.jpg)
វ៉ាក់សាំងលើកដំបូងចំនួន ៦០០ ០០០ ដូស ក្នុងចំណោម ១ លានដូស ដែលបានផ្ដល់ដោយរដ្ឋាភិបាលចិន មកដល់ប្រទេសកម្ពុជា កាលពីថ្ងៃទី ៧ ខែកុម្ភៈ។ ហេង ជីវ័ន
ភ្នំពេញៈ សហគមន៍អាជីវកម្មទាំងក្នុងស្រុក និងបរទេសបានបង្ហាញនូវសុទិដ្ឋិនិយមដែលថា បរិយាកាសវិនិយោគ និងអាជីវកម្មនឹងកាន់តែមានភាពប្រសើរឡើង និងមានទំនុកចិត្ត ដោយសារតែ រដ្ឋាភិបាលចាប់ផ្ដើមចាក់វ៉ាក់សាំងប្រឆាំងនឹងជំងឺឆ្លងកូវីដ ១៩ ជាផ្លូវការចាប់ពីថ្ងៃទី ១០ ខែកុម្ភៈនេះ។
ការចាក់វ៉ាក់សាំងប្រឆាំងជំងឺកូវីដ១៩នឹងត្រូវចាប់ផ្តើមចាក់ជូនអ្នកស្ម័គ្រចិត្តដែលមានអាយុចន្លោះពី ១៨ ដល់ ៥៩ ឆ្នាំនៅតាមមន្ទីរពេទ្យដែលបានកំណត់ចំនួន ៤ នៅទីក្រុងភ្នំពេញនៅថ្ងៃនេះ។ ការចាប់ផ្ដើមចាក់វ៉ាក់សាំងនេះត្រូវបានធ្វើឡើងបន្ទាប់ពីរដ្ឋាភិបាលបានទទួលវ៉ាក់សាំងលើកដំបូងចំនួន ៦០០ ០០០ ដូស ក្នុងចំណោម ១ លានដូស ដែលបានផ្ដល់ដោយរដ្ឋាភិបាលចិន និងបានដឹកមកដល់ប្រទេសកម្ពុជាកាលពីថ្ងៃទី ៧ ខែកុម្ភៈ។
លោក លឹម ហេង អនុប្រធានសភាពាណិជ្ជកម្មកម្ពុជាបានបង្ហាញនូវការអបអរសាទរ និងការកោតសរសើរដល់វិធានការបង្ការជំងឺកូវីដ ១៩ របស់រាជរដ្ឋាភិបាល ជាពិសេសការចាប់ផ្ដើមចាក់វ៉ាក់សាំងដល់ប្រជាជន។
លោកថ្លែងថា៖ «តាំងនាមឱ្យវិស័យឯកជន ខ្ញុំពិតជាកោតសរសើរដល់កិច្ចខិតខំប្រឹងប្រែងរបស់រដ្ឋាភិបាលក្នុងការរកវ៉ាក់សាំងប្រឆាំងជំងឺកូវីដ ១៩ ចាក់ជូនប្រជាជន ទោះបីជាយើងជាប្រទេសតូចមួយក៏ដោយ យើងអាចមានវ៉ាក់សាំងសម្រាប់ប្រជាជនយើង»។
លោកបន្ថែមថា៖ «ការចាក់វ៉ាក់សាំងនេះ គឺជាអ្វីដែលជាបំណងប្រាថ្នារបស់វិស័យឯកជន ខណៈដែលការរីករាលដាលជំងឺកូវីដ១៩ កំពុងរារាំង និងធ្វើឱ្យប៉ះពាល់ដល់អាជីវកម្ម និងផលិតកម្ម។ យុទ្ធនាការផ្តល់វ៉ាក់សាំងដោយមិនគិតថ្លៃនេះ គឺជាចំណុចពិសេសមួយក្នុងការទាក់ទាញក្រុមវិនិយោគិនកាន់តែច្រើន ដែលកំពុងស្ទាក់ស្ទើរក្នុងការធ្វើដំណើររបស់ពួកគេមកប្រទេសរបស់យើង ឬវាក៏នឹងបង្កើនទំនុកចិត្តរបស់វិនិយោគិនផងដែរ»។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានឱ្យដឹងថា ការចាប់ផ្ដើមចាក់វ៉ាក់សាំងមានសារៈសំខាន់ណាស់ និងមានភាពវិជ្ជមានមិនមែនសម្រាប់បរិយាកាសប្រកបអាជីវកម្មប៉ុណ្ណោះទេ ប៉ុន្តែសម្រាប់សាធារណជនផងដែរដោយសារតែវាអាចបង្កើនសកម្មភាពសេដ្ឋកិច្ចប្រកបដោយទំនុកចិត្ត។
លោកបន្តថា៖ «ខ្ញុំរីករាយដែលបានដឹងថា រដ្ឋាភិបាលមានផែនការចាក់វ៉ាក់សាំងប្រឆាំងជំងឺកូវីដ១៩ ដល់ប្រជាជនសំខាន់ៗបំផុត ដែលរួមទាំងអ្នកសារព័ត៌មានផងដែរ បាននិងរួមបញ្ចូលគ្នា រវាងវិទ្យាសាស្ដ្រ និងជំនឿចិត្តវិទ្យាដែលធ្វើឱ្យប្រជាជនជាច្រើនមានអារម្មណ៍វិជ្ជមានលើបរិយាកាសអាជីវកម្ម និងលើកទឹកចិត្តដល់ពួកគេឱ្យធ្វើអាជីវកម្មតាមធម្មតា ព្រមទាំងជំរុញសកម្មភាពធ្វើដំណើរក្នុងស្រុក»។
