.jpg)
SME រងផលប៉ះពាល់ខ្លាំងអំឡុងពេលនៃជំងឺកូវីដ១៩។ ហេង ជីវ័ន
ភ្នំពេញ: ប្រធាននាយកប្រតិបត្តិធនាគារ PPCBank ដែលគ្រប់គ្រងដោយវិនិយោគិនកូរ៉េខាងត្បូងលោក Shin Changmoo បានឱ្យដឹងកាលពីថ្ងៃព្រហស្បតិ៍ថា មូលនិធិ ៤០ ពាន់លានរៀល (ឬ ១០ លានដុល្លារ) ដែលប្រមូលបានពីការចេញជុំទី ២ នៃការចុះបញ្ជីសញ្ញាបណ្ណសាជីវកម្មរបស់ខ្លួននៅថ្ងៃសុក្រនេះនឹងយកទៅបង្កើនប្រាក់កម្ចីទៅដល់វិស័យសហគ្រាសធុនតូច និងមធ្យម (SMEs) ក្នុងស្រុកដែលរងផលប៉ះពាល់ដោយការរីករាលដាលជំងឺកូវីដ១៩ កំពុងកង្វះមូលនិធិសម្រាប់ប្រតិបត្តិការអាជីវកម្ម។
ថ្លែងនៅក្នុងសន្និសីទព័ត៌មានមុនពេលការចុះបញ្ជីជុំទី ២ កាលពីថ្ងៃព្រហស្បតិ៍ លោក Shin បានឱ្យដឹងថា បន្ទាប់ពីធនាគារលោកទទួលបានការជាវនូវសញ្ញាបណ្ណទាំងអស់សម្រាប់ការបោះផ្សាយជុំទី ២ លោកនឹងប្រើប្រាស់មូលនិធិ ៤០ ពាន់លានរៀលនេះដើម្បីគាំទ្រដល់ SMEs ក្នុងស្រុក និងផ្ដល់ដល់ពួកគេនូវផលិតផលល្អប្រសើរជាងមុនដើម្បីជំរុញកំណើនអាជីវកម្មរបស់ពួកគេក្នុងអំឡុងពេលវេលាដ៏ពិបាក ដោយសារតែវីរុសកូរ៉ូណា។
លោកបានលើកឡើងថា៖ «មូលនិធិដែលប្រមូលបាននេះនឹងត្រូវផ្ដល់ដល់ពួកយើងដោយផ្ទាល់ ហើយយើងបន្តគាំទ្រក្នុងការផ្ដល់ដល់សហគ្រាសធុនតូច និងមធ្យម ខណៈដែលពួកគេ គឺជាវិស័យមួយដែលរងផលប៉ះពាល់ខ្លាំងដោយសារការអភិវឌ្ឍមិនល្អនៅពេលថ្មីៗនេះ»។
លោកថ្លែងថា៖ «គិតត្រឹមថ្ងៃនេះ យើងបានបង្កើតមជ្ឈមណ្ឌល SME ២ ដែលទីតាំងជាយុទ្ធសាស្ដ្រនៅទូទាំងរាជធានីភ្នំពេញជាកន្លែងដែលបុគ្គលិកខិតខំយកចិត្តទុកដាក់ និងផ្ដល់ការពិគ្រោះយោបល់ស៊ីជម្រៅដល់ម្ចាស់ SME ទាំងនោះទាក់ទងនឹងការផ្ដល់កម្ចី ខណៈដែលយើងបានបង្កើតផលិតផលកាន់តែច្រើនជាមួយនឹងលក្ខខណ្ឌអនុគ្រោះសម្រាប់ SME ព្រមទាំងការផ្ដល់ព័ត៌មាន និងជំនួយលើរបៀបក្នុងការធ្វើពិពិធកម្មរបៀបទូទាត់តាមរយៈការទូទាត់ដោយមិនប្រើប្រាស់សាច់ប្រាក់»។
លោកបន្តថា ធនាគារលោកក៏មានប្រតិបត្តិការប្រកបដោយជោគជ័យនៅក្នុងផែនការផ្ដល់ហិរញ្ញប្បទានរួម SME ដែលបានដាក់ឱ្យដំណើរការដោយរដ្ឋាភិបាល ដោយសារតែយើងបញ្ចេញកម្ចីផ្សេងៗយ៉ាងរហ័សជាមួយនឹងផែនការហិរញ្ញប្បទានរួម។
លោក Shin បានថ្លែងថា៖ «កាលពីសប្ដាហ៍មុន យើងទទួលបានការយល់ព្រមពីធនាគារសហគ្រាសធុនតូច និងមធ្យម ដើម្បីបង្កើនទុនទ្វេដង ហើយការចូលរួមបែបនោះនៅក្នុងផែនការហិរញ្ញប្បទានរួមមិនបន្ថែមប្រាក់ចំណេញច្រើននោះទេ ប៉ុន្តែនៅក្នុងពេលវេលាដ៏ពិបាកដូចជាសព្វថ្ងៃនេះដែលយើងកំពុងឆ្លងកាត់ វាមានសារៈសំខាន់ណាស់សម្រាប់គ្រឹះស្ថានហិរញ្ញវត្ថុ ដូចពួកយើងក្នុងការជួយគាំទ្រអាជីវកម្មដែលរងគ្រោះខ្លាំងបំផុតនៃទីផ្សារនេះ»។
