The Phnom Penh Post Search

Search form




Logo of Phnom Penh Post newspaper Phnom Penh Post - នាយក​រដ្ឋ​មន្ត្រី​ស្នើ​ចិន​វិនិយោគ​លើ​ការ​កែច្នៃ

នាយក​រដ្ឋ​មន្ត្រី​ស្នើ​ចិន​វិនិយោគ​លើ​ការ​កែច្នៃ

នាយក​រដ្ឋ​មន្ត្រី​ស្នើ​ចិន​វិនិយោគ​លើ​ការ​កែច្នៃ

131029_11
បុគ្គលិកកំពុងពិនិត្យការកែច្នៃអង្ករនៅក្នុងរោងចក្រកែច្នៃអង្កររបស់ក្រុមហ៊ុន ហ្គ្រីនត្រេដ នាពេលកន្លងមក ភ្នំពេញ ប៉ុស្តិ៍

ភ្នំពេញៈ លោក​នាយក​រដ្ឋ​មន្ដ្រី ហ៊ុន សែន កាល​ពី​ថ្ងៃ​ចន្ទ​បាន​ជំរុញ​ឲ្យ​វិនិយោគិន​ចិន​មក​ពី​ខេត្ត សានតុង ធ្វើការ​វិនិយោគ​ក្នុង​វិស័យ​កែច្នៃ​កសិកម្ម​នៅ​កម្ពុជា​សម្រាប់​ការ​នាំ​ចេញ​ត្រឡប់​ទៅ​ប្រទេស​ចិន​វិញ​ខណៈ​ប្រទេស​ចិន​កាត់​បន្ថយ​ពន្ធ​នាំ​ចូល​ពី​កម្ពុជា ៩៥ ភាគរយ។

លោក អ៊ាង សុផល្លែត ទីប្រឹក្សា​ផ្ទាល់​របស់​លោក​នាយក​រដ្ឋ​មន្រ្ដី​បាន​ប្រាប់​អ្នក​យក​ព័ត៌មាន​ក្រោយ​ពី​កិច្ច​ប្រជុំ​ថា ការ​អំពាវនាវ​របស់​លោក​នាយក​រដ្ឋ​មន្ដ្រី​បាន​ធ្វើ​ឡើង​ក្នុង​អំឡុង​ក្នុង​កិច្ច​ប្រជុំ​ជាមួយ​លោក Wang Junmin អនុ​លេខាធិការ​បក្ស​កុម្មុយនីស្ដ សានតុង នៅ​ទីក្រុង ភ្នំពេញ កាល​ពី​ថ្ងៃ​ចន្ទ។

បើ​តាម​លោក អ៊ាង សុផល្លែត លោក​នាយក​រដ្ឋ​មន្រ្ដី ហ៊ុន សែន​បាន​ចង្អុល​បង្ហាញ​ថា ស្ថិត​ក្រោម​ក្របខ័ណ្ឌ​ច្បាប់ អាស៊ាន-ចិន ប្រទេស​ចិន​យល់​ព្រម​កាត់​បន្ថយ​ពន្ធ​នាំ​ចូល ៩៥ ភាគរយ​សម្រាប់​ការ​នាំ​ចេញ​ទៅ​កាន់​ប្រទេស​របស់​ខ្លួន។

លោក​នាយក​រដ្ឋ​មន្ដ្រី​ស្នើ ឲ្យ​គណៈ​ប្រតិភូ​ពាណិជ្ជកម្ម​ខេត្ត សានតុង ត្រួត​ពិនិត្យ​លើ​ការ​សិក្សា លទ្ធភាព​សម្រាប់​ការ​វិនិយោគ​នៅ​ក្នុង​ឧស្សាហកម្ម​កែច្នៃ​កសិកម្ម​នៅ​កម្ពុជា។ លោក​នាយក​រដ្ឋ​មន្ដ្រី​ថ្លែង​ថា៖ «បញ្ហា​នៅ​ក្នុង​ប្រទេស​កម្ពុជា​គឺ​ទីផ្សារ​មិន​ទៀង​ទាត់ មាន​ន័យ​ថា កម្ពុជា​មិន​មាន​អ្នក​ទិញ និង​អ្នក​កែច្នៃ​ពិត​ប្រាកដ​នោះ​ទេ។ ក្នុង​ន័យ​នេះ​គណៈ​ប្រតិភូ​គួរ​តែ​ត្រួត​ពិនិត្យ ឬ​ធ្វើ​ការ​សិក្សា​ក្នុង​ការ​កែច្នៃ​ផលិតផល​ទី​នេះ​សម្រាប់​ការ​នាំ​ចេញ​ត្រឡប់​ទៅ​ប្រទេស​ចិន​វិញ»។

