.jpg)
ធនាគារ ABA គឺជាគ្រឹះស្ថានហិរញ្ញវត្ថុឯកជនឈានមុខមួយរបស់កម្ពុជា និងជាបុត្រសម្ព័ន្ធរបស់ធនាគារជាតិកាណាដា មានមោទនភាពសូមប្រកាសនូវការបរិច្ចាគទឹកប្រាក់ចំនួន ១ លានដុល្លារអាមេរិក (ប្រហាក់ប្រហែល ៤ ប៊ីលានរៀល) ដើម្បីគាំទ្រកិច្ចខិតខំប្រឹងប្រែងរបស់រាជរដ្ឋាភិបាលក្នុងការទប់ស្កាត់ការរីករាលដាលវីរុសកូវីដ១៩ បង្កឡើងដោយ «ព្រឹត្តិការណ៍សហគមន៍ ២០កុម្ភៈ»។
សំណើរបស់ធនាគារក្នុងការស្ម័គ្រចិត្តបរិច្ចាគទឹកប្រាក់នេះ ត្រូវបានសម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្ដល់ការពិចារណាដ៏ខ្ពង់ខ្ពស់ ព្រមទាំងទទួលយកជាមួយការថ្លែងអំណរគុណចំពោះធនាគារផងដែរ។ ក្នុងលិខិតថ្លែងអំណរគុណធនាគារ ABA សម្តេចមានប្រសាសន៍ថា៖ «ក្នុងនាមរាជរដ្ឋាភិបាល និងប្រជាជនកម្ពុជា ខ្ញុំពិតជាមានសេចក្តីសោមនស្ស និងសូមថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំធនាគារ ABA ដែលបានជួយឧបត្ថម្ភនូវថវិកាចំនួន ១ ០០០ ០០០ (មួយលាន) ដុល្លារអាមេរិក ដល់រាជរដ្ឋាភិបាលសម្រាប់ទ្រទ្រង់ដល់ការប្រយុទ្ធប្រឆាំងនឹងជំងឺកូវីដ១៩ ដែលកើតឡើងនៅក្នុងព្រឹត្តិការណ៍សហគមន៍ ២០កុម្ភៈ និងបានកំពុងរីករាលដាលនាពេលបច្ចុប្បន្ននេះ។ ខ្ញុំសូមសម្តែងការកោតសរសើរដោយស្មោះនូវទឹកចិត្តដ៏សប្បុរស របស់ថ្នាក់ដឹកនាំធនាគារ ABA»។
លោក Askhat Azhikhanov នាយកប្រតិបត្តិធនាគារ ABA មានប្រសាសន៍ថា៖ «ជាផ្នែកដ៏សកម្មមួយនៃសង្គមធុរកិច្ចកម្ពុជា យើងខ្ញុំនៅធនាគារ ABA គាំទ្រដល់កិច្ចប្រឹងប្រែងរបស់រាជរដ្ឋាភិបាលក្នុងការការពារសុខុមាលភាពរបស់ប្រជាជនកម្ពុជា ជាពិសេសនៅអំឡុងពេលរីករាលដាលវីរុសកូវីដ១៩។ ហើយយើងខ្ញុំពិតជាមានកិត្តិយសណាស់ដែលចូលរួមវិភាគទាន ដើម្បីជាកម្លាំងបន្ថែមដល់ការបន្តប្រយុទ្ធប្រឆាំងនឹងការរីករាលដាលនៃវីរុសនេះ ហើយយើងខ្ញុំនឹងបន្តជួយដល់សហគមន៍នាពេលអនាគតថែមទៀត»។
លោក Askhat Azhikhanov មានប្រសាសន៍បន្ថែមថា៖ «ក្រៅពីជំនួយផ្នែកហិរញ្ញវត្ថុ ធនាគារបង្ហាញពីការប្តេជ្ញាចិត្តចំពោះអតិថិជនរបស់ខ្លួនតាមរយៈដំណោះស្រាយស្វ័យសេវាធនាគារ និងឌីជីថលដ៏ទំនើបដែលគាំទ្រអតិថិជនធ្វើឱ្យពួកគាត់ទទួលបានជីវភាពហិរញ្ញវត្ថុពេញលេញនៅអំឡុងពេលការរីករាលដាលវីរុស និងទោះបីជាស្ថិតក្នុងគ្រាបិទខ្ទប់ក៏ដោយ»។
