នាវាដឹកអ្នកដំណើរពីភ្នំពេញ ទៅក្រុងតាខ្មៅ ដែលនឹងដាក់ឲ្យដំណើរការនៅថ្ងៃសុក្រនេះ។ រូបថត ពីហ្វេសប៊ុក
ភ្នំពេញៈ ក្រសួងសាធារណៈការ និងដឹកជញ្ជូន (MPWT) នឹងដាក់ឲ្យដំណើរការសេវានាវាដឹកអ្នកដំណើរជាលើកដំបូងនៅថ្ងៃសុក្រនេះ ដោយតភ្ជាប់ជាបឋមពីចំណតនៅខ័ណ្ឌឬស្សីកែវ ទៅក្រុងតាខ្មៅខេត្តកណ្ដាល ដោយមានប្រើប្រាស់ចំណតចំនួន ៤ ទីតាំង។ នេះបើយោងតាមអ្នកនាំពាក្យក្រសួង។
លោក វ៉ា ស៊ីមសូរិយា អ្នកនាំពាក្យ ដឹកជញ្ជូន បានថ្លែងថា ពិធីដាក់ឲ្យដំណើរការ នឹងត្រូវរៀបចំឡើងនៅព្រឹកថ្ងៃសុក្រនេះដោយមានវត្តមានពីលោក ស៊ុន ចាន់ថុល រដ្ឋមន្ដ្រីក្រសួងសាធារណៈការ និង ដឹកជញ្ជូន។
ពិធីនេះនឹងត្រូវបានធ្វើឡើងនៅចំណតជិតផ្សាររាត្រី ជាចំណតធំជាងគេ។
តាមលោក ស៊ីមសូរិយា សេវានាវាដឹកអ្នកដំណើរនេះនឹងដាក់ឲ្យដំណើរការដំបូងដោយមិនគិតថ្លៃជាបណ្តុះអាសន្នសម្រាប់សាធារណៈជន។ លោកមិនទាន់អាចបញ្ជាក់ទេថា សេវាមិនគិតថ្លៃនេះនឹងត្រូវបញ្ចប់នៅពេលណា។
លោកថ្លែងថា៖ «យើងចាប់ផ្ដើមចំណតដំបូងចំនួន ៤ ហើយបន្តសាងសង់ជាបន្តបន្ទាប់ដើម្បីពង្រីកចំនួនចំណត។ នៅពេលយើងធ្វើចំណតទី ៦ ចប់ យើងនឹងដំណើរការចំណតទី ៦ នេះ ហើយនៅពេលចំណតទី ៧ យើងបន្តបន្ថែមការដំណើរការនេះឲ្យកាន់តែច្រើន»។
ចំណតចំនួន ៤ ដែលត្រូវដំណើរការនាពេលដំបូងនេះរួមមានចំណតនៅឫស្សីកែវ ផ្សាររាត្រី អរិយក្សត្រ និង តាខ្មៅ។
យោងតាមព័តមាននៅលើគេហទំព័រហ្វេសប៊ុករបស់ក្រសួង កាលពីខែមករាឆ្នាំនេះ គម្រោងនាវាដឹកអ្នកដំណើរនេះនឹងមានចំណតសរុបដល់ ១៥ ចំណត។
លោក សូរិយា មិនទាន់អាចផ្ដល់ព័ត៌មានលម្អតិនៅឡើយទេ អំពីពេលវេលាការដឹកជញ្ជូន តម្លៃ ឬ ចំនួនអ្នកដំណើរតាមកាណូតចម្លងនីមួយៗ ប៉ុន្តែលោកថ្លែងថា ក្រុមហ៊ុនកំពង់ផែស្វយ័តភ្នំពេញ (PPAP) ដែលជាប្រតិបត្តិករក្នុងគម្រោងសេវានាវាដឹកអ្នកដំណើរសាធារណៈនេះ នឹងប្រើប្រាស់នាវា ៣ សម្រាប់ប្រតិបត្តិការនាពេលដំបូង៕ LA
