សិង្ហបុរីៈ នាយករដ្ឋមន្ដ្រីសិង្ហបុរី នៅថ្ងៃចន្ទនេះ បានអំពាវនាវដោយអារម្មណ៍ជ្រាលជ្រៅមួយឲ្យមានការបើកចំហទីផ្សារ និងបានរំឭកថា «សម្ពាធនយោបាយ» កំពុងធ្វើឲ្យប្រទេសនានាបែកបាក់គ្នា ក្នុងគ្រាដែលការវាយប្រហារលើកិច្ចគាំពារនិយមកំពុងកើនឡើង។
ថ្លែងនៅវេទិកាពាណិជ្ជកម្មមួយមុនកិច្ចប្រជុំអាស៊ាននៅសប្ដាហ៍នេះ លោក លី ស៊ានឡុង នាយករដ្ឋមន្ដ្រីប្រទេសសិង្ហបុរី បានអំពាវនាវដល់ក្រុមហ៊ុននៅអាស៊ីអាគ្នេយ៍ឲ្យវិនិយោគកាន់តែច្រើនលើទីផ្សាររបស់គ្នាទៅវិញទៅមក និងមានការបើកចំហបន្ថែមទៀតឲ្យមានការប្រកួតប្រជែងពីបរទេស។
លោកថ្លែងថា៖ «ការធ្វើសមាហរណកម្ម និងការបើកចំហទីផ្សាររបស់យើងកាន់តែច្រើន ហើយច្បាប់ និងបរិយាកាសពាណិជ្ជកម្មរបស់យើងកាន់តែមានការអនុគ្រោះដល់ការវិនិយោគបរទេស កំណើននឹងកាន់តែកើនឡើង ហើយយើងនឹងទទួលបានអត្ថប្រយោជន៍កាន់តែច្រើនដែរ»។
លោកបានថ្លែងថា សមាគមប្រជាជាតិអាស៊ាន (ASEAN) ១០ ប្រទេស «មានសក្ដានុពលធំបំផុត ប៉ុន្តែសម្រេចបានពេញលេញឬយ៉ាងណានោះ វាពឹងផ្អែកលើថា តើយើងជ្រើសរើសការធ្វើសមាហរណកម្មកាន់តែខ្លាំងឬយ៉ាងណា ហើយធ្វើការងារឆ្ពោះទៅទិសដៅនេះនៅក្នុងពិភពលោកមួយដែលពហុភាគីកំពុងឈ្លោះគ្នានោះ ស្ថិតក្រោមសម្ពាធនយោបាយ»។
ជម្លោះពាណិជ្ជកម្មអាមេរិក និងចិន កំពុងធ្វើឲ្យមានផលប៉ះពាល់ហួសពីប្រទេសទាំងពីរដែលមានសេដ្ឋកិច្ចឈានមុខគេលើពិភពលោក។
បណ្ដាប្រទេសអាស៊ីដែលពឹងផ្អែកលើការនាំចេញមួយចំនួន បានមើលឃើញសកម្មភាពផលិតកម្មចុះខ្សោយរួចទៅហើយ ខណៈដែលលោកនាយករដ្ឋមន្ដ្រីរបស់ប្រទេសិង្ហបុរីរូបនេះ បានព្រមានកាលពីដើមឆ្នាំនេះថា សង្គ្រាមពាណិជ្ជកម្មមួយនឹងមាន «ផលប៉ះពាល់អវិជ្ជមានដ៏ធំមួយ» លើសិង្ហបុរីដែលជាមជ្ឈមណ្ឌលហិរញ្ញវត្ថុមួយដែលពឹងផ្អែកយ៉ាងខ្លាំងលើពាណិជ្ជកម្មអន្តរជាតិនេះ៕ AFP/LA