The Phnom Penh Post Search

Search form

Logo of Phnom Penh Post newspaper Phnom Penh Post - នាំ​ចេញ​កៅ​ស៊ូ​កើន​ប៉ុន្តែ​ប្រាក់​ចំណូល​ធ្លាក់​ចុះ​




នាំ​ចេញ​កៅ​ស៊ូ​កើន​ប៉ុន្តែ​ប្រាក់​ចំណូល​ធ្លាក់​ចុះ​

នាំ​ចេញ​កៅ​ស៊ូ​កើន​ប៉ុន្តែ​ប្រាក់​ចំណូល​ធ្លាក់​ចុះ​

Content image - Phnom Penh Post

ភ្នំពេញៈ ការ​នាំ​ចេញ​ជ័រ​កៅ​ស៊ូ​សរុប​របស់​កម្ពុជា​បាន​កើន​ឡើង​១២​ភាគ​រយ​នៅ​ក្នុង​រយៈ​ពេល​៩​ខែ​ដំបូង​នៃ​ឆ្នាំ​នេះ​បើ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​ទៅ។ នេះ​បើ​យោង​តាម​តួលេខ​ពី​ក្រសួង​ពាណិជ្ជកម្ម​។

ទោះបី​យ៉ាង​នេះ​ក្តី​ស្ថិតិ​បង្ហាញ​ថា​ចំណូល​ពី​ការ​នាំ​ចេញ​បាន​ធ្លាក់​ចុះ​យ៉ាង​គំហុក​ខណៈ​តម្លៃ​កៅ​ស៊ូ​នៅ​លើ​ទីផ្សារ​អន្តរជាតិ​ចុះ​ថោក​ជា​ពិសេស​នៅ​ទីផ្សារ​ចិន​។

តំណាង​មក​ពី​ឧស្សាហ​កម្ម​កៅស៊ូ​បាន​និយាយ​ថា ការ​ធ្លាក់​ចុះ​តម្លៃ​ដ៏​គំហុក​នេះ​គឺ​បណ្ដាល​មក​ពី​វិបត្តិ ក្នុង​តំបន់​អឺរ៉ុប​ដែល​មាន​តម្រូវ​ការ​ច្រើន​បំផុត​នៅ​ក្នុង​វិស័យ​ឧស្សាហកម្ម​ផលិត​សំបក​កង់​រថ​យន្ត​។

ទិន្ន​ន័យ​ពី​ក្រសួង​ពាណិជ្ជ​កម្ម​បង្ហាញ​ថា ប្រទេស​កម្ពុជា​បាន​នាំ​ចេញ​ជ័រ​កៅស៊ូ​សរុប​ចំនួន​៣៩​៣៦០​តោន​ក្នុង​អំឡុង​ពេល​ពី​ខែ​មករា​ដល់​ខែ​កញ្ញា​ពោល​គឺ​កើន​១២​ភាគ​រយ​បើ​ធៀប​នឹង​អំឡុង​ពេល​ដូច​គ្នា​កាល​ពី​ឆ្នាំ​មុន​ដែល​មាន​៣៥ ០៨០​តោន​ខណៈ​ប្រាក់​ចំណូល​បាន​មក​ពី​ការ​នាំ​ចេញ​នេះ​បាន​ធ្លាក់​ចុះ​ពី​១៦០​លាន​ដុល្លារ​មក​នៅ​ត្រឹម​១១៦​លាន​ដុល្លារ គឺ​ធ្លាក់​ចុះ​២៧​ភាគរយ​។

121129_01
កម្មករ កំពុងមមាញឹកចៀរជ័រកៅស៊ូនៅក្នុងចម្ការកៅស៊ូមួយកន្លែងនៅក្នុងខេត្តកំពង់ចាម កាលពីពេលកន្លងមក ភ្នំំពេញ ប៉ុស្តិ៍

លោក ម៉ក់​គឹម​ហុង​ប្រធាន​សមាគម​កៅស៊ូ​កម្ពុជា​មាន​ប្រសាសន៍​ថា តម្រូវ​ការ​បាន​ធ្លាក់​ចុះ​តាំង​ពី​ដើម​ឆ្នាំ​មក​ម៉្លេះ​ដោយ​ធ្វើ​ឲ្យ​ប្រាក់​ចំណូល​បាន​មក​ពី​ឧស្សាហកម្ម​នេះ​ធ្លាក់​ចុះ​ផង​ដែរ​។ លោក​បន្ត​ថា៖ «យើង​នាំ​ចេញ​ភាគ​ច្រើន​ទៅ​កាន់​ប្រទេស​ចិន​ដែល​ជា​ទីផ្សារ​ដ៏​ធំមួយ​សម្រាប់​ឧស្សាហ​កម្ម​ផលិត​សំបក​កង់​រថយន្ត​ដូច្នេះ​នៅ​ពេល​អឺរ៉ុប​កំពុង​បន្ត​មាន​វិបត្តិ​នៅ​ឡើយ​តម្រូវ​ការ​សំបក​កង់​រថយន្ត​នៅ​តែ​មាន​ការ​ធ្លាក់​ចុះ»។