ដោយអនុវត្តតាមបេសកកម្ម និងគុណតម្លៃសាជីវកម្មរបស់ខ្លួន ធនាគារ ABA ប្តេជ្ញាចិត្តគាំទ្រនូវគំនិតផ្តួចផ្តើមដែលមានគោលបំណងប្រយុទ្ធប្រឆាំងនឹងវីរុសកូវីដ១៩។ ចាប់តាំងពីពេលចាប់ផ្តើមនៃការរីករាលដាលវីរុសនៅក្នុងប្រទេសកម្ពុជា ធនាគារ ABA បានរៀបចំយុទ្ធនាការរៃអង្គាសប្រាក់ និងបរិច្ចាគថវិកាតាមរយៈគំនិតផ្តួចផ្តើមរបស់ធនាគារជាតិនៃកម្ពុជា និងសមាគមធនាគារនៅកម្ពុជា។
បន្ថែមលើការគាំទ្រផ្នែកថវិកា កម្មវិធី ABA Mobile ដ៏ទំនើបរបស់ធនាគារត្រូវបានប្រើប្រាស់ជាឧបករណ៍សម្រាប់រៃអង្គាសប្រាក់នៅក្នុងគំនិតផ្តួចផ្តើមរបស់សម្ដេចនាយករដ្ឋមន្ត្រីដើម្បីទិញវ៉ាក់សាំងការពារវីរុសកូវីដ១៩ ផងដែរ។
អំពីធនាគារ ABA៖
ធនាគារ ABA គឺជាគ្រឹះស្ថានហិរញ្ញវត្ថុឯកជនឈានមុខមួយរបស់កម្ពុជា។ គិតត្រឹមថ្ងៃទី៣១ ខែមីនា ឆ្នាំ ២០២១ ធនាគារគ្រប់គ្រងទ្រព្យសកម្មសរុបចំនួន ៦,៦ប៊ីលានដុល្លារអាមេរិក។ ជាមួយសាខាចំនួន ៧៩ម៉ាស៊ីនស្វ័យសេវាជាង ៦០០ ទូទាំងប្រទេស សេវាធនាគារអនឡាញ និងធនាគារតាមទូរស័ព្ទឈានមុខគេ ធ្វើឱ្យធនាគារ ABA អាចបម្រើអតិថិជនបានកាន់តែច្រើនឡើងៗជាមួយសេវាហិរញ្ញវត្ថុដ៏ទំនើបសម្បូរបែបនេះ។ សម្រាប់ព័ត៌មានបន្ថែម សូមចូលទៅកាន់ www.ababank.com។
ធនាគារ ABA គឺជាបុត្រសម្ព័ន្ធរបស់ធនាគារជាតិកាណាដា ដែលជាគ្រឹះស្ថានហិរញ្ញវត្ថុមួយ មានទ្រព្យសកម្មជាង ២៧៣ប៊ីលានដុល្លារអាមេរិក គិតត្រឹមថ្ងៃទី៣១ ខែមករា ឆ្នាំ២០២១។ ដោយមានស្នាក់ការកណ្តាលស្ថិតនៅទីក្រុងម៉ុងរ៉េអាល់ ធនាគារជាតិកាណាដា បានពង្រីកសាខានៅស្ទើរតែគ្រប់ខេត្ត នៃប្រទេសជាមួយនឹងអតិថិជនក្នុងដៃ ២,៧លាននាក់។ ជាគ្រឹះស្ថានហិរញ្ញវត្ថុធំជាងគេលំដាប់ទី៦ ក្នុងប្រទេសកាណាដា និងនាំមុខគេនៅទីក្រុងកេប៊ិច ធនាគារជាតិកាណាដា ជាជម្រើសនៃបណ្ដាសហគ្រាសធុនតុច និងមធ្យមនានានៅទីនោះ។ សម្រាប់ព័ត៌មានបន្ថែម សូមចូលទៅកាន់ www.nbc.ca។
