ភ្នំពេញៈ លោកស្រី Kristalina Georgieva នាយកគ្រប់គ្រងមូលនិធិរូបិយវត្ថុអន្តរជាតិ (IMF) បានឲ្យដឹងកាលពីថ្ងៃពុធថា ការចាប់ផ្តើមយុទ្ធនាការចាក់វ៉ាក់សាំងប្រឆាំងជំងឺកូវីដ ១៩ បានជំរុញឲ្យមានកំណើនសេដ្ឋកិច្ចពិភពលោកត្រូវបានព្យាករថានឹងកើនឡើងដល់ ៦ ភាគរយសម្រាប់ឆ្នាំនេះ ខណៈដែលស្ថាប័នមួយនេះបានព្យាករថាកំណើនសេដ្ឋកិច្ចប្រទេសកម្ពុជានឹងស្ទុះងើបឡើងវិញពីដក ៣,៥ ក្នុងឆ្នាំ ២០២០ ដល់ ៤,២ ភាគរយក្នុងឆ្នាំ ២០២១ នេះ ប៉ុន្តែវាទាមទារឲ្យមានគោលនយោបាយបុរេសកម្មប្រកប ដោយការប្រុងប្រយ័ត្នខ្ពស់ត្រូវបានធ្វើឡើងដោយរដ្ឋាភិបាលប្រទេសនីមួយៗ។
លោកស្រី Kristalina បានថ្លែងបែបនេះនៅក្នុងការបើកសន្និសីទសារព័ត៌មាន នៅក្នុងកិច្ចប្រជុំនិទាឃរដូវឆ្នាំ ២០២១ របស់ IMF និងធនាគារពិភពលោក ដែលបានធ្វើឡើងតាមវីដេអូ ដោយបានចង្អុលបង្ហាញថា ចក្ខុវិស័យពិភពលោកគឺកាន់តែស្រឡះ ដោយសារតែប្រជាជនរាប់លាននាក់ កំពុងទទួលបានអត្ថប្រយោជន៍ពីការចាក់វ៉ាក់សាំង និងមានការគាំទ្រគោលនយោបាយបន្ថែមពីរដ្ឋាភិបាលរបស់ខ្លួន។
លោកស្រីថ្លែងថា៖ «ការណ៍នេះកំពុងបន្ថែមដល់វិធានការជាពិសេស និងសម្របសម្រួលដែលបានធ្វើឡើងក្នុងរយៈពេល ១ ឆ្នាំកន្លងមក។ ក៏ប៉ុន្តែខណៈ ដែលមានភាពភ្លឺថ្លា វិបត្តិសុខភាព នេះក៏បន្តបង្កស្រមោលអន្ទោលតាមប្រាណ»។
លោកស្រីបន្តថា បណ្ដាសេដ្ឋកិច្ច ទីផ្សារអភិវឌ្ឍន៍ និងសេដ្ឋកិច្ចទីផ្សារអភិវឌ្ឍន៍រីកចម្រើនរហ័សមួយចំនួនតូច ដែលត្រូវបាននាំមុខដោយអាមេរិក និងចិន កំពុងដំណើរការទៅមុខ ចំណែកឯបណ្ដាប្រទេសទន់ខ្សោយ និងបណ្ដាប្រទេសក្រីក្រកំពុងនៅពីក្រោយការស្ទុះងើបឡើងវិញក្នុងល្បឿនខុសៗគ្នា។
លោកស្រីលើកឡើងពីអាទិភាពសំខាន់ៗចំនួន ៣ ដែលត្រូវដោះស្រាយដោយរដ្ឋាភិបាលនៃបណ្តាប្រទេសនីមួយៗគឺ ទី១ ឱកាសទទួលបានការចាក់វ៉ាក់សាំងដោយយុត្តិធម៌ ដែលជាការផ្ដល់មូលនិធិយ៉ាងពេញលេញដោយ COVAX ហើយត្រូវធានាថា វ៉ាក់សាំងដែលលើសចំនួនត្រូវផ្ទេរទៅឲ្យបណ្ដាប្រទេសក្រីក្រខ្លាំង។ ទី២ ឱកាសទទួលបានសម្ទុះងើបឡើងវិញដោយយុត្តិធម៌ដែលជាគន្លឹះដ៏សំខាន់ ដើម្បីគាំទ្រគ្រួសារដែលងាយទទួលរងគ្រោះ និងក្រុមហ៊ុនដែលអាចបន្តរស់បាន ដែលតម្រូវឲ្យមានវិធានការសារពើពន្ធជាទិសដៅ និងការរក្សាលក្ខខណ្ឌហិរញ្ញវត្ថុដោយអនុគ្រោះ។ និងទី៣ គឺឱកាសទទួលបាននៅពេលអនាគត ដែលប្រហែលជាការសម្រេចចិត្តដោយពិបាកបំផុតដែលរដ្ឋាភិបាលណាមួយអាចធ្វើបាននៅឆ្នាំនេះ។ ការផ្ដោតការយកចិត្តទុកដាក់ គួរតែធ្វើឡើងលើការបង្កើនការវិនិយោគសាធារណៈក្នុងគម្រោងបៃតង និងហេដ្ឋារចនាសម្ព័ន្ធឌីជីថលផ្នែកសុខភាពរបស់ប្រជាជន និងការអប់រំ។
លោកស្រីបញ្ជាក់ថា៖ «ការដោះសោរសក្ដានុពលនេះ បណ្ដាប្រទេសនានានឹងត្រូវការប្រាក់ចំណូលសាធារណៈគ្រប់គ្រាន់ ហើយពួកគេនឹងត្រូវការការចំណាយកាន់តែមានប្រសិទ្ធភាព។ នៅក្នុងករណីជាច្រើននេះនឹងមានន័យថា ការយកពន្ធកាន់តែមានការរីកចម្រើន និងកិច្ចព្រមព្រៀងលើបញ្ហានានា ដូចជាការយកពន្ធអប្បបរមាសម្រាប់ក្រុមហ៊ុន និងសិទ្ធិពន្ធអន្តរជាតិ។ ការណ៍នេះត្រូវតែគួបផ្សំជាមួយការគាំទ្រកាន់តែរឹងមាំ សម្រាប់បណ្ដាប្រទេសក្រីក្រខ្លាំង ដោយសារពួកគេប្រយុទ្ធប្រឆាំងនឹងវិបត្តិនេះ និងស្វែងរកការវិនិយោគនៅពេលអនាគត»។
លោក វង្សី វិស្សុត រដ្ឋលេខាធិការ ប្រចាំការនៃក្រសួងសេដ្ឋកិច្ច និងហិរញ្ញវត្ថុបានលើកឡើងកិច្ចប្រជុំរដ្ឋមន្ត្រីហិរញ្ញវត្ថុ អាស៊ានលើកទី២៥ នៅថ្ងៃទី ៣០ មីនា ២០២១ តាមរយៈប្រព័ន្ធវីដេអូថារដ្ឋាភិបាលកម្ពុជាបានរៀបចំចំណាយនូវទឹកប្រាក់ប្រមាណជាជិត ២ ពាន់លានដុល្លារក្នុងការទប់ស្កាត់ការរាតត្បាតនៃជំងឺកូវីដ ១៩ និងគ្រប់គ្រងផលប៉ះពាល់មកលើវិស័យសំខាន់ៗនៃសេដ្ឋកិច្ចកម្ពុជាតាមរយៈការដាក់ចេញនូវវិធានការអន្តរាគមន៍។
លោកបានអះអាងថា វិធានាការ ៨ ជុំកន្លងមកមានទិសដៅអនុវត្តទប់ស្កាត់ការរាតត្បាតនៃជំងឺកូវីដ ១៩ និងគ្រប់គ្រងផលប៉ះពាល់មកលើវិស័យសេដ្ឋកិច្ចសំខាន់ៗដែលមានទឹកប្រាក់ប្រមាណ ១ ១៦៤ លានដុល្លារ ក្នុងឆ្នាំ ២០២០ និង ៧១៩ លានដុល្លារ ក្នុងឆ្នាំ ២០២១៕ LA