The Phnom Penh Post Search

Search form




Logo of Phnom Penh Post newspaper Phnom Penh Post - នាយក​រដ្ឋមន្ត្រី៖ កម្ពុជា​ចំណាយ $៣០០ ​លាន​​ក្នុង ​១ ​ខែ​

នាយក​រដ្ឋមន្ត្រី៖ កម្ពុជា​ចំណាយ $៣០០ ​លាន​​ក្នុង ​១ ​ខែ​

Content image - Phnom Penh Post
សកម្មភាព​នៃ​ការ​កសាង​ផ្លូវ​នៅ​ក្នុង​ខេត្ត​ត្បូងឃ្មុំ នា​ពេល​កន្លង​មក​។ រូបថត ក្រសួង​សាធារណការ និង​ដឹក​ជញ្ជូន

នាយក​រដ្ឋមន្ត្រី៖ កម្ពុជា​ចំណាយ $៣០០ ​លាន​​ក្នុង ​១ ​ខែ​

ភ្នំពេញៈ លោក​នាយក​រដ្ឋមន្ត្រី ​ហ៊ុន សែន បាន​ឲ្យ​ដឹង​ថា រដ្ឋាភិបាល​បាន​ចំណាយ​ទឹក​ប្រាក់​ប្រមាណ ៣០០ ​លាន​ដុល្លារ ​ជា​រៀង​រាល់​ខែ​សម្រាប់​បើក​ប្រាក់​ខែ ការ​ជួសជុល និង​កសាង​ហេដ្ឋា​រចនា​សម្ព័ន្ធ​ផ្សេងៗ​​នៅ​ក្នុង​​ប្រទេស។

ថ្លែង​ក្នុង​ពិធី​ពិនិត្យ​ការដ្ឋាន​សាងសង់​ពហុ​កីឡដ្ឋាន​ជាតិ មរតក​ តេជោ ដែល​បាន​និង​កំពុង​ដំណើរ​ការ​សាងសង់​នៅ ខណ្ឌ​ជ្រោយ​ចង្វារ រាជធានី​ភ្នំពេញ កាល​ពី​ថ្ងៃ​ម្សិលមិញ លោក ហ៊ុន សែន បាន​ឲ្យ​ដឹង​ថា ជាមួយ​នឹង​ភាព​​ល្អ​ប្រសើរ​​លើ​គ្រប់​វិស័យ​ កំណើន​សេដ្ឋកិច្ច​កម្ពុជា​ឆ្នាំ ​២០១៩ នេះ​រំពឹង​ថា​នឹង​មាន​កំណើន ៧,១ ​ភាគរយ​។

លោក​បាន​បន្ត​ថា បច្ចុប្បន្ន​កម្ពុជា​អាច​មាន​សមត្ថភាព​រក​ចំណូល​បាន​រហូត​ដល់​ប្រមាណ​ ៥០០ ​លាន​ដុល្លារ​នៅ​ក្នុង ​១ ​ខែ​ ខណៈ​ការ​ចំណាយ​មាន​ប្រមាណ ៣០០ ​លាន​ដុល្លារ​។

លោក​អះអាង​ថា៖ ​«​១ ​ខែ ​យើង​​ចាយ​ប្រមាណ​ ៣០០ លាន​​ដុល្លារ តែ​ប្រាក់​ចំណូល​របស់​យើង មាន​លើស​ពី​ ៤០០ ​លាន​ដុល្លារ ​ក្នុង ​១ ​ខែ​ ដូច្នេះ​អតិរេក​មាន​លើស​ពី​ ១០០ ​លាន​ដុល្លារ​​ក្នុង ​១ ​ខែ​»​។

តាម​លោក​នាយក​រដ្ឋមន្ត្រី ហ៊ុន សែន ការ​ប្រមូល​ចំណូល​គយ​​ក្នុង​ខែ​កក្កដា គិត​ត្រឹម​ចុង​សប្តាហ៍​មុន (​ថ្ងៃ​សៅរ៍)​បាន​ជាង​ ​២៥០ ​លាន​ដុល្លារ។

លោក​ថ្លែង​ថា៖ «​មេ​គយ​បាន​ប្រាប់​ខ្ញុំ​ថា នៅ​សល់ ​៣ ​ថ្ងៃ​ទៀត ដោយ ​១ ​ថ្ងៃ ​គិត​ជា​មធ្យម ​១០ ​លាន​ អ៊ីចឹង​ក្នុង​ខែ​នេះ​នឹង​កើន​ដល់ ​២៨០ ​លាន​ដុល្លារ​ បូក​នឹង​ថវិកា​ពី​ពន្ធដារ​ផ្ទៃ​ក្នុង និង​ចំណូល​​មិនមែន​សារពើពន្ធ ខែ​នេះ​យើង​នឹង​មាន​ប្រាក់​ចំណូល​​ប្រមាណ ​៥០០ ​លាន​ដុល្លារ»។

