.jpg)
កម្មករកំពុងធ្វើការក្នុងក្រុមហ៊ុនផលិតនំស្រួយ លីលី កាលពីពេលកន្លងមក។ ហុង មិនា
ភ្នំពេញៈ មន្ត្រីជាន់ខ្ពស់កម្ពុជាបានឲ្យដឹងថា សហគ្រាសខ្នាតតូច និងមធ្យម បានដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចជាតិ ទោះបីយ៉ាងណាវិស័យនេះមានបញ្ហាប្រឈមមួយចំនួនត្រូវការចូលរួមពីគ្រប់ភាគីពាក់ព័ន្ធដើម្បីដោះស្រាយ។
កិច្ចប្រជុំលើកទី ៨ នៃគណៈកម្មាធិការសម្របសម្រួលវិស័យសហគ្រាសខ្នាតតូចបំផុត ខ្នាតតូច និងមធ្យម អាស៊ាន ត្រូវបានធ្វើឡើងចាប់ពីថ្ងៃទី ២៥ ដល់ ២៩ ខែ វិច្ឆិកា ឆ្នាំ ២០១៩ នៅរាជធានភ្នំពេញដែលកម្ពុជារៀបចំឡើងក្នុងគោលបំណងជំរុញភាពប្រកួតប្រជែងក្នុងវិស័យនេះ។
លោក ឈា ឡាយហ៊ី ប្រធាននាយកដ្ឋានសហគ្រាសធុនតូច និងមធ្យម បានប្រាប់ភ្នំពេញប៉ុស្តិ៍ថា នេះជាលើកទី ២ ហើយដែលកម្ពុជាធ្វើជាម្ចាស់ផ្ទះរៀបចំកិច្ចប្រជុំនេះ ដើម្បីលើកកម្ពស់សហគ្រាសខ្នាតតូចបំផុត ខ្នាតតូច និងមធ្យមនៅកម្ពុជាក៏ដូចជានៅក្នុងតំបន់អាស៊ានផងដែរ។ លោកថ្លែងថា៖ «កិច្ចប្រជុំនេះនឹងពិភាក្សាអំពីបញ្ហាប្រឈមរបស់ SME និងអភិបាលកិច្ចនៅក្នុងវិស័យនេះ»។
លោកថា រដ្ឋាភិបាលកម្ពុជាបានចាត់ទុកវិស័យសហគ្រាសខ្នាតតូចបំផុតខ្នាតតូច និងខ្នាតមធ្យមជាឆ្អឹងខ្នងសេដ្ឋកិច្ចជាតិដ៏មានសារៈសំខាន់បំផុតក្នុងការចូលរួមចំណែកបង្កើនប្រាក់ចំណូលដល់ប្រជាពលរដ្ឋកម្ពុជា ការបង្កើតការងារថ្មីៗ ការនាំចេញទៅកាន់ទីផ្សារអន្តរជាតិ ការចាប់យកបច្ចេកវិទ្យាថ្មីៗ និងការកាត់បន្ថយភាពក្រីក្រ ដើម្បីចូលរួមចំណែកក្នុងការជំរុញកំណើនសេដ្ឋកិច្ចជាតិឲ្យសម្រេចបាននូវចក្ខុវិស័យឆ្នាំ ២០៣០ ដែលកម្ពុជានឹងប្រែក្លាយជាប្រទេសមានចំណូលមធ្យមកម្រិតខ្ពស់ និងឆ្នាំ ២០៥០ ជាប្រទេសមានចំណូលខ្ពស់។
លោកថ្លែងថា៖ «នេះជាឱកាសទាញយកគម្រោងពីដៃគូអភិវឌ្ឍន៍មកអនុវត្តដើម្បីជាប្រយោជន៍ដល់សហគ្រាសមីក្រូ តូច និងមធ្យមនៅកម្ពុជាយើង»។
អ្នកស្រី កែវ មុំ អគ្គនាយិកាក្រុមហ៊ុនផលិតនំស្រួយ លីលី បានឲ្យដឹងថា វិស័យឯកជនមានបញ្ហាប្រឈមជាច្រើនដូចជាលទ្ធភាពការទទួលបានហិរញ្ញប្បទាន ផលិតភាពទាប និងកង្វះទីផ្សារ។ អ្នកស្រីថ្លែងថា៖ «ខ្ញុំសង្ឃឹមថា ពួកគេអាចរកដំណោះស្រាយបន្ទាប់ពីកិច្ចប្រជុំនេះ»។
តាមការស្ទង់មតិលើវិស័យ SME ចំនួន ៧១ ស្ថាប័ន បង្ហាញថាពួកគេត្រូវការជំនួយលើស្តង់ដាអនាម័យ ស្វែងរកទីផ្សារ ការអភិវឌ្ឍសេវាកម្ម និងការវេចខ្ចប់ បច្ចេកវិទ្យា ធនធានមនុស្ស និងកម្លាំងពលកម្ម ការទទួលបានហិរញ្ញវត្ថុ ការចុះបញ្ជីអាជីវកម្ម និងការបង់ពន្ធជាដើម។ នេះបើតាមក្រសួងឧស្សាហកម្ម និងសិប្បកម្ម។
លោក ហេង សុខគង់ រដ្ឋមន្ត្រីស្តីទីក្រសួងឧស្សាហកម្ម និងសិប្បកម្មឲ្យដឹងថា ដើម្បីឆ្លើយតបទៅនឹងផែនការយុទ្ធសាស្ត្រអភិវឌ្ឍន៍វិស័យសហគ្រាសខ្នាតតូចបំផុត ខ្នាតតូច និងមធ្យម អាស៊ាន ២០១៦-២០២៥ កម្ពុជាបានធ្វើសេចក្តីព្រាងគោលនយោបាយគាំទ្រវិស័យនេះដែលបានផ្តោតលើគោលដៅ ៥ ចំណុច រួមមាន ទី១ ពង្រឹងបរិយាកាសគោលនយោបាយគាំទ្រ បទប្បញ្ញត្តិនានា ទី២ ជំរុញសហគ្រិនភាព និងការអភិវឌ្ឍធនធានមនុស្ស ទី៣ ជំរុញការលើកកម្ពស់ផលិតភាព បច្ចេកវិទ្យា និងនវានុវត្តន៍ ទី៤ ជំរុញការទទួលបានហិរញ្ញប្បទាន ទី៥ ជំរុញការចូលទៅកាន់ទីផ្សារបរទេស និងអន្តរជាតូបនីយកម្ម។
លោកបានថ្លែងថា៖ «រដ្ឋាភិបាលកម្ពុជាក៏បានត្រៀមខ្លួនរួចជាស្រេចក្នុងការធ្វើជាដៃគូជាមួយបណ្តាប្រទេសអាស៊ាន និងដៃគូអភិវឌ្ឍន៍នានា ដើម្បីពង្រឹងយន្តការគាំទ្រសហគ្រាសខ្នាតតូចបំផុតខ្នាតតូច និងមធ្យម សម្រាប់ធ្វើការប្រកួតប្រជែងទាំងទីផ្សារក្នុងតំបន់ និងអន្តរជាតិ»៕