កាលពីថ្ងៃទី ៣ ខែមេសា ឆ្នាំ ២០២០ ក្រសួងសេដ្ឋកិច្ច និងហិរញ្ញវត្ថុបានចេញសេចក្ដីប្រកាសមួយស្ដីពីការដាក់ឱ្យដំណើរការគម្រោង «ហិរញ្ញប្បទានរួម SMEs »។ ការផ្ដល់មូលនិធិនេះ ស្ថិតក្រោមផែនការហិរញ្ញវត្ថុរួមមានចំនួន ១០០ លានដុល្លារអាមេរិក ដែលជាការវិនិយោគរួមរវាងធនាគារ SME Bank កម្ពុជា និងធនាគារពាណិជ្ជទាំង ២៣ ធនាគារឯកទេស ២ គ្រឹះស្ថានមីក្រូហិរញ្ញវត្ថុ (MFIs) ចំនួន ៧ ក្នុងចំណោមនោះ ៥ គឺជាគ្រឹះស្ថានហិរញ្ញវត្ថុទទួលយកប្រាក់បញ្ញើ។
លោក ស៊ាង ធីរិទ្ធិ អគ្គនាយករងនៃគណៈកម្មការមូលបត្រកម្ពុជា (SECC) បានឱ្យដឹងថា គិតត្រឹមខែតុលា ឆ្នាំ ២០២០ ទីផ្សារមូលបត្រមានក្រុមហ៊ុនចុះបញ្ជីចំនួន ៦ ក្នុង ចំណោមនោះធនាគារ PPC- Bank គឺជាស្ថាប័នទី ៤ ដែលចុះបញ្ជីសញ្ញាបណ្ណ និងជាគ្រឹះស្ថានហិរញ្ញវត្ថុទី ១ ដែលចេញសញ្ញាបណ្ណសាជីវកម្មនៅជុំទី២។
លោកលើកឡើងថា៖ «ការចេញសញ្ញាបណ្ណសាជីវកម្មរបស់ធនាគារ PPCBank រួមចំណែកដល់កំណើនសេដ្ឋកិច្ចរបស់ប្រទេសកម្ពុជា តាមរយៈការប្រមូលមូលនិធិដែលនៅសល់ទីផ្សារក្នុងស្រុក ដើម្បីប្រើប្រាស់នៅក្នុងប្រតិបត្តិការអាជីវកម្មរបស់ពួកគេ»។
លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជា (CSX) បានឱ្យដឹងថា គិតត្រឹមថ្ងៃនេះ CSX មានក្រុមហ៊ុនចុះបញ្ជីមូលបត្រសរុបចំនួន ១៣ ដែលក្នុងនោះមានក្រុមហ៊ុនចុះបញ្ជីភាគហ៊ុនចំនួន ៧ និងក្រុមហ៊ុនចុះបញ្ជីសញ្ញាបណ្ណសាជីវកម្មចំនួន ៦។ ក្នុងនោះរួមទាំងការចុះបញ្ជីដំណាក់កាលទី ២ របស់ធនាគារ PPCBank ក្រុមហ៊ុនទាំង ១៣ នេះបានប្រមូលមូលនិធិជាង ២៥៣ លានដុល្លាររួចហើយពីទីផ្សារមូលបត្រមួយនេះ។
លោកបានបញ្ជាក់ថា នៅក្នុងរយៈពេល ៩ ខែដំបូងឆ្នាំ ២០២០ CSX ទទួលបានក្រុមហ៊ុនចុះបញ្ជីមូលបត្រចំនួន ៥ ក្រុមហ៊ុន ២ ក្នុងចំណោមក្រុមហ៊ុនទាំង ៥ នោះចុះបញ្ជីមូលបត្រមូលធន និង ៣ ផ្សេងទៀតចុះបញ្ជីមូលបត្របំណុល ក្រុមហ៊ុនទាំងនេះបានប្រមូលមូលនិធិសរុបប្រហែល ៩២ លានដុល្លារ។
លោកថ្លែងថា៖ « CSX រំពឹងថា ទីផ្សារនេះនឹងក្លាយជាជម្រើសប្រកបដោយសក្ដានុពល និងគួរឱ្យទុកចិត្តសម្រាប់ការប្រមូលមូលនិធិ ការធ្វើពិពិធកម្មប្រភពមូលនិធិ និងគាំទ្រកំណើនរបស់វិស័យឯកជនព្រមទាំងការធ្វើពិពិធកម្មផលបត្រវិនិយោគសម្រាប់ក្រុមវិនិយោគិនផងដែរ»៕ LA
