ហុងកុងៈ ទ្រព្យសម្បត្តិរបស់មហាសេដ្ឋីក្នុងទីក្រុងហុងកុងត្រូវបានបាត់បង់ ២០ ពាន់លានដុល្លារកាលពីឆ្នាំមុនក្នុងរបាយការណ៍របស់ទស្សនាវដ្តី Forbes ដោយសារកំណើនយឺតនៃសេដ្ឋកិច្ចចិន ភាពតានតឹងផ្នែកពាណិជ្ជកម្ម ការធ្លាក់ចុះតម្លៃភាគហ៊ុន និង ការចុះខ្សោយទីផ្សារអចលនទ្រព្យតម្លៃទាបបំផុតរបស់ពិភពលោក។
មជ្ឈមណ្ឌលហិរញ្ញវត្ថុភាគខាងត្បូងរបស់ចិនមួយនេះ ពោរពេញទៅដោយពួកសេដ្ឋីដ៏ច្រើនមួយក្នុងពិភពលោក។
ប៉ុន្តែអ្នកដែលមានទ្រព្យសម្បតិ្តច្រើនបំផុត បានឆ្លងកាត់ឆ្នាំដ៏ពិបាកមួយមិនធម្មតាកាលពីឆ្នាំ ២០១៨។ នេះបើយោងតាមបញ្ជីចុងក្រោយនៃមហាសេដ្ឋីមានប្រាក់ច្រើនជាងគេទាំង ៥០ រូបរបស់ទីក្រុងនេះ ដែលចេញផ្សាយដោយទស្សនាវដ្តី Forbes កាលពីល្ងាចថ្ងៃពុធ។
ទ្រព្យសម្បត្តិរួមរបស់ក្រុមមហាសេដ្ឋីរួមបញ្ចូលគ្នាទៅហុងកុងបានធ្លាក់ចុះជាង ២០ ពាន់លានដុល្លារមកនៅ ២៨៦,៧៥ ពាន់លានដុល្លារកាល ពីឆ្នាំ ២០១៨ ផ្ទុយស្រឡះនឹងឆ្នាំ ២០១៧ មុនពេលទ្រព្យសម្បត្តិទាំងនោះ កើនឡើងជារួមពី ៦០ ពាន់លានដុល្លារ ដល់ ៣០៧ ពាន់លានដុល្លារ។
លោកស្រី Pollyanna Chu ដែលជាសហគ្រិនស្ដ្រីឆ្អើមរបស់ទីក្រុងនេះ បានមើលឃើញការធ្លាក់ចុះយ៉ាងខ្លាំងផ្នែកទ្រព្យសម្បត្តិបុគ្គល។ នេះបើយោងតាមការប៉ាន់ប្រមាណរបស់ Forbes ដែលធ្លាក់ចុះ ៧៥ ភាគរយមកនៅត្រឹម ៣,៣ ពាន់លានដុល្លារ។
ទ្រព្យសម្បត្តិរបស់លោកស្រី តាមរយៈក្រុមហ៊ុន Kingston Financial ដ៏មានឥទ្ធិពលផ្នែកហិរញ្ញវត្ថុ ងាយរងគ្រោះជាពិសេសដោយសារតែការជួញដូរដែលមានបញ្ហាច្រើនលើផ្សារហ៊ុនរបស់ទីក្រុងហុងកុង ដែលបានធ្លាក់ចុះ ៩,៤ ភាគរយកាលពីឆ្នាំមុន។
លោក Lui Che-woo ប្រធានក្រុមហ៊ុន Galaxy បានខាតបង់ ៤,២ ពាន់លានដុល្លារ ខណៈតម្លៃភាគហ៊ុនកាស៊ីណូម៉ាកាវ បានធ្វើឲ្យប៉ះពាល់យ៉ាងខ្លាំងដល់ទ្រព្យសម្បត្តិរបស់លោកស្រី Pansy Ho និងលោក Lawrence Ho ជាប្អូនប្រុសលោកស្រី។
លោក Dickie Wong អ្នកវិភាគមកពីក្រុមហ៊ុន Kingston Securities ឲ្យដឹងថា ទ្រព្យសម្បតិ្តរបស់មហាសេដ្ឋីរបស់ទីក្រុងនេះជារឿយៗត្រូវបានជាប់ទាក់ទងយ៉ាងជិតស្និទ្ធនឹងទ្រព្យសម្បត្តិរបស់ផ្សារហ៊ុន។ ប៉ុន្តែលោកបន្ថែមថា មានឧបសគ្គផ្សេងទៀត ។
លោកបានប្រាប់ទីភ្នាក់ងារព័ត៌មាន AFP ថា៖ «ការធ្លាក់ចុះសេដ្ឋកិច្ចរបស់ប្រទេស ចិន និងសង្គ្រាមពាណិជ្ជកម្មរវាងប្រទេស ចិន និងអាមេរិក ទាំង ២ នេះនឹងនៅតែមិនច្បាស់លាស់ ប្រសិនបើយើងនិយាយអំពីសេដ្ឋកិច្ច និងផ្សារហ៊ុននៅឆ្នាំនេះ»។ ភាពតានតឹងផ្នែកពាណិជ្ជកម្ម ធ្វើឲ្យប៉ះពាល់រួចហើយដល់អ្នកមានទ្រព្យសម្បត្តិច្រើនជាងគេមួយចំនួនរបស់ទីក្រុងហុងកុង។
លោក Yeung Kin-Man និងលោកស្រី Lam Wai Ying ដែលជាប្ដី ប្រពន្ធ នៅពីក្រោយក្រុមហ៊ុន Biel Crystal ជាក្រុមហ៊ុនផលិតអេក្រង់ទូរស័ព្ទ iPhone ឈានមុខគេ បានមើលឃើញតម្លៃទ្រព្យសុទ្ធរបស់ពួកគេធ្លាក់ចុះប្រហែល ៦,៤ ពាន់លានដុល្លារ ឬ៥៧ ភាគរយ។ ក្រុមហ៊ុន Apple បានមើលឃើញការលក់មានដំណើរការយឺតនៅពេលថ្មីៗ ជាពិសេសនៅក្នុងប្រទេស ចិន។
លោក Li Ka-shing ជាបុរសមានទ្រព្យសម្បត្តិច្រើនជាងគេរបស់ទីក្រុងហុងកុង ដែលបានស្ថិតនៅក្នុងបញ្ជីនេះ ចាប់តាំងពីបញ្ជីនេះបានចេញផ្សាយកាលពីឆ្នាំ ២០០៨ បានមើលឃើញពីការបាត់បង់ទ្រព្យ ប្រហែល ៤ ពាន់លានដុល្លារ។
ទោះបីយ៉ាងនេះក្តី ជាមួយនឹងទឹកប្រាក់ ៣២ ពាន់លានដុល្លារ លោកនៅតែរក្សាការនាំមុខគេ ខណៈលោក Lee Shau Kee ជាមហាសេដ្ឋីអចលនទ្រព្យដែលមានទឹកប្រាក់ ៣០ ពាន់លានដុល្លារ៕ AFP/LA