.jpg)
អ្នកដំណើរដើរកាត់មុខធនាគារ Maybank នៅទីក្រុងគូឡាឡាំពួកន្លងមក។ AFP
ភ្នំពេញៈ ធនាគារ Maybank ដែលមានមូលដ្ឋាននៅប្រទេស ម៉ាឡេស៊ី នឹងផ្ដោតកាន់តែខ្លាំងលើប្រតិបត្តិការរបស់ខ្លួននៅក្នុងប្រទេសមួយចំនួននៅក្នុងតំបន់ ដែលរួមទាំងប្រទេស កម្ពុជា ផងដែរ។ នេះបើយោងតាមប្រធានយុទ្ធសាស្ដ្ររបស់ក្រុមហ៊ុន Maybank Group ក្នុងបទសម្ភាសជាមួយសារព័ត៌មាន The Star របស់ម៉ាឡេស៊ី។
លោក Michael Foong ដែលជាអគ្គនាយកទទួលបន្ទុកពាណិជ្ជកម្មអន្តរជាតិរបស់ធនាគារនេះផងនោះបានប្រាប់កាសែត The Star ថា ក្រុមហ៊ុននេះនឹងផ្ដោតលើបណ្ដាប្រទេសសំខាន់ៗ ៣ និងអនុវត្តគំនិតផ្តួចផ្ដើមផ្សេងៗ ដើម្បីឲ្យមានវត្តមានពាណិជ្ជកម្មអន្តរជាតិកាន់តែរឹងមាំ។
លោកថ្លែងថា៖ «ការផ្ដោតរបស់យើងនឹងធ្វើឡើងលើការធ្វើឲ្យរីកចម្រើនយីហោពាណិជ្ជសញ្ញារបស់យើងនៅក្នុងប្រទេសចិន ប្រទេសហ្វីលីពីន និងកម្ពុជា»។
លោកបន្តថាមានសក្ដានុពលច្រើននៅក្នុងប្រទេសចិនក្នុងទិដ្ឋភាពនៃលំហូរការវិនិយោគ និងពាណិជ្ជកម្មរវាងចិន និងអាស៊ាន។ លោកបានឲ្យដឹងនៅក្នុងបទសម្ភាសនោះថា៖ «យើងក៏ជាធនាគារមួយក្នុងចំណោមធនាគារបរទេសឈានមុខគេជាច្រើននៅក្នុងប្រទេសកម្ពុជាជាមួយនឹងសាខា ២១ និងមានក្រុមហ៊ុនសហគ្រាសធុនតូច និងមធ្យម (SME) ដ៏រឹងមាំដែលកំពុងរីកចម្រើនជាប្រចាំ ដើម្បីជួយពួកយើងក្នុងការប្រកួតប្រជែង»។
Maybank ដែលជាធនាគារឈានមុខគេរបស់ប្រទេសម៉ាឡេស៊ីបើគិតពីទំហំទ្រព្យសកម្មបានចាប់ផ្ដើមជាយុទ្ធសាស្ដ្រលើគំនិតផ្តួចផ្ដើមដែលនឹងជំរុញបន្ថែមទៀតដល់ពាណិជ្ជកម្មអន្តរជាតិរបស់ខ្លួន។
ពាណិជ្ជកម្មអន្តរជាតិរបស់ Maybank បច្ចុប្បន្នរួមចំណែកប្រហែល ៣៥ ភាគរយ នៃប្រាក់ចំណូលរបស់ក្រុមហ៊ុន Maybank Group។ ដោយមិនរាប់បញ្ចូលប្រទេសសិង្ហបុរី និងឥណ្ឌូនេស៊ីទីផ្សារអន្តរជាតិផ្សេងទៀតមានចំនួនប្រហែល ៦,៤ ភាគរយ នៃប្រាក់ចំណូលរបស់ក្រុមហ៊ុននេះ និង ៨,៦ ភាគរយ នៃប្រាក់ចំណេញមុនបង់ពន្ធរបស់ក្រុមហ៊ុននេះ។
លោក Foong បានឲ្យដឹងថា ទោះបីជាឧបសគ្គម៉ាក្រូសេដ្ឋកិច្ច និងសង្គ្រាមពាណិជ្ជកម្មរវាងអាមេរិក និងប្រទេសចិនក៏ដោយ ក៏ពាណិជ្ជកម្មអន្តរជាតិរបស់ក្រុមហ៊ុននេះត្រូវបានរំពឹងថានឹងទទួលបានកំណើនប្រាក់ចំណូលជាបន្តនៅឆ្នាំនេះ និងក្នុងឆ្នាំ ២០២០។
លោកថ្លែងថា៖ «ប្រទេស កម្ពុជា ក៏មានសក្ដានុពលកំណើនសេដ្ឋកិច្ចដ៏រឹងមាំផងដែរ និងបានកត់ត្រាកំណើនខ្ពស់បំផុត ២ ខ្ទង់ដ៏រឹងមាំកាលពីឆ្នាំមុន។ ល្បឿននេះត្រូវបានរំពឹងថានឹងត្រូវបានរក្សានៅឆ្នាំនេះ»។
លោកបានប្រាប់កាសែត Star ក៏មានផែនការក្នុងការផ្ដល់កម្មវិធី QRPay និងសមត្ថភាពដល់បណ្ដាប្រទេសជាច្រើនដូចជាកម្ពុជា និងហ្វីលីពីន ខណៈប្រទេសជាច្រើននៅអាស៊ានកំពុងស្វែងរកកម្មវិធីនេះជាជម្រើសជំនួសសម្រាប់ឥណទានមានមូលដ្ឋាន។
លោកថ្លែងថា៖ «Maybank នឹងនាំយកសមត្ថភាពឌីជីថលរបស់ខ្លួនពីប្រទេសម៉ាឡេស៊ីមកកាន់ទីផ្សារប្រទេស ៣ ដែលបានផ្ដោតជាសំខាន់នេះ»។ លោកបានបន្តថា៖ «នេះនឹងដាក់បញ្ចូលបច្ចេកវិទ្យាកម្មវិធីធនាគារចល័តរបស់ខ្លួនជា-ពិសេសនៅក្នុងប្រទេស ហ្វីលីពីន និងកម្ពុជា»៕LA