ការ​បង្ហាញ​ពី​ទិន្នន័យ​លម្អិត​ពី​​ចរន្ត​ចំណូល​ និង​ចំណាយ​របស់​លោក​នាយក​រដ្ឋមន្ត្រី នៅ​ពេល​នេះ​ធ្វើ​ឡើង​បន្ទាប់​ពី​មាន​ការ​លើក​ឡើង​ពី​ការ​ដាក់​ទណ្ឌកម្ម​មក​លើ​កម្ពុជា ដូច​ជា​ច្បាប់​ស្តីពី​ប្រជាធិបតេយ្យ​កម្ពុជា​របស់​អាមេរិក និង​ការ​ប្រឈម​នឹង​ការ​ព្យួរ​ប្រព័ន្ធ​អនុគ្រោះ​ពន្ធ​ពី​សហភាព​អឺរ៉ុប​ជា​ដើម។

របាយការណ៍​របស់​ធនាគារ​ជាតិ​នៃ​កម្ពុជា (NBC) បាន​បង្ហាញ​ថា គិត​ត្រឹម​ឆមាស​ទី១ ​ឆ្នាំ​នេះ ​កម្ពុជា​មាន​ទុន​បម្រុង​អន្តរជាតិ​ ១១,១ ​ពាន់​លាន​ដុល្លារ ដែល​អាច​ធានា​ឲ្យ​ការ​នាំចូល​ទំនិញ​ និង​សេវាកម្ម​សម្រាប់​គ្រាអាសន្ន​បាន​រយៈពេល ​៤,៩ ​ខែ​។

លោក សន ជ័យ ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា បាន​ប្រាប់​ថា លោក​ពិត​ជា​ចង់​ឃើញ​មាន​ការ​ជជែក​គ្នា​ដោយ​ចំហ​ពី​ចំណូល និង​ចំណាយ​របស់​ជាតិ​ មិន​ថា​តែ​​នៅ​ក្នុង​កម្រិត​នយោបាយ​ និង​​បច្ចេកទេស​នោះ​ទេ​។ ការ​បង្ហាញ​ពី​ចំណូល​ និង​ចំណាយ ​ជា​ព័ត៌មាន​តម្លាភាព​មួយ​ដើម្បី​​ជា​មូលដ្ឋាន​សម្រាប់​ការ​ពិនិត្យ​មើល​​ទៅ​​លើ​ការ​គ្រប់គ្រង​​ និង​អាច​បញ្ចៀស​ពី​ហានិភ័យ​ផ្នែក​សេដ្ឋកិច្ច។

លោក​ថ្លែង​ថា៖ ​«ការ​បង្ហាញ​ពី​ចំណូល​ចំណាយ​ វា​មិនមែន​ជា​រឿង​ដែល​ត្រូវ​លាក់​បាំង​នោះ​ទេ​»។

លោក​បន្ត​ថា ម៉្យាង​វិញ​ទៀត​ វា​​ក៏​ជា​ឱកាស​មួយ​សម្រាប់​ការ​ផ្តល់​មតិយោបល់​ពី​តួអង្គ​ពាក់ព័ន្ធ​ដូច​ជា​សង្គម​ស៊ីវិល និង​អ្នក​ជំនាញ​សេដ្ឋកិច្ច​សម្រាប់​​ការ​អភិវឌ្ឍ​ផង​ដែរ។

លោក​លើក​​ឡើង​ថា បើ​មាន​​ឧត្តមភាព​ចំណូល​ជាង​ ១០០ ​លាន​ដុល្លារ ​នៅ​ក្នុង ​១ ​ខែ​នោះ​ កម្ពុជា​គួរ​តែ​គិតគូរ​ពី​ការ​កាត់​បន្ថយ​កម្ចី​ពី​បរទេស និង​ការ​អភិវឌ្ឍ​វិស័យ​មួយ​ចំនួន​ឲ្យ​បាន​កាន់​តែ​ច្រើន​បន្ថែម​ទៀត​។​

លោក​ថ្លែង​​ថា៖​ «​ខ្ញុំ​យល់​ថា ការ​កាត់​បន្ថយ​កម្ចី​​ពី​បរទេស គឺ​ជា​រឿង​មួយ​ដែល​នឹង​ផ្តល់​ផលប្រយោជន៍​ជា​ច្រើន​សម្រាប់​ការ​អភិវឌ្ឍ​សេដ្ឋកិច្ច​ជាតិ​»៕​ LA

អត្ថបទគួរចាប់អារម្មណ៍