The Phnom Penh Post Search

Search form




Logo of Phnom Penh Post newspaper Phnom Penh Post - នាយករដ្ឋ​មន្ត្រី​ជំរុញ​ការ​វិនិយោគ​ពី​ម៉ាឡេស៊ី​លើ​ផ្នែក​អង្ករ

នាយករដ្ឋ​មន្ត្រី​ជំរុញ​ការ​វិនិយោគ​ពី​ម៉ាឡេស៊ី​លើ​ផ្នែក​អង្ករ

នាយករដ្ឋ​មន្ត្រី​ជំរុញ​ការ​វិនិយោគ​ពី​ម៉ាឡេស៊ី​លើ​ផ្នែក​អង្ករ

130828_12b
ការវេចខ្ចប់អង្ករនៅក្រុមហ៊ុន Green Trade នាពេលកន្លងមក ប៉ុស្តិ៍

ភ្នំពេញៈ លោក​នាយក​រដ្ឋមន្រ្តី ហ៊ុន សែន កាល​ពី​ថ្ងៃ​អង្គារ​បាន​ជំរុញ​វិនិយោគិន​ម៉ាឡេស៊ី​មក​ធ្វើ​ការ​វិនិយោគ ក្នុង​ការ​កែច្នៃ​អង្ករ​សម្រាប់​ធ្វើ​ការ​នាំ​ចេញ​ទៅ​កាន់​ប្រទេស​ក្រៅ។

លោក​នាយករដ្ឋ​មន្រ្តី​បាន​អំពាវនាវ​ក្នុង​អំឡុង​ជំនួប​ជា​មួយ លោក Tun Datuk Sari Utana Mohd Khalil bin Yaakob អភិបាល​រដ្ឋ Melaka ប្រទេស​ម៉ាឡេស៊ី​នៅ​ភ្នំពេញ​ កាល​ពី​ថ្ងៃ​ម្សិល​មិញ ដោយ​ថ្លែង​ថា រហូត​មក​ដល់​នឹង​ពេល​នេះ កម្ពុជា​កំពុង​ខិតខំ​ប្រឹង​ប្រែង​កាន់​តែ​ខ្លាំង​ក្នុង​ការ​កសាង ផ្លូវ​ជា​ច្រើន និង​ហេដ្ឋា​រចនា​សម្ព័ន្ធ​មួយ​ចំនួន​ផ្សេង​ទៀត​ដើម្បី​ជំរុញ​ដល់ កំណើន​សេដ្ឋកិច្ច​របស់​ខ្លួន។

លោកបាន​លើកឡើងថា នៅ​ឆ្នាំ​នេះ​កំណើន​សេដ្ឋកិច្ច​របស់​កម្ពុជា​ត្រូវ​បាន​ព្យាករ ៧,៦ ភាគរយ ដែល​ក្នុង​ចំនួន​នេះ​វិស័យ​កសិកម្ម​កំពុង​ដើរ​តួនាទី​ដ៏​សំខាន់។

លោកបានបន្តថា៖ «កម្ពុជា​កំពុង​ព្យាយាម​ទាក់ទាញ​វិនិយោ​គិន​ម៉ាឡេស៊ី​កាន់​តែ​ច្រើន​មក​វិនិយោគ​លើ​ផ្នែក​កែច្នៃ​អង្ករ​សម្រាប់​ការ​នាំ​ចេញ។ នេះ​គឺជា​អ្វី​ដែល​កម្ពុជា​ចង់​បាន»។

លោក Tun Datuk Sari Utana Mohd Khalil bin Yaakob បាន​ថ្លែង​ថា លោក​នឹង​ជូន​ដំណឹង​ដល់​បណ្ដា​ក្រុម​ហ៊ុន​ម៉ាឡេស៊ី​ដែល​មាន​អាជីវកម្ម ទាក់​ទង​ជាមួយ​នឹង​វិស័យ​នេះ​ក្នុង​ការ​ដឹក​នាំ​វិស័យ​ដ៏​មាន​សក្ដានុពល​នៅ​កម្ពុជា។

លោក​ក៏​បាន​លើក​ឡើង​ពី​ការ​អភិវឌ្ឍ​នាពេល​បច្ចុប្បន្ន​របស់​វិស័យ ទេសចរណ៍​នៅ​កម្ពុជា​ផង​ដែរ ហើយ​ថា ​ប្រទេស​ទាំង​ពីរ​នេះ​នឹង​លើក​កម្ពស់​បន្ថែម​ដល់​វិស័យ​នេះ។

តាមទិន្នន័យ​ពី​ក្រុម​ប្រឹក្សា​អភិវឌ្ឍន៍​កម្ពុជា ចាប់​ពី​ឆ្នាំ ១៩៩៤ ដល់​​ចុង​ឆ្នាំ​មុន ការ​វិនិយោគ​របស់​​ម៉ាឡេស៊ី​នៅ​កម្ពុជា​បាន​កើន​ដល់ ២,៦២ ​ពាន់លាន ដុល្លារ ដែល​ជា​ប្រទេស​វិនិយោគ​ឈាន​មុខ​គេ​ទី ៣​នៅ​ប្រទេស​កម្ពុជា។

ទិន្នន័យពី​ក្រសួង​ទេសចរណ៍​បាន​បង្ហាញ​ថា វិនិយោគិន​ម៉ាឡេស៊ី​ប្រហែល ៦០ ៦៥០ នាក់ បាន​មក​ទស្សនា​ប្រទេស​កម្ពុជា​ក្នុង​ឆមាស​ទី១ ឆ្នាំ ២០១៣ នេះ ដែល​កើន​ឡើង​ជាង ១០​ភាគរយ បើ​ធៀប​នឹង​រយៈពេល​ដូចគ្នា កាល​ពី​ឆ្នាំ​មុន៕PB

អត្ថបទគួរចាប់អារម្មណ៍