The Phnom Penh Post Search

Search form




Logo of Phnom Penh Post newspaper Phnom Penh Post - នាយក​រដ្ឋ​មន្ត្រី ជំរុញ​ឲ្យ​លើក​កម្ពស់ ម៉ាំល្ហុង ត្រីឆ្អើរ ត្រសក់

នាយក​រដ្ឋ​មន្ត្រី ជំរុញ​ឲ្យ​លើក​កម្ពស់ ម៉ាំល្ហុង ត្រីឆ្អើរ ត្រសក់

នាយក​រដ្ឋ​មន្ត្រី ជំរុញ​ឲ្យ​លើក​កម្ពស់ ម៉ាំល្ហុង ត្រីឆ្អើរ ត្រសក់

20140304_12
មាុំល្ហុង និងត្រសក់ចាវ ដែលលក់នៅផ្សារចាស់ ហុង មិនា

ភ្នំពេញៈ នាយក​រដ្ឋ​មន្ត្រី ហ៊ុន សែន ស្នើ​ឲ្យ​ក្រសួង​ពាក់ព័ន្ធ​លើក​ស្ទួយ ត្រសក់​ចាវ ម៉ាំល្ហុង និង​ត្រីឆ្អើរ ជា​ម្ហូប​សម្គាល់​អត្ត​សញ្ញាណ​ជាតិ ជា​ផ្នែក​មួយ​ចូល​រួម​ក្នុង​ការ​ផ្សព្វ​ផ្សាយ​វប្បធម៌​ខ្មែរ និង​ជំរុញ​ឲ្យ​មាន​ការ​នាំ​ចេញ​ដូច គីមឈី របស់​ប្រទេស កូរ៉េ ដែរ។

លោក​ថ្លែង​ដូច្នេះ​ក្នុង​ពិធី​អបអរ​សាទរ​ខួប​លើក ទី១៦ ទិវា​វប្បធម៌​ជាតិ នៅ​សាល​សន្និសីទ​ចតុមុខ​កាល​ពី​ម្សិលមិញ។

លោក​នាយក​រដ្ឋ​មន្រ្តី ហ៊ុន សែន មាន​ប្រសាសន៍​ថា៖ «ខ្ញុំ​សុំ​ស្នើ​ឲ្យ​មាន​ការ​គិត​គូរ​យក​ចិត្ត​ទុក​ដាក់​អំពី​វប្បធម៌​ខ្មែរ ដូចជា​ត្រសក់​ចាវ ម៉ាំល្ហុង ត្រី​ឆ្អើរ​ជាដើម ដែល​ត្រូវ​ធ្វើ​ឲ្យ​ទៅ​ជា​អត្តសញ្ញាណ​មួយ​របស់​ខ្មែរ​ដែល​អាច​ពង្រីក​ទៅ​ជា​ឧស្សាហកម្ម​ម្ហូប​ខ្មែរ​ដែល​ត្រូវ​បាន​ធ្វើ​ពាណិជ្ជកម្ម​នៅ​ទូទាំង​ប្រទេស»។

លោក​បន្ត​ថា៖ «បណ្តា​ប្រទេស​នីមួយៗ​គេ​បាន​ខិតខំ​ណាស់ ពេល​ដែល​យើង​បាន​ទៅ​ដល់​ប្រទេស​របស់​គេ គេ​ក៏​ចាប់​ផ្តើម​ដាក់​ម្ហូប​គេ​មក​សម្រាប់​យើង។ ឯ​យើង នៅ​ពេល​មាន​ពីធី​ជប់​លៀង​ម្តងៗ យើង​ក៏​គួរ​បង្ហាញ​នូវ​ម្ហូប​របស់​យើង​ដែរ»។ លោក​នាយក​រដ្ឋ​មន្រ្តី​បាន​បន្ថែម​ថា ត្រសក់​ចាវ ម៉ាំល្ហុង និង​ត្រី​ឆ្អើរ គួរ​តែ​ត្រូវ​បាន​ជំរុញ​ឲ្យ​មាន​ការ​នាំ​ចេញ​ដូច គីមឈី របស់​ប្រទេស កូរ៉េ ផង​ដែរ។

លោក​ថ្លែង​ថា៖ «ប្រទេស​ខ្លះ ដូច​ជា ខាង កូរ៉េ គេ​បាន​បញ្ជូន​មក​ដល់​ស្រុក​យើង គឺ គីមឈី។ ឥឡូវ​នៅ​តាម​ហាង​នានា គីមឈី ក៏​ដាក់​លក់​ដែរ។ យើង​ត្រូវ​គិត​ពី​បញ្ហា​នេះ»។