បើ​ទោះ​បី​តម្លៃ​កៅ​ស៊ូ​បាន​ធ្លាក់​ចុះ​ខ្លាំង​ក៏ដោយ ក៏វា​មិន​ប៉ះ​ពាល់​ដល់​ឧស្សាហកម្ម​នេះ​ដែរ។ នេះ​បើ​តាម​លោក​ម៉ក់​គឹមហុង។ លោក​ថ្លែង​ថា៖ «​ឥឡូវ​នេះ​យើង​កំពុង​លក់​ក្នុង​រង្វង់​តម្លៃ​២​៨០០​ដុល្លារ​ក្នុង​មួយ​តោន​ប៉ុន្តែ​យើង​នៅ​តែ​រក​បាន​ប្រាក់​ចំណេញ​ដរាប​ណា​វា​មិន​ធ្លាក់​នៅ​ក្រោម​តម្លៃ​១ ០០០​ដុល្លារ​នោះ​»។

លោក ម៉ាក់ គឹម ជា​ម្ចាស់​ចម្ការ​កៅ​ស៊ូ​ក្រែក​ហើយ​ដែល​បច្ចុប្បន្ន​លោក​មាន​ផ្ទៃ​ដី​ដាំ​ដើម​កៅ​ស៊ូ​ទំហំ​ប្រហែល​១៧ ០០០​ហិកតា​នៅ​ឃុំ​ជប់ ខេត្ត​កំពង់​ចាម​និង​មួយ​កន្លែង​ទៀត​មាន​ទំហំ​ចន្លោះ​ពី​៣​ពាន់​ទៅ​៤​ពាន់​ហិកតា​នៅ​ក្នុង​ខេត្ត​ស្ទឹង​ត្រែង​។

តាម​តម្លៃ​នៅ​ម៉ាឡេស៊ី​បង្ហាញ​ថា ជ័រ​កៅ​ស៊ូ​ត្រូវ​បាន​លក់​ក្នុង​តម្លៃ​១ ៨៦៨​ដុល្លារ​ក្នុង​មួយ​តោន​កាល​ពី​ថ្ងៃ​ពុធ​គឺ​ធ្លាក់​ចុះ​២៤​ភាគ​រយ​បើ​ធៀប​តម្លៃ​២ ៤៧៦,៥​ដុល្លារ​ក្នុង​មួយ​តោន​ក្នុង​អំឡុង​ពេល​ដូច​គ្នា​កាល​ពី​ឆ្នាំ​មុន​។ កៅ​ស៊ូ​កម្ពុជា​ត្រូវ​បាន​នាំ​ចេញ​ទៅ​កាន់​ម៉ាឡេស៊ី វៀត​ណាម និង​ចិន​។

កៅ​ស៊ូ​គឺជា​ដំណាំ​កសិឧស្សាហ​កម្ម​ដ៏​មាន​សក្តា​នុពល​មួយ​ដែល​រដ្ឋាភិបាល​កំពុង​តម្រង់​ទិស​ឲ្យ​ក្លាយ​ជា​ផលិត​ផល​កសិកម្ម​មួយ​ដ៏​សំខាន់​បន្ទាប់​ពី​អង្ករ​។

លោក លី ផល្លា​អគ្គ​នាយក​នៃ​អគ្គ​នាយក​ដ្ឋាន​កៅ​ស៊ូ​មិន​អាច​ទាក់​ទង​សុំ​ការ​អធិប្បាយ​បាន​ទេ​កាល​ពីថ្ងៃ​ម្សិល​មិញ​ប៉ុន្តែ​លោក​ធ្លាប់​បាន​រាយ​ការណ៍​ពី​មុន​មក​ថា តំបន់​ដែល​គេ​ប្រើ​សម្រាប់​ដាំ​ដើម​កៅ​ស៊ូ​បាន​កើន​ឡើង​៣០​ភាគ​រយ​រៀង​រាល់​ឆ្នាំ​គឺ​កើន​ឡើង​ពី​ទំហំ​១៣៦​១០៧​ហិកតា​នៅ​ក្នុង​ឆ្នាំ​២០០៩ ដល់​ទំហំ​១៨១​៤០០​ហិកតា​នៅ​ក្នុង​ឆ្នាំ​២០១០​ហើយ​បាន​កើន​ឡើង​២១​ហិកតា​ថែម​ទៀត​កាល​ពី​ឆ្នាំ​មុន​។

លោក​បន្ត​ថា ចំនួន​ប្រហែល​៤៥​ភាគ​រយ​បាន​មក​ពី​ម្ចាស់​កៅ​ស៊ូ​តូច​តាច​២៩​ភាគ​រយ​បាន​មក​ពី​ការ​ផ្តល់​សម្ប​ទាន​ដី​សេដ្ឋកិច្ច​និង​ចំនួន​២៦​ភាគ​រយ​ទៀត​បាន​មក​ពី​ចម្ការ​កៅ​ស៊ូ​កសិ​ឧស្សាហកម្ម​។ កាល​ពី​ឆ្នាំ​២០១០​គេ​បាន​ប្រមូល​ផល​ត្រឹម​តែ​២០​ភាគ​រយ​ប៉ុណ្ណោះ​ព្រោះ​ដំណាំ​ថ្មី​ត្រូវ​ការ​ពេល​វេលា​លូត​លាស់​។

បើ​តាម​គោល​ដៅ​របស់​រដ្ឋាភិបាល​ប្រទេស​កម្ពុជា​គឺ​ត្រូវ​បង្កើន​ដី​ដាំ​ដំណាំ​កៅ​ស៊ូ​សរុប​មាន​ទំហំ​៣០០​០០០​ហិកតា​ដែល​នឹង​ផ្ដល់​ជា​ជ័រ​បាន​ចំនួន​ប្រហែល​២៩០ ០០០​តោន​ត្រឹម​២០២០​។ នេះ​បើ​យោង​តាម​លោក​អគ្គនាយក​លី ផល្លា៕ PN

អត្ថបទគួរចាប់អារម្មណ៍