.jpg)
បុគ្គលិកអគ្គិសនី កំពុងឡើងតបណ្តាញអគ្គិសនីនៅក្នុងទីក្រុងភ្នំពេញនាពេលកន្លងមក។ ហេង ជីវ័ន
ភ្នំពេញៈ កម្ពុជាបានចុះកិច្ចព្រមព្រៀងទិញម៉ាស៊ីនភ្លើងដែលអាចផលិតថាមពលអគ្គិសនីរហូតដល់ ២០០ មេហ្គាវ៉ាត់ពីប្រទេស ហ្វាំងឡង់។ នេះបើតាមទំព័រហ្វេសប៊ុកផ្លូវការរបស់លោក ហ៊ុន សែន។
លោក ហ៊ុន សែន នាយករដ្ឋមន្ត្រីកម្ពុជា បានថ្លែងថា ការបញ្ជាទិញម៉ាស៊ីនភ្លើងពីក្រុមហ៊ុនហ្វាំងឡង់អាចផលិតថាមពលអគ្គិសនី ២០០ មេហ្គាវ៉ាត់ ដោយអាចជួយបំពេញតម្រូវការខ្វះខាតអគ្គិសនីកម្ពុជាបានមួយកម្រិត។
ការចុះកិច្ចព្រមព្រៀងនេះធ្វើឡើង ក្នុងជំនួបពិភាក្សាជាមួយលោក វិល ស្គីនណារី(Ville Skinnari ) រដ្ឋមន្ត្រីសហប្រតិបត្តិការអភិវឌ្ឍន៍ និងពាណិជ្ជកម្មអន្តរជាតិប្រទេស ហ្វាំងឡង់ កាលពីថ្ងៃទី ៣ កក្កដា ក្រោយពីកិច្ចប្រជុំត្រួតពិនិត្យឡើងវិញជាសកលលើជំនួយសម្រាប់ពាណិជ្ជកម្ម ឆ្នាំ ២០១៩ របស់អង្គការពាណិជ្ជកម្មពិភពលោក (WTO) នៅទីក្រុងហ្ស៊ឺណែវ ប្រទេស ស្វ៊ីស។
លោក ហ៊ុន សែន បានថ្លែងថា៖ «[កិច្ចព្រមព្រៀងទិញលក់] ម៉ាស៊ីនភ្លើងដែលអាចផលិតថាមពលរហូតដល់ ២០០ មេហ្គាវ៉ាត់នេះ ជាការធ្វើពាណិជ្ជកម្មមួយដ៏សំខាន់ ដោយសារកន្លងទៅកម្ពុជាខ្វះអគ្គិសនី។ កម្ពុជាចង់ធ្វើយ៉ាងណាឲ្យម៉ាស៊ីនភ្លើងមកដល់កម្ពុជាឲ្យបានឆាប់»។
កាលពីខែមិថុនា រដ្ឋាភិបាលកម្ពុជាបានអនុម័តក្នុងការទិញម៉ាស៊ីនភ្លើង ២ ពីប្រទេស អាល្លឺម៉ង់ និងប្រទេស ហ្វាំងឡង់ ដែលម៉ាស៊ីននីមួយៗមានសមត្ថភាព ២០០ មេហ្គាវ៉ាត់។
បន្ទាប់ពីការអនុម័តនេះ អគ្គិសនីកម្ពុជា (EdC) បានចុះកិច្ចព្រមព្រៀងជាមួយក្រុមហ៊ុនចិន ២ កាលពីខែមុន ដើម្បីសាងសង់រោងចក្រថាមពលដំណើរការដោយប្រេង និងឧស្ម័នធម្មជាតិ នៅឃុំកោះរះ ស្រុកល្វាឯម ខេត្តកណ្ដាលដែលមានតម្លៃ ៣៨០ លានដុល្លារ។
ក្រុមហ៊ុន CGGC-Un Power នឹងសាងសង់រោងចក្រថាមពលសម្រាប់ម៉ាស៊ីនដែលនាំចូលពីហ្វាំងឡង់ Finnish Wartsila ដែលមានសមត្ថភាព ២០០ មេហ្គាវ៉ាត់ ហើយក្រុមហ៊ុន China National Heavy Machinery Corporation ដំឡើងរោងចក្រសម្រាប់ម៉ាស៊ីនដែលទិញពីក្រុមហ៊ុន MAN Energy Solutions របស់ប្រទេស អាល្លឺម៉ង់។
គម្រោងទាំងមូលនឹងមានតម្លៃ ៣៨០ លានដុល្លារ ក្នុងនោះ ៣០០ លានដុល្លារ ផ្ដល់ដោយរដ្ឋាភិបាល និងទឹកប្រាក់នៅសល់បានមកពី EdC។
EdC បានឲ្យដឹងថា ទឹកប្រាក់ប្រហែល ៣៥៥ លានដុល្លារ នឹងត្រូវបានលៃទុកសម្រាប់ការសាងសង់រោងចក្រ និង ២៥ លានដុល្លារ សម្រាប់ហេដ្ឋារចនាសម្ព័ន្ធផ្សេងទៀត។
ក្នុងជំនួបនេះផងដែរ លោក ហ៊ុន សែន ក៏ថ្លែងស្នើសុំឲ្យប្រទេស ហ្វាំងឡង់ ជួយទិញអង្ករកម្ពុជា ក្រោយពីសហគមន៍អឺរ៉ុបបានសម្រចយកពន្ធលើអង្ករកម្ពុជា។ លោក ហ៊ុន សែន ថ្លែងប្រាប់រដ្ឋមន្ត្រីហ្វាំងឡង់ថា ការយកពន្ធលើអង្ករកម្ពុជាជារឿងអយុត្តិធម៌។
សហភាពអឺរ៉ុប កាលពីខែ មករា ឆ្នាំ ២០១៩ បានសម្រេចយកពន្ធលើការនាំចូលអង្កររបស់កម្ពុជា ដោយអះអាងថា អង្កររួចពន្ធពីកម្ពុជាបានធ្វើឲ្យខូចខាតទីផ្សារនៃរដ្ឋសមាជិករបស់ខ្លួន ក្រោយពីមានបណ្តឹងពីប្រទេសអ៊ីតាលី និងអេស្ប៉ាញ៕LA
