ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឲ្យអ្នកវិនិយោគិនវៀតណាមមកវិនិយោគលើរោងចក្រកែច្នៃអង្ករនៅកម្ពុជា ខណៈទំហំពាណិជ្ជកម្មឈានដល់ជាង ៥ ពាន់លានដុល្លារ។
ថ្លែងក្នុងពិធីពិសារអាហារជាមួយសហគមន៍ និងធុរកិច្ចវៀតណាមនៅកម្ពុជា ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិវៀតណាមឆ្នាំ ២០២០ កាលពីថ្ងៃសុក្រលោកនាយករដ្ឋមន្ត្រីបានឲ្យដឹងថា កម្ពុជាបាននាំចេញស្រូវទៅប្រទេសវៀតណាមចន្លោះពី ១ លានតោន ទៅ ២ លានតោន ក្នុង ១ ឆ្នាំ ដែលមិនបានចុះបញ្ជីឲ្យបានត្រឹមត្រូវ។
លោកបានថ្លែងថា៖ «វៀតណាមបានជួយទិញស្រូវពីកម្ពុជាចន្លោះ ១ ទៅ ២ លានតោនក្នុង ១ ឆ្នាំ ដែលមិនបានកត់ត្រាក្នុងជើងលេខពន្ធគយនោះទេ។ មូលហេតុនេះហើយ យើងអំពាវនាវឲ្យមិត្តវៀតណាមវិនិយោគនៅកម្ពុជាលើឧស្សាហកម្មកែច្នៃដើម្បីប្រយោជន៍ដល់ប្រជាជនកម្ពុជា និងវិនិយោគិនវៀតណាម»។
លោកបន្តថា៖ «ខ្ញុំមានសុទិដ្ឋិនិយមថា អ្នកវិនិយោគិនបរទេស ជាពិសេសវៀតណាមនឹងជ្រើសរើសកម្ពុជាជាគោលដៅវិនិយោគដ៏មានសក្តានុពល និងពង្រីកអាជីវកម្មបន្ថែមទៀតដើម្បីពង្រីកទំហំពាណិជ្ជកម្មទ្វេភាគី»។
លោក ង្វៀន ថាញ់ យុង ប្រធានក្លិបធុរកិច្ចវៀតណាមនៅកម្ពុជាបានឲ្យដឹងថា ទំហំទ្វេភាគីរវាងកម្ពុជា និងវៀតណាមសម្រេចបាន ៥,២ ពាន់លានដុល្លារកាលពីឆ្នាំមុន។
លោកបន្តថា វៀតណាមជាវិនិយោគិនបរទេសធំជាងគេលំដាប់ទី ៣ នៅកម្ពុជា។ វៀតណាមមានគម្រោងវិនិយោគចំនួន ២១៤ នៅកម្ពុជាដែលមានទុនវិនិយោគសរុបជាង ៣ ពាន់លានដុល្លារ។ ក្នុងចំណោមនោះគម្រោងដែលចុះបញ្ជីប្រតិបត្តិការមានចំនួន ១៧៦ ដែលមានតម្លៃ ២,៧៧ ពាន់លានដុល្លារ។ លោកថ្លែងថា៖ «ការវិនិយោគរបស់វៀតណាមផ្តោតលើវិស័យសំខាន់ៗ រួមមានកសិកម្ម ធនាគារ ទូរគមនាគមន៍ ព័ត៌មានវិទ្យា និងឧស្សាហកម្មកែច្នៃ»។
ទិន្នន័យពីស្ថានទូតវៀតណាមនៅទីក្រុងភ្នំពេញឲ្យដឹងថាកាលពីឆ្នាំមុន វៀតណាមមានគម្រោងវិនិយោគចំនួន ២០៦ នៅកម្ពុជាជាមួយទុនចុះបញ្ជីវិនិយោគជាង ៣ ពាន់លានដុល្លារ។
ការវិនិយោគរបស់វៀតណាមបានផ្តោតលើវិស័យសំខាន់នៅកម្ពុជាគឺកសិកម្ម ដោយគ្រប់គ្រង ៧០ ភាគរយនៃទុនវិនិយោគសរុប ខណៈវិស័យហិរញ្ញវត្ថុ ធនាគារ និងធានារ៉ាប់រងមានចំនួន ៩,៤ ភាគរយ។
ក្រៅពីគម្រោងវិនិយោគទាំងនោះនៅមានគម្រោងផ្សេងទៀតដូចជា អាកាសចរណ៍ ធនធានរ៉ែ រោងចក្រឧស្សាហកម្ម ឃ្លាំងជួល ដឹកជញ្ជូន សុខភាព សំណង់ និងទេសចរណ៍ សណ្ឋាគារ អចលនទ្រព្យ និងសេវាផ្សេងទៀត។ ការវិនិយោគរបស់កម្ពុជានៅវៀតណាមមានក្នុងរង្វង់ ២១ គម្រោងជាមួយទុនវិនិយោគសរុបជិត ៦៤ លានដុល្លារ។
ប្រទេសកម្ពុជាឈរលំដាប់ទី ៥៤ ក្នុងចំណោមប្រទេសទាំង ១៣២ ដែលវិនិយោគនៅវៀតណាម៕LA