ត្រសក់​ចាវ និង​ម៉ាំ​ល្ហុង ជា​មុខ​ម្ហូប​ផ្អាប់​ដែល​ទាមទារ​ដំណាក់កាល​និង​ពេល​វេលា​ច្រើន​ក្នុង​ការ​ផលិត​ដែល​ទាមទារ​ការ​សម្ងួត​ក្រោម​កម្តៅ​ថ្ងៃ​និង​គ្រឿង​ផ្សំ ដែល​មាន​ដូច​ជា ត្រី​ម៉ាំ​ជាដើម។ ត្រសក់​ចាវ និង​ម៉ាំ​ល្ហុង ជា​ម្ហូប​បន្ទាប់​បន្សំ ដ៏​ពេញ​និយម​របស់​ប្រជាជន​ខ្មែរ។

លោក ថោង ខុន រដ្ឋ​មន្ត្រី ក្រសួង ទេសចរណ៍ បាន​ប្រាប់ ភ្នំពេញ ប៉ុស្តិ៍ កាល​ពី​ម្សិលមិញ​ថា ក្រសួង​បាន និង​កំពុង​រៀបចំ​យន្តការ​ដើម្បី ដាក់​ត្រសក់​ចាវ ម៉ាំ​ល្ហុង និង​ត្រី​ឆ្អើរ ជា​ម្ហូប​សម្គាល់​អត្ត​សញ្ញាណ​ជាតិ។

លោក​មាន​ប្រសាសន៍​ថា៖ «យើង​កំពុង​នឹង​ពិភាក្សា​ជាមួយ​ចុងភៅ​នៅ​ភោជនីយដ្ឋាន​ធំៗ បង្កើត​ជា​ស្តង់ដា​កម្រិត​ជាតិ​មួយ​ក្នុង​ការ​ធ្វើ​ត្រសក់​ចាវ និង​ម៉ាំល្ហុង​នេះ។ យើង​ធ្វើ​ឲ្យ​ស្អាត និង​ឲ្យ​ឆ្ងាញ់ និង​មាន​ស្តង់ដារ​សម្រាប់​ភ្ញៀវ​ទេសចរ»។ លោក​បន្ត​ថា ក្រោយ​ពី​មាន​ស្តង់ដារ​ត្រឹម​ត្រូវ​ភោជនីយដ្ឋាន​ធំៗ​នឹង​ត្រូវ​បាន​លើក​ទឹក​ចិត្ត​ឲ្យ​ដាក់​មុខ​ម្ហូប​ទាំង​នេះ​ក្នុង​បញ្ជី​រាយ​មុខ​ម្ហូប។

លោក​បន្ត​ទៀត​ថា ក្រៅ​ពី ត្រសក់​ចាវ ម៉ាំល្ហុង និង​ត្រី​ឆ្អើរ ដែល​ស្ថិត​ក្នុង​ផែនការ​ជំរុញ​ឲ្យ​ក្លាយ​ជា​ម្ហូប​សម្គាល់​អត្តសញ្ញាណ​ជាតិ ប្រហុក​ខ្ទិះ ប្រហុក​គ្រឿង និង អាម៉ុក ក៏​មាន​ឈ្មោះ​នៅ​ក្នុង​បញ្ជី​នេះ​ផង​ដែរ។

លោក​បន្ថែម​ថា៖ «ត្រសក់​ចាវ និង​ម៉ាំល្ហុង​ជាមួយ ត្រី​ឆ្អើរ គឺ​ឆ្ងាញ់​ណាស់ ហើយ អាម៉ុក ជាដើម​ហ្នឹង​សុទ្ធ​តែ​ជា​របស់​ខ្មែរ​ហើយ»។

កម្ពុជា មាន​ទិសដៅ​ក្លាយ​ជា​គោលដៅ​ទេសចរណ៍​ផ្នែក​វប្បធម៌ និង​ធម្មជាតិ។ ផលិតផល​ទេសចរណ៍​ថ្មី​នេះ​នឹង​បន្ថែម​ភាព​ទាក់​ទាញ​ដល់​ភ្ញៀវ​ទេសចរ​ចូល​មក កម្ពុជា។

លោក លូ ម៉េង ប្រធាន​សមាគម​សណ្ឋាគារ​កម្ពុជា និង​ជា​ចុងភៅ​ដែល​ល្បី​ឈ្មោះ​ខាង​ការ​ច្នៃ​រសជាតិ​ម្ហូប​ខ្មែរ​នោះ បាន​និយាយ​ថា លោក​ត្រៀម​ខ្លួន​ជា​ស្រេច​ក្នុង​ការ​បញ្ជូល​ត្រសក់​ចាវ និង​ម៉ាំល្ហុង​នេះ បន្ថែម​ទៅ​ក្នុង​បញ្ជី​រាយ​មុខ​ម្ហូប​សម្រាប់​ភោជនីយដ្ឋាន​របស់​លោក។

