ​ជា​ច្រើន​ត្រូវ​បាន​ធ្វើ​ដូច​បាន​ព្យាករ​កាល​​ពី​ខែ​មេសា»។ នៅ​ក្នុង​ឆ្នាំ ​២០១៤​ កំណើន​សេដ្ឋកិច្ច​ត្រូវ​បាន​គេ​ព្យាករ​ថា នឹង​​កើន​ឡើង​ដល់ ៧,៥ ភាគរយ ​ដោយ​សារ​តែ​ការ​ស្ទុះ​ងើប​ឡើង​វិញ​នៃ​សេដ្ឋកិច្ច​នៅ​អឺរ៉ុប និង​អាមេរិក ដែល​ជា​ទីផ្សារ​សំខាន់​របស់​កម្ពុជា។

លោក Eric Sidgwick នាយក​ប្រចាំ​ប្រទេស​​របស់ ADB ​នៅ​កម្ពុជា​បាន​និយាយ​នៅ​ក្នុង​សេច​ក្ដី​ប្រកាស​ព័ត៌មាន​កាល​ពី ម្សិល​មិញថា៖ «សេដ្ឋកិច្ច​របស់​កម្ពុជា​ត្រូវ​គេ​ព្យាករ​ថា​ នឹង​នៅ​តែ​មាន​ជោគ​ជ័យ​​ក្នុង​រយៈពេល​ពីរ​ឆ្នាំ​បន្ទាប់​ទៀត ដែល​ឆ្លុះ​បញ្ចាំង​​ពី​ការ​កែ​ទម្រង់​ជា​បន្ត​បន្ទាប់ និង​ការ​ងើប​ឡើង​វិញ​នៅ​ក្នុង​ទីផ្សារ​ពិភព​លោក​ដូច​ធម្មតា»។

ចក្ខុ ​វិស័យ​របស់ ADB ​ផ្ទុយគ្នា​នឹង​ការ​​លើក​ឡើង​ជា​ច្រើន​របស់​អ្នក​វិភាគ​ និង​មន្ដ្រី​​អំពី​ផល​ប៉ះ​ពាល់​ដល់​សេដ្ឋកិច្ច​ដោយសារ​អស្ថិរ​ភាព ក្រោយ​ការ​បោះ​ឆ្នោត។

លោក ចម ប្រសិទ្ធ​ អតីតរដ្ឋ​មន្ដ្រី​ក្រសួង​ពាណិជ្ជ​កម្ម​​បាន​លើក​​ឡើង​​កាល​ពី​ខែ​សីហា​ ថា ​ការ​ធ្វើ​បាតុកម្ម​របស់​បក្ស​ប្រឆាំង​ជំ​ទាស់​នឹង​លទ្ធផល​បោះ​ឆ្នោត​អាច​ បង្អាក់​កំណើន។

ការ​សិក្សា​នា​ពេលថ្មី​ៗ​នេះ​​​ធ្វើ​ឡើង​ដោយ​ ​ក្រុ​មហ៊ុន​ស្រាវជ្រាវ​ឥណ្ឌូ​ឆាយណា ​បង្ហាញ​​ថា​​ ទំនុក​ចិត្ត​​ក្នុង​ចំ​ណោម​​អ្នក​ដឹក​នាំ​ពា​ណិជ្ជ​កម្ម​បរទេសនៅ​កម្ពុជា​​ បាន​ធ្លាក់​ចុះ​ប្រហែ​ល​​ ៥០ ​ភាគរយ​ក្នុង​​រយៈ​ពេល​តាន​តឹង​ក្រោយ​ការ​​បោះ​ឆ្នោត​។​

លោក ​ Hiroshi Suzuki អគ្គ​នាយក​ និង​ជា​ប្រធាន​សេដ្ឋវិទូ​នៅ​វិទ្យាស្ថាន​ស្រាវជ្រាវ​ពាណិជ្ជ​​កម្ម នៅ​កម្ពុជា​បាន​និយាយ​កាល​​ពី​ម្សិល​មិញថា​៖ «​ខ្ញុំ​យល់​ព្រម​ជា​មួយ​នឹង​អ្នក​វិភាគ​របស់ ADB ស្ដី​ពី​ដំណើរ​ការ​សេដ្ឋកិច្ច​កម្ពុជា និង​អត្រា​កំណើន​ដែល​បាន​ព្យាករ។ ទាក់​ទង​នឹង​ផល​​ប៉ះពាល់​ពី​ស្ថាន​ការណ៍​នយោបាយ​ វា​មាន​ការ​ពិបាក​ក្នុង​ការ​ព្យាករ​ពី​ផល​ប៉ះ​ពាល់​លើ​ដំណើរ​ការ​​សេដ្ឋកិច្ច​នៅ​ពេល​បច្ចុប្បន្ន​នេះ»។​