លោក Wang Junmin បាន​ថ្លែង​ថា នេះ​គឺជា​ដំណើរ​ទស្សនកិច្ច​លើក​ដំបូង​នៅ កម្ពុជា ក្នុង​បំណង​ជំរុញ​កិច្ច​សហ​ប្រតិបត្តិការ និង​មិត្តភាព​រវាង​កម្ពុជា និង​ប្រទេស​ចិន ជា​ពិសេស​លើ​វិស័យ​សេដ្ឋកិច្ច​ដោយ​អនុលោម​តាម​សេចក្ដី​សម្រេច​ចិត្ត​ដែល​បាន​ធ្វើ​ឡើង​ដោយ​អ្នក​ដឹក​នាំ​របស់​ប្រទេស​ទាំង​ពីរ។

លោក​បាន​បន្ត​ថា លោក​បាន​ទស្សនា​ខេត្ត កំពត រួច​ហើយ និង​បាន​ចុះ​ហត្ថលេខា​លើ​អនុស្សរណៈ​នៃ​ការ​យោគយល់​គ្នា ក្នុង​កិច្ច​សហ​ប្រតិបត្តិការ​រវាង​ខេត្ត កំពត និង​ខេត្ត សានតុង ផង​ដែរ។ លោក​ក៏​បាន​ទស្សនា​ខេត្ត សៀមរាប ផង​ដែរ​ដើម្បី​ពិភាក្សា​ពី​កិច្ច​សហ​ប្រតិបត្តិការ​លើ​វិស័យ​ទេសចរណ៍​តាម​រយៈ​ការ​ជំរុញ​ឲ្យ​មាន​ភ្ញៀវ​ទេសចរ កាន់​តែ​ច្រើន​មក​ពី​ខេត្ត សានតុង មក​ទស្សនា​ខេត្ត សៀមរាប កាន់​តែ​ច្រើន​ឡើង​ថែម​ទៀត។

លោក​បាន​ថ្លែង​ថា៖ «បច្ចុប្បន្ន​ក្រុមហ៊ុន​ចំនួន ៦៨ មក​ពី​ខេត្ត សានតុង កំពុង​វិនិយោគ​នៅ​ទី​នេះ​លើ​គម្រោង​ចំនួន ៦៨ ហើយ​លោក​បាន​ស្នើ​ឲ្យ​លោក​នាយក​រដ្ឋ​មន្ដ្រី​ជួយ​គាំទ្រ​ដល់​គម្រោង​នេះ»។

លោក ហ៊ុន សែន ផ្ដល់​អនុសាសន៍​ថា ការ​វិនិយោគ​ណា​មួយ​ក៏​ដោយ​មិន​គួរ​ផ្ដោត​តែ​លើ​គម្រោង​វិនិយោគ​ប៉ុណ្ណោះ​ទេ ប៉ុន្តែ​ពួកគេ​ត្រូវ​តែ​ផ្ដោត​លើ​ការងារ​កសិកម្ម​របស់​ប្រជាជន និង​បរិស្ថាន​ផង​ដែរ។

ទិន្នន័យ​ពី​ក្រសួង​ទេសចរណ៍​បង្ហាញ​ថា ភ្ញៀវ​ទេសចរ​ចិន​មក​ទស្សនា​ប្រទេស​កម្ពុជា​ជាប់​ចំណាត់​ថ្នាក់​លេខ ៣ នៅ​ក្នុង​ឆមាស​ទី​មួយ​ឆ្នាំ​នេះ​មាន​ចំនួន ២៣០ ៩៩៧ នាក់ កើន​ឡើង ៥២,១ ភាគរយ​ធៀប​នឹង​រយៈ​ពេល​ដូច​គ្នា​ពី​ឆ្នាំ​មុន។

ពាណិជ្ជកម្ម​ទ្វេ​ភាគី​រវាង កម្ពុជា-ចិន ទទួល​បាន ២,៥ ពាន់​លាន​ដុល្លារ​កាល​ពី ឆ្នាំ ២០១១ ខណៈ​អ្នក​ដឹក​នាំ​ប្រទេស​ទាំង​ពីរ​បាន​សន្យា​ថា នឹង​បង្កើន​ចំនួន​ទ្វេ​ដង​ត្រឹម​ឆ្នាំ ២០១៧។

ទិន្នន័យ​បាន​ពី​ក្រុមប្រឹក្សា​អភិវឌ្ឍន៍​កម្ពុជា បាន​បង្ហាញ​ថា រដ្ឋាភិបាល​បាន​យល់​ព្រម​លើ​ការ​វិនិយោគ​មាន​តម្លៃ ៩,០៥ ពាន់​លាន ដុល្លារ​ពី​ប្រទេស​ចិន​ចាប់​ពី​ឆ្នាំ ១៩៩៤ គិត​មក​ដល់​ខែ កក្កដា ឆ្នាំ ២០១២។ ការ​វិនិយោគ​ភាគ​ច្រើន​មក​ពី​ប្រទេស​ចិន​គឺ​នៅ​ក្នុង​ឧស្សាហកម្ម កាត់ដេរ រ៉ែ វិស័យ​កសិកម្ម។ល។ PB

អត្ថបទគួរចាប់អារម្មណ៍