លោក​មាន​ប្រសាសន៍​ថា៖ «ជា​ចុងភៅ យើង​សប្បាយ​ចិត្ត​ដែល​មាន​ការ​លើក​ទឹក​ចិត្ត ទី​មួយ ចុងភៅ​យើង​មាន​ឱកាស​ធំ​តែ​ម្តង​ក្នុង​ការ​ចូល​រួម​លើក​កម្ពស់​មុខ​ម្ហូប​ខ្មែរ​ជា​ពិសេស​ខ្លួន​ខ្ញុំ​ចូល​ចិត្ត​ម្ហូប​របស់​ខ្មែរ»។

លោក​បន្ត​ថា ការ​ផ្តួច​ផ្តើម​របស់​លោក​នាយក​រដ្ឋ​មន្ត្រី​នឹង​ជួយ​ជំរុញ​ភ្ញៀវ​ទេសចរ​ឲ្យ​បរិភោគ​មុខ​ម្ហូប​ខ្មែរ​កាន់​តែ​ច្រើន ដែល​កត្តា​នេះ​នឹង​ជួយ​កាត់​បន្ថយ​ការ​នាំ​ចូល​ប្រភេទ​បន្លែ​បរទេស​ផង​ដែរ។

លោក លូ ម៉េង ថ្លែង​ថា៖ «នៅ​ពេល​ដែល​យើង​លើក​ម្ហូប​នឹង​ទៅ​ជា​ម្ហូប​ជាតិ​ទៀត ពេល​នោះ​ភ្ញៀវ​ទេសចរ​មាន​ឱកាស​ភ្លក្ស​រសជាតិ​ម្ហូប​ខ្មែរ។ សរុប​ទៅ​យើង​នឹង​ជួយ​ដល់​កសិកម្ម​យើង​ដែរ ព្រោះ​យើង​មិន​នាំ​របស់​ចូល​មក​ច្រើន​នោះ​ទេ»។

ចំណែក លោក ម៉ៅ បូរ៉ា អ្នក​លក់ ម៉ាំ​ល្ហុង​ស្លៀក​ឯកសណ្ឋាន ដែល​ល្បី​ល្បាញ​ក្នុង​ចំណោម​អ្នក​ទីក្រុង​ភ្នំពេញ​ដែរ​នោះ និយាយ​ថា លោក​ត្រេកអរ​នៅ​ពេល​ដែល​បាន​ដឹង​ពី​ការ​ប្រកាស​របស់​លោក​នាយក​រដ្ឋ​មន្ត្រី​ដូច្នេះ។

លោក​ថា បច្ចុប្បន្ន​ម៉ាំ​ល្ហុង​របស់​លោក​ក៏​ត្រូវ​បាន​ផ្ញើ​ចេញ​ទៅ​សម្រាប់​អតិថិជន​នៅ​ក្រៅ​ប្រទេស​ផង​ដែរ។ លោក​ថ្លែង​ថា៖ «ខ្ញុំ​អាច​ធ្វើ​បាន​លើ​ការ​ពង្រឹង​ស្តង់ដារ និង​អនាម័យ។ បច្ចុប្បន្ន​ខ្ញុំ​មាន​អតិថិជន​ច្រើន​រួច​ហើយ។ អ្វី​ដែល​ខ្ញុំ​ត្រូវ​ការ​ពេល​នេះ​គឺ​ដើម​ទុន​បន្ថែម​ដើម្បី​អាច​ផលិត​តាម​ស្តង់ដារ និង​អនាម័យ​ក្នុង​កម្រិត​មួយ»។

លោក​បន្ត​ថា លោក​ត្រៀម​ខ្លួន​ជានិច្ច​ក្នុង​ការ​បង្កើន​ស្តង់ដារ និង​សមត្ថភាព​ផលិត​ម៉ាំ​ល្ហុង​របស់​លោក​នៅ​ពេល​ដែល​យន្តការ​ជំរុញ ម៉ាំ​ល្ហុង​ជា​ម្ហូប​សម្គាល់​អត្ត​សញ្ញាណ​ជាតិ​នេះ​ចេញ​ជា​រូបរាង ហើយ​ពេល​នេះ​លោក​ក៏​កំពុង​ស្វែង​រក​ទុន​ដើម្បី​ពង្រីក​អាជីវកម្ម​ផង​ដែរ៕

អត្ថបទគួរចាប់អារម្មណ៍