.jpg)
បុរសម្នាក់ បានលីអង្ករចេញពីកន្លែងលក់មួយ ក្នុងរាជធានីភ្នំពេញ។ ហុង មិនា
ភ្នំពេញៈ លោកនាយករដ្ឋមន្ដ្រី ហ៊ុន សែន បានឲ្យដឹងថា រដ្ឋាភិបាលនឹងចាត់វិធានការបន្ថែមដើម្បីជំរុញការនាំចេញអង្ករកម្ពុជាតាមរយៈការកាត់បន្ថយតម្លៃផលិត ដើម្បីធ្វើឲ្យមានសមត្ថភាពប្រកួតប្រជែងកាន់តែខ្លាំង។
ថ្លែងនៅក្នុងជំនួបជាមួយកម្មករកាត់ដេរនៅខេត្តកណ្ដាលកាលពីម្សិលមិញ លោកនាយករដ្ឋមន្ដ្រី ហ៊ុន សែន បានឲ្យដឹងថា ការនាំចេញអង្កររបស់កម្ពុជា មិនអាចសម្រេចបាន ១ លានតោនប្រចាំឆ្នាំនោះទេ ដោយសារតែមានការប្រកួតប្រជែងទីផ្សារខ្លាំង។
លោកនាយករដ្ឋមន្ដ្រីបានឲ្យដឹងថា រដ្ឋាភិបាលនឹងចាត់វិធានការបន្ថែមទៀតក្នុងការកាត់បន្ថយតម្លៃផលិត ដើម្បីបង្កើនសមត្ថភាពប្រកួតប្រជែងរបស់កម្ពុជាជាមួយទីផ្សារជិតខាង ដូចជាថៃ និងវៀតណាម។
ប៉ុន្តែលោកនាយករដ្ឋមន្ដ្រីបានបញ្ជាក់ថា កម្ពុជាសម្រេចបានរួចហើយនូវគោលដៅមួយនៃគោលនយោបាយរបស់រដ្ឋាភិបាល ជាប្រទេសផលិតស្រូវលើសតម្រូវការ ដែលនឹងកើនឡើងដល់ ៦ លានតោនស្រូវនៅឆ្នាំនេះ។
លោកបន្តថា៖ «យើងបានធ្វើពីប្រទេសខ្វះអង្ករបរិភោគឲ្យជាប្រទេសផលិតស្រូវសម្រាប់ការនាំចេញ ប៉ុន្តែសម្រាប់ការនាំចេញអង្គរ ១ លានតោន យើងមិនអាចសម្រេចតាមគោលដៅរបស់យើងបានទេ ដោយសារដៃគូប្រកួតប្រជែងរបស់យើងខ្លាំងៗពេកដូចជាប្រទេស ថៃ និងវៀតណាម»។
លោកនាយករដ្ឋមន្ដ្រីលើកឡើងថា ប្រទេស ថៃ អាចនាំចេញអង្ករ ៦ លានតោន និងវៀតណាម អាចនាំចេញអង្ករ ៥ លានតោនប្រចាំឆ្នាំ ដោយសារតែសមត្ថភាពដ៏រឹងមាំខ្លាំងរបស់ពួកគេ (សមត្ថភាពក្នុងការទិញសម្រាប់ការស្ដុកទុក និងការសម្ងួត ព្រមទាំងភូតគាមអនាម័យ និងអនាម័យ ហើយតម្លៃផលិតក៏ទាប) ធៀបនឹងកម្ពុជា។
លោកថ្លែងថា៖ «យើងនឹងដាក់ចេញគោលនយោបាយថ្មីៗបន្ថែមទៀតដើម្បីជំរុញវិស័យកសិកម្មដូចជាបញ្ហាតភ្ជាប់អគ្គិសនីរបស់យើងទៅកាន់តំបន់ដែលមានប្រភពទឹកដើម្បីប្រើមូទ័របូមទឹកជំនួសម៉ាស៊ីនបូមទឹកដោយប្រេងដែលមានថ្លៃដើមហួស»។
ការនាំចេញអង្កររបស់ប្រទេស កម្ពុជា ត្រូវបានមើលឃើញថាមានការប្រែប្រួលបន្តិចបន្តួចក្នុងអំឡុងរយៈពេល ៣ ឆ្នាំចុងក្រោយគិតត្រឹមឆ្នាំ ២០១៨ ខណៈវិស័យនេះនៅពេលនេះហាក់ដូចជាចូលទៅក្នុងបញ្ហាប្រឈមបន្ថែមទៀតដែលរដ្ឋាភិបាល និងវិស័យឯកជនត្រូវធ្វើការងារកាន់តែខ្លាំង ដើម្បីរក្សាវិស័យនេះមានស្ថានភាពល្អ។
បញ្ហាប្រឈមទាំងនេះនឹងផ្ដោតលើទីផ្សារសហភាពអឺរ៉ុប (EU) ខណៈប្លុកនេះបានសម្រេចយកពន្ធនាំចូលលើអង្ករកម្ពុជាដែលបានបន្ថែមលើបញ្ហាដែលមានស្រាប់ដូចជា តម្លៃផលិតកម្មខ្ពស់ និងកង្វះហេដ្ឋារចនាសម្ព័ន្ធនៅក្នុងវិស័យនេះជាដើម។
លោកនាយករដ្ឋមន្ដ្រីជំរុញឲ្យមានការសិក្សាពីការផលិតជីក្នុងស្រុក ដើម្បីទទួលបានជីតម្លៃទាបសម្រាប់ឧស្សាហកម្មស្រូវ ដើម្បីកាត់បន្ថយតម្លៃផលិត។
ក្រសួងពាក់ព័ន្ធដូចជាក្រសួងពាណិជ្ជកម្ម និងក្រសួងកសិកម្ម ចាំបាច់ត្រូវពង្រីក និងស្វែងរកទីផ្សារថ្មីៗ ខណៈកម្ពុជាមានឈ្មោះល្បីដោយសារអង្ករគុណភាពល្អ។ នេះបើយោងតាមលោក ហ៊ុន សែន។
លោក វង្ស ប៊ុនហេង អនុប្រធានសហព័ន្ធស្រូវអង្ករកម្ពុជា ស្វាគមន៍សម្រាប់វិធានការនេះ និងជឿជាក់ថា កម្ពុជានឹងសម្រេចបាន ១ លានតោន ប្រសិនបើគោលនយោបាយថ្មី នៃតម្លៃផលិតត្រូវបានអនុវត្តល្អប្រសើរ។
លោកថ្លែងថា៖ «បញ្ហារបស់យើង គឺតម្លៃផលិត បើរដ្ឋាភិបាលចាត់វិធានការបន្ថែមលើតម្លៃផលិត ខ្ញុំជឿជាក់ថា ការនាំចេញអង្កររបស់យើងនឹងសម្រេចបានតាមទិសដៅរបស់រដ្ឋាភិបាលជាមិនខាន»។
លោកបន្តថា៖ «យើងមានស្រូវដែលមានគុណភាពរួចហើយ ប្រសិនបើតម្លៃផលិតពិតជាត្រូវបានដោះស្រាយ យើងនឹងអាចប្រកួតប្រជែងជាមួយវៀតណាម និងទៅដល់ទីផ្សារថ្មីៗ»៕LA
