ភ្នំពេញៈ ប្រៃសណីយ៍កម្ពុជា (ប.ក) ដែលជាសហគ្រាសគ្រប់គ្រងដោយរដ្ឋបានណែនាំប្រធានសាខា ប.ក ទូទាំងប្រទេសឱ្យពន្លឿនការដឹកជញ្ជូនសេវាបញ្ញើឆាប់រហ័ស (EMS) ក្នុងស្រុក ដើម្បីចាប់យកចំណែកទីផ្សារបន្ថែមទៀត។
ការជំរុញសេវាបញ្ញើក្នុងស្រុកបានធ្វើឡើងបន្ទាប់ពីសេវាបញ្ញើអន្តរជាតិត្រូវរងផលប៉ះពាល់ពីការរីករាលដាលជំងឺកូវីដ ១៩។
សេចក្តីជូនដំណឹងចុះហត្ថលេខាដោយលោក អោក បូរ៉ា អគ្គនាយកប្រៃសណីយ៍កម្ពុជា (ប.ក) កាលពីថ្ងៃទី ១៩ ខែមីនា បានណែនាំដល់ប្រធានសាខា ប.ក នៅរាជធានី-ខេត្តទូទាំងប្រទេសត្រូវពន្លឿនសេវាដឹកជញ្ជូនបញ្ញើក្នុងប្រទេស។
សេចក្តីជូនដំណឹងឱ្យដឹងថា រាល់បញ្ញើឆាប់រហ័ស (EMS) ពីភ្នំពេញទៅបណ្តាខេត្ត និងពីបណ្តាខេត្តមកភ្នំពេញត្រូវចែកដល់ដៃអតិថិជននៅថ្ងៃបន្ទាប់ ហើយបញ្ញើពីខេត្តទៅខេត្តមានព្រំប្រទល់ជាប់គ្នា ឬនៅផ្លូវជាតិតែមួយត្រូវចែកដល់អតិថិជនក្នុងរយៈពេល ២៤ ម៉ោង (សេវា EMS និងភ័ស្តុភារកម្ម)។
សេចក្តីជូនដំណឹងបន្ថែមថា ចំណែកបញ្ញើពីខេត្តទៅខេត្តដែលត្រូវឆ្លងកាត់ទីក្រុងភ្នំពេញត្រូវចែកដល់ដៃអតិថិជនក្នុងរយៈពេល ៤៨ ម៉ោង (សេវា EMS) និងបញ្ញើអនុសិដ្ឋឆ្លងកាត់ខេត្ត ឬរាជធានីភ្នំពេញត្រូវចែកដល់អ្នកទទួលយ៉ាងយូរ ៣ ថ្ងៃ។ បញ្ញើអនុសិដ្ឋជាប្រភេទបញ្ញើដែលអតិថិជនត្រូវទទួលដោយផ្ទាល់ដៃ ឬនៅលំនៅឋានរបស់ខ្លួន។
សេចក្តីជូនដំណឹងបន្ថែមទៀតថា គ្រប់សាខា ប.ក ទាំងអស់ត្រូវជូនដំណឹងមកមជ្ឈមណ្ឌលភ័ស្តុភារកម្មនៅពេលមានបញ្ញើ ដើម្បីរៀបចំរថយន្តទៅទទួលបញ្ញើឱ្យទាន់ពេលវេលា។
អ្នកលក់ទំនិញតាមអនឡាញអ្នកស្រី ថុង ស្រីលក្ខណ៍ បានសម្គាល់ថា អតិថិជនដែលទិញទំនិញពីហាងរបស់ខ្លួនភាគច្រើនបានប្រើប្រាស់សេវាបញ្ញើរបស់ក្រុមហ៊ុន វីរៈ ប៊ុនថាំ អេចប្រេស ក្រុមហ៊ុន J&T និងក្រុមហ៊ុន កាពីតូល សម្រាប់ផ្ញើទំនិញទូទាំងប្រទេស។
អ្នកស្រីប្រាប់ថា៖ «ពួកគាត់ភាគច្រើនផ្ញើអីវ៉ាន់តាមក្រុមហ៊ុនទាំងនេះ ព្រោះសេវាកម្មលឿនរហ័ស ហើយគាត់ទទួលបញ្ញើទៅគ្រប់ទីកន្លែង។ ខ្ញុំបានសង្កេតឃើញថា ពួកគាត់ភាគច្រើនមិនដឹងថា ប្រៃសណីយ៍កម្ពុជាមានទទួលបញ្ញើទៅតាមបណ្តាខេត្តនោះទេ»។
លោក បូរ៉ា បានថ្លែងប្រាប់អ្នកសារព័ត៌មានក្នុងសន្និសីទសារព័ត៌មានមួយកាលពីខែមករាថា ប.ក កំពុងខិតខំប្រឹងប្រែងជំរុញសេវាបញ្ញើក្នុងស្រុកតាមរយៈការសហការជាមួយដៃគូឯកជនដើម្បីលើកកម្ពស់សេវាដឹកជញ្ជូន។
លោកនិយាយថា៖ «ដើម្បីបង្កើនចំណូលឡើងវិញ យើងនឹងស្រូបយកទីផ្សារក្នុងស្រុក យើងនឹងខិតខំស្វែងរកភ្នាក់ងារសម្រាប់ប្រមូលបញ្ញើ យើងត្រូវការពង្រឹងហេដ្ឋារចនាសម្ព័ន្ធភ័ស្តុភារកម្មបន្ថែមទៀត»។
បើតាមលោក បូរ៉ា ការរាតត្បាតជំងឺកូវីដ ១៩ បានធ្វើឱ្យចំណូលប្រៃសណីយ៍កម្ពុជាក្នុងឆ្នាំ ២០២០ មានចំនួន ៦,៥ លានដុល្លារ ធ្លាក់ ៤៦ ភាគរយ ធៀបឆ្នាំ ២០១៩ ដែលមានជាង ១៣ លានដុល្លារ៕ LA