.jpg)
សន្និសីទព័ត៌មានរវាង ជីប ម៉ុង លែន និងធនាគារ ជីប ម៉ុង ក្រោមប្រធានបទ “លទ្ឋភាពសម្បូរបែប និង ភាពជឿជាក់” កាលពីម្សិលមិញ។ ហ្វេសប៊ុក Chip Mong Land
ភ្នំពេញៈ ធនាគារពាណិជ្ជ ជីបម៉ុង ដែលទើបបង្កើតថ្មីបានចាប់ផ្តើមដំណើរការផ្តល់កម្ចីជាលើកដំបូងកាលពីម្សិលមិញដោយផ្តោតលើកម្ចីទិញផ្ទះ ដោយសន្យាថា នឹងផ្តល់កម្ចីទិញផ្ទះក្នុងអត្រាការប្រាក់់ទាបជាងទីផ្សារ និងផ្តល់លក្ខខណ្ឌងាយស្រួល សម្រាប់រាល់អ្នកទិញផ្ទះពីក្រុមហ៊ុនបងប្អូនរបស់ខ្លួនគឺ ជីបម៉ុង លែន។
ក្រុមហ៊ុនអភិវឌ្ឍន៍អចលនទ្រព្យ ជីបម៉ុង លែន និងធនាគារពាណិជ្ជ ជីបម៉ុង ដែលសុទ្ធសឹងជាក្រុមហ៊ុនបុត្រសម្ព័ន្ធរបស់ក្រុមហ៊ុនមេគឺ ជីបម៉ុង គ្រុប កាលពីម្សិលមិញបានសម្រេចកិច្ចព្រមព្រៀងភាពជាដៃគូយុទ្ធសាស្រ្តក្នុងការផ្តល់ភាពងាយស្រួលផ្តល់ប្រាក់កម្ចី និងអត្រាការប្រាក់ទាប។
លោក វង្ស សុខាល អនុប្រធានជាន់ខ្ពស់ធនាគារ ជីបម៉ុង បានឲ្យដឹងកាលពីម្សិលមិញថា បន្ទាប់ពីធនាគារបានដាក់ឲ្យដំណើរការជាផ្លូវការកាលពីខែមករា ធនាគារនេះបានទទួលអតិថិជនដាក់ប្រាក់បញ្ញើសរុបជាង ៤ ០០០ នាក់ ដោយមានប្រាក់បញ្ញើសរុបជាង ២ លានដុល្លារ។
លោកបានបន្តថា វាជាពេលដ៏ស័ក្ដិសមនាពេលនេះ ដែលធនាគារចាប់ផ្តើមផ្តោតលើការផ្តល់កម្ចី ហើយការសហការជាមួយ ជីបម៉ុង លែន គឺជាវិធីសាស្រ្តល្អ។
លោកថ្លែងថា៖ «តាមរយៈកិច្ចសហការនេះ អ្នកទិញផ្ទះអាចទទួលកម្ចីពីយើងបានតាំងពីដំណាក់កាលទិញដំបូងដោយគ្រាន់តែមានលិខិតទិញ-លក់ ហើយអត្រាការប្រាក់គឺ ១០ ភាគរយ [ប្រចាំឆ្នាំ]»។ លោកបន្តថា៖ «បន្ទាប់មកពេលដែលពួកគាត់មានប្លង់បំបែកក្បាលដី ហើយបង្វែរប្លង់ហ្នឹងទៅជាលិខិតកម្មសិទ្ធិដែលជាប្លង់រឹង អត្រាការប្រាក់នឹងប្តូរមកនៅត្រឹម ៧,៧ ភាគរយវិញ»។
សម្រាប់អ្នកទិញដែលចាប់ផ្តើមដោយមានប្លង់រឹងស្រាប់ជាវត្ថុធានា ធនាគារ ជីបម៉ុង នឹងផ្តល់កម្ចីដោយមានអត្រាការប្រាក់ ៣,៩៩ ភាគរយក្នុង ១ ឆ្នាំសម្រាប់ឆ្នាំដំបូង និង ៧,៧ ភាគរយចាប់ពីឆ្នាំទី២ តទៅ។
លោក លាង ហេនរី អគ្គនាយកក្រុមហ៊ុន ជីបម៉ុង លែន បានលើកឡើងថា ការផ្តល់កម្ចីដែលមានលក្ខខណ្ឌពិសេសពី ធនាគារ ជីបម៉ុង សម្រាប់អចលនទ្រព្យពីជីបម៉ុងលែន នឹងអនុវត្តគ្រប់គម្រោងទាំងអស់ និងមានសុពលភាពសម្រាប់គម្រោងក្រោយៗរបស់ ជីបម៉ុង លែនផងដែរ។
លោកបានថ្លែងថា៖ «តាមរយៈកិច្ចសហការជាមួយធនាគារ ជីបម៉ុង នៅថ្ងៃនេះ ខ្ញុំជឿជាក់ថាយើងនឹងទទួលបានការគាំទ្រខ្លាំងពីអតិថិជនយើង ព្រោះពួកគាត់នឹងមានភាពងាយស្រួលក្នុងការទទួលកម្ចី និងមានអត្រាការប្រាក់ពិសេសពីធនាគារ»៕
