ភ្នំពេញៈ លោកនាយករដ្ឋមន្ដ្រី ហ៊ុន សែន បានជំរុញឲ្យមានការវិនិយោគលើការបង្កើតតំបន់សេដ្ឋកិច្ចពិសេសកាន់តែច្រើននៅតាមបណ្ដោយព្រំដែនជាមួយវៀតណាមក្នុងគោលបំណងទាក់ទាញការវិនិយោគកាន់តែច្រើនមកកម្ពុជា។
ការអំពាវនាវនេះបានធ្វើឡើងនៅក្នុងការសម្ពោធដាក់ឲ្យដំណើរការជាផ្លូវការនៃផ្សារដានៅខេត្តត្បូងឃ្មុំកាលពីថ្ងៃអង្គារ ដោយសារលោកចង់ទាក់ទាញការវិនិយោគកាន់តែច្រើនពីវៀតណាមដើម្បីផលិតសម្រាប់ការនាំចេញបន្ត។
លោកថ្លែងថា៖ «យើងត្រូវតែផ្លាស់ប្តូរព្រំដែនដែលជាកំហឹងនៃសង្គ្រាមទៅជាសន្ដិភាពសម្រាប់ពាណិជ្ជកម្ម ការវិនិយោគ សន្ដិភាព កិច្ចសហប្រតិបត្តិការ និងការអភិវឌ្ឍ»។ លោកបន្តថា៖ «យើងត្រូវតែប្រញាប់អភិវឌ្ឍនៅតាមបណ្ដោយព្រំដែនជាមួយវៀតណាម ដោយសារតែយើងមានតំបន់សេដ្ឋកិច្ចពិសេសរួចហើយនៅក្រុងបាវិត ខេត្តស្វាយរៀងដែលរោងចក្រជាច្រើនដែលបានបង្កើតឡើងហើយនៅទីនេះយើងមានតំបន់សេដ្ឋកិច្ចពិសេសត្បូងឃ្មុំថារី»។
លោកបញ្ជាក់ថា៖ «ខ្ញុំចង់ឲ្យតំបន់សេដ្ឋកិច្ចពិសេសកាន់តែច្រើនទៀតត្រូវបានបង្កើតឡើងតាមបណ្ដោយព្រំដែនកម្ពុជា និងវៀតណាម ដើម្បីទាក់ទាញក្រុមវិនិយោគិនវៀតណាមកាន់តែច្រើនព្រមទាំងក្រុមវិនិយោគិនផ្សេងទៀតសម្រាប់ការផលិតនាំចេញ។ បើយើងអាចបង្កើតបានកាន់តែច្រើនថែមទៀត យើងអាចកែច្នៃផលិតផលកសិកម្មជាទំនិញសម្រេចសម្រាប់ការនាំចេញ»។
លោក Tran Lam Tung លេខាធិការទី ២ នៅស្ថានទូតវៀតណាមប្រចាំទីក្រុងភ្នំពេញឲ្យដឹងថា គំនិតផ្តួចផ្ដើមដែលបានបង្កើតឡើងដោយលោកនាយករដ្ឋមន្ដ្រី ហ៊ុន សែន មានបំណងធ្វើឲ្យប្រសើរឡើងនូវជីវភាពរស់នៅរបស់ប្រជាជនរវាងប្រទេសទាំង ២ ព្រមទាំងធ្វើឲ្យកាន់តែប្រសើរឡើងការវិនិយោគ និងពាណិជ្ជកម្ម។
លោកបន្តថា៖ «នេះជាគំនិតផ្តួចផ្ដើមដ៏ល្អរបស់លោកនាយករដ្ឋមន្ដ្រី ហ៊ុន សែន ដោយសារតែវាច្បាស់ថាមធ្យោបាយល្អបំផុតក្នុងការការពារខ្សែក្រវាត់ព្រំដែននឹងបង្កើតការអភិវឌ្ឍច្រករបៀងសេដ្ឋកិច្ចសម្រាប់ប្រជាជន»។
លោកថ្លែងថា៖ «ជាមួយគ្នានេះដែរបើប្រជាជនរបស់ប្រទេសទាំង ២ នៅតាមព្រំដែនអាចដោះដូរទំនិញ កិច្ចសហប្រតិបត្តិការសេដ្ឋកិច្ច ព្រំដែនរបស់ប្រទេសទាំង ២ នឹងមានស្ថិរភាព សន្ដិភាពជារៀងរហូត។ តាមគំនិតរបស់ខ្ញុំ នេះគឺជាចំណុចដ៏សំខាន់មួយស្របជាមួយនឹងគោលនយោបាយឈ្នះឈ្នះរបស់លោកនាយករដ្ឋមន្ដ្រី ហ៊ុន សែន»។
បច្ចុប្បន្នកម្ពុជាមានតំបន់សេដ្ឋកិច្ចពិសេសប្រហែល ២៣ ដែលកំពុងប្រតិបត្តិការជាមួយនឹងរោងចក្រ ៤៩០ ដែលផ្ដល់ការងារប្រហែល ១៣០ ០០០ នាក់។ នេះបើតាមក្រុមប្រឹក្សាអភិវឌ្ឍន៍កម្ពុជា (CDC)។
ទិន្នន័យបានពីស្ថានទូតវៀតណាមប្រចាំនៅទីក្រុងភ្នំពេញបានឲ្យដឹងថា កាលពីឆ្នាំមុនវៀតណាមមានគម្រោងវិនិយោគ ២០៦ នៅកម្ពុជាជាមួយនឹងទុនវិនិយោគចំនួន ៣,២ ពាន់លានដុល្លារ។
ការវិនិយោគរបស់កម្ពុជានៅក្នុងប្រទេសវៀតណាមមានចំនួន ២១ គម្រោងជាមួយនឹងទុនវិនិយោគសរុបជិត ៦៤ លានដុល្លារ។ កាលពីឆ្នាំមុន ទំហំពាណិជ្ជកម្មផ្លូវការរវាងកម្ពុជា និងវៀតណាមមានជាង ៤,៧ ពាន់លានដុល្លារ កើនឡើង ២៣,៨ ភាគរយធៀបនឹងឆ្នាំ ២០១៧៕ LA