លោក​បាន​បញ្ជាក់​ថា​៖ «​ក្បាល​ម៉ាស៊ីន ​៤ ​របស់​សេដ្ឋកិច្ច​កម្ពុជា​គឺ​ស្ថិត​ក្នុង​​ស្ថាន​ភាព​ល្អ​ទាំង​អស់​មាន​ ដូច​ជា​ ​ការ​នាំ​ចេញ​ ​សំណង់ ​ទេសចរណ៍​ ​និង​កសិកម្ម»។

យោងតាម ​​ចក្ខុ​វិស័យ​របស់​ ​ADB ការ​នាំចេញ​សម្លៀក​បំពាក់ និង​​ស្បែក​ជើង​ទៅ​អាមេរិក​ ​និង​សហ​ភាព​​អឺ​រ៉ុប​​​បាន​កើនឡើង​​ដល់​ ២,៣ ​ពាន់​លាន​ដុល្លារ​​ក្នុង​រយៈ​​ពេល​ ​៦ ​ខែ​​ដំបូង​បើ​​ធៀ​បទៅ​​នឹង​រយៈ​​ពេល ដូច​​គ្នា​​កាល​ពី​ឆ្នាំ​មុន​ គឺ​កើ​ន​ឡើង​ ១១,៣ ​ភាគ​រយ។ រីឯ ​ការ​នាំ​ចេញ​​អង្ករ​កើនឡើង​ទេ្វ​ដង​​ដល់​ ​១២២ ​លាន​ដុល្លារ ខ​ណៈ​ការ​អនុ​​​ម័ត​គម្រោង​សាង​សង់​​​មាន​​សរុប ​១,៩ ​ពាន់​លាន​​ដុល្លារ​​។​​

ដោយ​ឡែក ​វិស័យ​ទេសចរ​ណ៍​បាន​កើន​ឡើង​ ​១៩,១ ​ភាគរយ​ ធៀប​នឹង​រយៈ​ពេល​ដូច​​គ្នា ​កាល​ពី​​​ឆ្នាំ​មុន​ ដែល​មាន​ភ្ញៀវ​ទេសចរ​មក​ទស្សនា​ប្រទេស​កម្ពុជា​ចំនួន ២,១ លាន​​នាក់ ​ចាប់​ពី​ខែ​មករា​ ដល់ ខែ​​មិថុនា​។

ការ​ព្យាកររបស់​ ADB ពី​​វិស័យ​សេវាកម្ម​ទាំង​មូល​នឹង​កើន​​ប្រហែល​ ៧ ​ភាគរយ​នៅ​ក្នុង​ឆ្នាំ​នេះ​។ កំណើ​ន​យឺត​ដោយ​មិន​នឹកស្មា​ន​​ដល់​នៅ​​ប្រទេស​ឥណ្ឌូ​នេស៊ី​ ​ម៉ាឡេស៊ី​ និង​ថៃ​ ​កំពុង​កាត់​​បន្ថយ​​ក្នុង​ការ​ព្យាករ​ពី​ដំណើរ​ការ​​សេដ្ឋ​កិច្ច​​នៅ​​ តំបន់​អាស៊ី​អាគ្នេយ៍។​ សេដ្ឋកិច្ច​សមាជិក​ទាំង​ ១០ ​របស់​សមា​គម​​អាស៊ាន​ត្រូវ​​បាន​គេ​ព្យាករ​ថា​នឹង​កើន​ឡើង​​​ត្រឹម​ ៤,៩ ​ភាគ​រយ​ ​នៅ​ឆ្នាំ​នេះ​​ពោល គឺទាប​ជាង​ការ​ព្យាករ​កាល​ពី​ឆ្នាំ ​២០១២។

លោក Suzuki បាន​និយាយថា​៖ «​មូល​ហេតុ​មួយ​​ក្នុង​ចំណោម​មូល​ហេតុ​ជា​ច្រើន​សម្រាប់​​ភាព​ខុស​គ្នា​ជា​ មួយ​​នឹង​ប្រទេ​ស​ផ្សេងទៀត​​គឺថា ​អាមេរិក ​និង​សហភាព​អឺរ៉ុប​គឺជា​ទិសដៅ​នាំ​ចេញ​​សំខាន់​សម្រា​ប់​​កម្ពុជា​។ កម្ពុជា​នឹង​មិន​មាន​ផល​ប៉ះពាល់​​ដោយ​​ការ​​បន្ថយ​ល្បឿន​សេដ្ឋ​កិច្ច​នៅ​ក្នុង​ប្រទេស​​កំពុង​រីក​ចម្រើន​ដូចជា​ ប្រទេស​ចិន​ និង​ឥណ្ឌា​ នោះទេ​»៕PB

អត្ថបទគួរចាប់អារម្មណ៍