លោកបានឱ្យដឹងថា ការចាប់ផ្ដើមការចាក់វ៉ាក់សាំងនេះ គឺមិនត្រឹមតែធ្វើឱ្យប្រជាពលរដ្ឋដែលភ័យខ្លាច មានអារម្មណ៍ថាធូរស្រាលនោះទេ ចំណែកឯអាជីវកម្មក៏នឹងមានសកម្មភាព ដែលរួមទាំងការធ្វើដំណើរអន្តរជាតិក៏នឹងចាប់ផ្ដើមល្អប្រសើរឡើងវិញ។
លោក លី វីរៈ អគ្គនាយករបស់សាលាអន្តរជាតិ Westview Cambodian International School ក៏បានចង្អុលបង្ហាញថា ក្នុងអំឡុងពេលការរីករាលដាលជំងឺកូវីដ១៩ ប្រទេសកម្ពុជាបានបង្ហាញថាជាប្រទេសមួយក្នុងចំណោមប្រទេសជាច្រើន ដែលបានគ្រប់គ្រងការរីករាលដាលជំងឺនេះប្រកបដោយប្រសិទ្ធភាព។
លោកថ្លែងថា៖ «នេះជាបេសកកម្មដ៏សំខាន់នៅពេលបច្ចុប្បន្នសម្រាប់រដ្ឋាភិបាលកម្ពុជាក្នុងការសម្រេចបានដោយជោគជ័យដូចជាការគ្រប់គ្រងវីរុសនេះជាដើម។ ផែនការនេះអាចបង្កើនល្បឿនការស្ទុះងើបឡើងវិញនៃសេដ្ឋកិច្ច ការស្ដារទំនុកចិត្តវិនិយោគិន នាពេលបច្ចុប្បន្ន និងទៅអនាគត ព្រមទាំងកែប្រែមុខមាត់របស់ប្រទេសឱ្យក្លាយជាកន្លែងមួយក្នុងចំណោមកន្លែងជាច្រើនដែលមានសុវត្ថិភាពបំផុតនៅលើពិភពលោក»។
លោក Anthony Galliano អគ្គនាយកក្រុមហ៊ុន Cambodia Investment Management បានឱ្យដឹងថា ផែនការរបស់រដ្ឋាភិបាលមានភាពវៃឆ្លាតយ៉ាងខ្លាំង និងភាពប៉ិនប្រសប់ មិនគ្រាន់តែជាការទប់ស្កាត់ការផ្ទុះឡើងដែលអាចកើតមានប្រកបដោយភាពជឿជាក់ និងយ៉ាងសកម្មនៅពេលមុននោះទេ ប៉ុន្តែនៅពេលនេះថែមទាំងចាក់វ៉ាក់សាំងដល់ប្រជាជនបានយ៉ាងរហ័សទៀត។
លោកលើកឡើងថា៖ «ខ្ញុំជឿជាក់ថា នៅទីបំផុតយើងអាចមើលឃើញពន្លឺ នៅត្រង់ថា ការរួមបញ្ចូលគ្នានៃកំណត់ត្រាមួយក្នុងចំណោមកំណត់ត្រាជាច្រើនដែលល្អបំផុតនៅលើពិភពលោកក្នុងការដោះស្រាយការគ្រប់គ្រងការរីករាលដាលជំងឺ និងការចាក់វ៉ាក់សាំងដល់ប្រជាជនបានយ៉ាងរហ័ស ដែលអាចធ្វើឱ្យមានការត្រួតពិនិត្យការបើកដំណើរការតាមព្រំដែនកាន់តែឆាប់ជាងបណ្ដាប្រទេសផ្សេងៗទៀត»។
សេដ្ឋកិច្ចរបស់ប្រទេសកម្ពុជាត្រូវបានរំពឹងថា នឹងស្ទុះងើបឡើងវិញ ៤ ភាគរយក្នុងឆ្នាំ ២០២១ បន្ទាប់ពីការធ្លាក់ចុះខ្លាំងរហូត ដក ៣,១ ភាគរយកាលពីឆ្នាំមុន ដោយសារតែផលប៉ះពាល់ដោយសារតែជំងឺកូវីដ ១៩។ នេះបើយោងតាមការព្យាករបានពីក្រសួងសេដ្ឋកិច្ច និងហិរញ្ញវត្ថុក្នុងខែមករា។
កាលពីថ្ងៃទី ១ ខែកុម្ភៈ លោកនាយករដ្ឋមន្ត្រី ហ៊ុន សែន បានថ្លែងថា ប្រទេសកម្ពុជា បានស្វែងរកជំនួយពីបណ្ដាប្រទេសជាមិត្ត និងដៃគូអភិវឌ្ឍន៍នានា ដើម្បីបម្រុងទុកវ៉ាក់សាំង ២០ លានដូស ដើម្បីចាក់ជូនប្រជាពលរដ្ឋ ១០ លាននាក់។ ប្រទេសកម្ពុជា បានទទួលការសន្យាផ្ដល់វ៉ាក់សាំងចំនួន ១១ លានដូសរួចហើយមកទល់ពេលនេះ៕LA
