.jpg)
សកម្មភាពកម្មករអូសទំនិញតាមរទេះពីថៃមកកម្ពុជានៅច្រកព្រំដែនអន្តរជាតិកន្លងមក។ រូបថត ភ្នំពេញ ប៉ុស្តិ៍
ភ្នំពេញៈ លោកនាយករដ្ឋមន្ដ្រី ហ៊ុន សែន កាលពីថ្ងៃពុធបានឲ្យដឹងថា ប្រទេសកម្ពុជានៅតែធ្វើការផ្លាស់ប្តូរពាណិជ្ជកម្មឆ្លងកាត់ព្រំដែនជាមួយប្រទេសជិតខាង ទោះបីជាច្រកទ្វារព្រំដែនត្រូវបានរឹតបន្តឹង និងហាមឃាត់មិនឲ្យប្រជាជនចេញចូលទៅវិញទៅមកក៏ដោយ។
ការលើកឡើងរបស់លោកនាយករដ្ឋមន្ដ្រីនឹងក្លាយជាសារដ៏ច្បាស់លាស់ដល់សាធារណជនចំពេលមានការភ័យខ្លាចថា ទំនិញប្រើប្រាស់នឹងកើនឡើង ខណៈរាល់សកម្មភាពទាំងអស់ត្រូវបានធ្វើឡើងនៅច្រកព្រំដែនជាមួយវៀតណាម ថៃ និងឡាវ កាលពីចុងសប្ដាហ៍មុន ដើម្បីប្រយុទ្ធប្រឆាំងនឹងការរីករាលដាលជំងឺកូវីដ ១៩ ដោយលើកឡើងថា ការហាមឃាត់គ្រាន់តែអនុវត្តចំពោះប្រជាជន និងប្រជាជនតែប៉ុណ្ណោះ ប៉ុន្តែមិនមែនសកម្មភាពពាណិជ្ជកម្មនោះទេ។
លោកនាយករដ្ឋមន្ដ្រី ហ៊ុន សែន ថ្លែងសំណេះសំណាលជាមួយគ្រូពេទ្យស្ម័គ្រចិត្ត ៤០០ នាក់ដើម្បីប្រយុទ្ធប្រឆាំងនឹងជំងឺកូវីដ ១៩ កាលពីថ្ងៃទី ២៥ ខែមីនា ឆ្នាំ ២០២០ នៅវិមានសន្ដិភាពថា៖ «កាលពីម្សិលមិញយើងទទួលបានប្រាក់ចំណូលប្រហែល ២ លានដុល្លារពីពន្ធគយ មកពីច្រកទ្វារអន្តរជាតិប៉ោយប៉ែត ខេត្តបន្ទាយមានជ័យជាប់ព្រំដែនថៃ។ ជាមួយគ្នានេះយើងក៏នៅតែប្រមូលប្រាក់ចំណូលលើពន្ធគយពីច្រកទ្វារព្រំដែនជាមួយប្រទេសវៀតណាម និងឡាវ ដោយសារតែយើងនៅតែធ្វើការផ្លាស់ប្តូរទំនិញទៅវិញទៅមក ប៉ុន្តែយើងគ្រាន់តែមិនអនុញ្ញាតឲ្យប្រជាជនឆ្លងកាត់ព្រំដែនតែប៉ុណ្ណោះ»។
មន្ដ្រីមួយរូបនៅស្ថានទូតវៀតណាមប្រចាំនៅប្រទេសកម្ពុជាដែលស្នើសុំមិនបញ្ចេញឈ្មោះបានប្រាប់ភ្នំពេញប៉ុស្ដិ៍កាលពីសប្ដាហ៍មុនថា ទោះបីជាវៀតណាមកំពុងពង្រឹងវិធានការឆ្លងកាត់តាមបណ្ដោយព្រំដែនដោយសារតែការរីករាលដាលជំងឺកូវីដ ១៩ ក៏ដោយ ក៏ប្រទេសទាំង ២ នៅតែផ្លាស់ប្តូរទំនិញទៅវិញទៅមកជាធម្មតា។
មន្ដ្រីនោះថ្លែងថា៖ «សកម្មភាពពាណិជ្ជកម្មនៅតែធ្វើឡើងជាធម្មតា។ ភាគីវៀតណាមនៅថ្នាក់មូលដ្ឋានដែលមានព្រំដែនជាមួយកម្ពុជានឹងសហការយ៉ាងជិតស្និទ្ធជាមួយភាគីកម្ពុជាដើម្បីធ្វើឲ្យប្រាកដថា សកម្មភាពនោះដំណើរការល្អប្រសើរ»។
មន្ដ្រីនោះបន្ថែមថា៖ «ខ្ញុំគិតថា ការធ្លាក់ចុះទំហំពាណិជ្ជកម្មទ្វេភាគីមិនអាចចៀសផុតបានទេ ដោយសារតែជំងឺនេះបង្កផលប៉ះពាល់ដ៏អាក្រក់លើប្រទេសទាំងអស់លើពិភពលោកមិនគ្រាន់តែប្រទេសវៀតណាម ឬកម្ពុជានោះទេ»។
លោកបន្តថា៖ «ប៉ុន្តែភាគីវៀតណាមបានរៀបចំផែនការលើកកម្ពស់ពាណិជ្ជកម្មរួចហើយ ដើម្បីជំរុញកិច្ចសហប្រតិបត្តិការសេដ្ឋកិច្ចរបស់យើង បន្ទាប់ពីជំងឺនេះមានភាពធូរស្រាល។ ដូច្នេះសូមជឿជាក់ថា កិច្ចសហប្រតិបត្តិការសេដ្ឋកិច្ចរបស់យើងនឹងស្ទុះងើបឡើងវិញក្នុងពេលឆាប់ៗ»។
លោក គីម ហួត ប្រធានមន្ទីរពាណិជ្ជកម្មខេត្តបាត់ដំបងបានប្រាប់ភ្នំពេញប៉ុស្ដិ៍កាលពីថ្ងៃចន្ទថា ការបិទច្រកព្រំដែននៅពេលនេះមានផលប៉ះពាល់តិចតួចដល់កសិករនៅខេត្តបាត់ដំបង ដោយសារតែការប្រមូលផលទាំងអស់ជិតបញ្ចប់ទៅហើយ។ ជាមួយគ្នានេះដែរព័ត៌មានការបិទច្រកព្រំដែនមួយចំនួនដែលចាប់ផ្ដើមកាលពីថ្ងៃទី ១៨ ដែលធ្វើឲ្យកសិករពន្យារពេលការប្រមូលផលរបស់ពួកគេ។
លោកលើកឡើងថា៖ «ខ្ញុំមិនគិតថា មានបញ្ហាសម្រាប់ផលិតផលកសិកម្មកម្ពុជាក្នុងការនាំចេញទៅប្រទេសថៃនោះទេ ប៉ុន្តែអ្វីជាបញ្ហាគឺថា ការនាំចូលផលិតផលពីប្រទេសថៃមកកម្ពុជាអាចមានតម្លៃកាន់តែខ្ពស់ ដោយសារតែការដឹកជញ្ជូនអាចចំណាយខ្ពស់»។
ប្រទេសកម្ពុជា និងថៃបានយល់ព្រមក្នុងការជំរុញពាណិជ្ជកម្មឆ្លងកាត់ព្រំដែនដល់ ១៥ ពាន់លានដុល្លារត្រឹមចុងឆ្នាំនេះ ខណៈប្រទេសវៀតណាមនឹងជំរុញឲ្យដល់ជាង ៥ ពាន់លានដុល្លារ៕LA
