ភ្នំពេញៈ ធនាគារស៊ី អាយ អឹម ប៊ី ភីអិលស៊ី(CIMB) បានប្រកាសកាលពីចុងសប្តាហ៍មុនថានឹងបង្កើនទំហំកម្ចីទិញផ្ទះដល់អតិថិជនឲ្យបានធំជាងមុនពីចំនួន៧០ភាគរយនៃតម្លៃផ្ទះដល់៨០ភាគរយ។
ការពង្រីកទំហំកម្ចីទៅលើសេវាកម្មប្រាក់កម្ចីដែលមានរយៈពេលវែងនាពេលនេះអាចជាសញ្ញាបង្ហាញថាធនាគារមានការជឿទុកចិត្តពីស្ថិរភាពសង្គម និង បង្ហាញពីលទ្ធភាពរបស់ធនាគារក្នុងការផ្តល់ជូនសេវាហិរញ្ញវត្ថុ ដល់សាធារណជនឲ្យកាន់តែទូលំទូលាយ។ នេះបើយោងតាមតំណាងធនាគារCIMB។
អ្នកស្រីហេងធីតា នាយកហិរញ្ញវត្ថុរបស់ធនាគារ CIMB មានប្រសាសន៍ថា៖«ក្នុងស្ថានភាពសេដ្ឋកិច្ចបច្ចុប្បន្នយើងបានទទួលការសាកសួរពីសំណាក់អតិថិជនជាច្រើនដែលត្រូវការឥណទានសម្រាប់ទិញផ្ទះដែលស័ក្តិសមនឹងតម្រូវការហិរញ្ញវត្ថុរបស់គាត់ផ្សេងៗគ្នា។ ដូច្នេះហើយទើបយើងបង្កើតទំហំឥណទានសម្រាប់ទិញផ្ទះ»។
ស្ថានភាពវិស័យធនាគារកម្ពុជាហាក់មិនទទួលសញ្ញាអវិជ្ជមានណាមួយទាក់ទងនឹងព្រឹត្តិការណ៍បោះឆ្នោតទេមកដល់ពេលនេះបើទោះបីក្រោយការបោះឆ្នោតភ្លាមមានភាពជ្រួលច្របល់រយៈពេលខ្លីដែលនាំទៅការដកលុយជាច្រើនលានដុល្លារពីម៉ាស៊ីនអេធីអឹមក្តី។
កាលពីយប់ថ្ងៃទី២៨ កក្កដាក្រោយការបោះឆ្នោតមានមនុស្សជាច្រើនបានតម្រង់ជួរគ្នាដើម្បីដកប្រាក់ពីម៉ាស៊ីនអេ ធី អឹម តាមធនាគារ។ បើយោងតាមទីភ្នាក់ងារវាយតម្លៃហានិភ័យហិរញ្ញវត្ថុStandard & Poor បានឲ្យដឹងថាទឹកប្រាក់ប្រមាណ៤ លានដុល្លារត្រូវបានដកចេញពីម៉ាស៊ីនATM របស់ធនាគារអេស៊ីលីដានៅថ្ងៃនោះ។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានអះអាងថាស្ថានភាពផ្តល់កម្ចី និងដាក់ប្រាក់បញ្ញើសន្សំនៅអេស៊ីលីដាកំពុងមានដំណើរល្អជាធម្មតា។ ប៉ុន្តែលោកបញ្ជាក់ថាកម្ចីខ្នាតធំនិងជាប្រភេទកម្ចីរយៈពេលវែងដូចជាកម្ចីទិញផ្ទះហាក់មានសន្ទុះយឺតជាងពេលមុន។
លោកបន្តថា៖«យើងនៅតែបន្តផ្តល់ជូនសេវាដូចកាលពីមុនតែអតិថិជនមួយចំនួនដែលមានបំណងទទួលកម្ចីដើម្បីទិញផ្ទះអាចសម្រេចចិត្តពន្យារពេលមួយរយៈសិន។ ពួកគេអាចចាំមើលបន្តិចសិនរហូតដល់ស្ថានភាពកាន់តែល្អ»៕
