.jpg)
ឡូហ្គោរបស់ធនាគារ ABA ការិយាល័យកណ្តាល។ ហេង ជីវ័ន
ភ្នំពេញៈ បណ្ណបំណុលរបស់ធនាគារវឌ្ឍនៈអាស៊ី លីមីតធីត (Advanced Bank of Asia Limited) ដែលជាធនាគារពាណិជ្ជឈានមុខគេមួយនៅកម្ពុជាបានក្លាយជាបណ្ណបំណុលដំបូងគេដែលត្រូវបានជួញដូរនៅផ្សារមូលបត្រកម្ពុជា (CSX) កាលពីសប្តាហ៍មុនដែលបើកទំព័រថ្មីមួយ សម្រាប់ការជួញដូរបណ្ណបំណុល។
យោងតាមសេចក្ដីប្រកាសព័ត៌មានរបស់ CSX កាលពីថ្ងៃព្រហស្បតិ៍មុន បណ្ណបំណុលធនាគារ ABA ត្រូវបានជួញដូរក្នុងតម្លៃ ១០០,០០០ រៀល មួយយូនីត និងក្លាយជាបណ្ណបំណុលដំបូងដែលត្រូវបានជួញដូរនៅលើទីផ្សារបន្ទាប់ ដោយមានទិន្នផល ៨,៧៨៣ ភាគរយ និងមានការជួញដូរសរុបចំនួន ៣៨ យូនីត គិតជាទឹកប្រាក់មានប្រមាណ ៣,៨ លានរៀល។
សេចក្ដីប្រកាសនេះបន្តថា៖ «ថ្ងៃនេះមានការជួញដូរបណ្ណបំណុលជាលើកដំបូងនៅ CSX គិតចាប់ពីពេលដែលបណ្ណបំណុលដំបូងត្រូវបានចុះបញ្ជីនៅ CSX កាលពីថ្ងៃទី ៥ ខែ ធ្នូ ឆ្នាំ ២០១៨»។
លោកស្រី គឹម សុផានីតា ប្រធានស្តីទីនាយកដ្ឋានប្រតិបត្តិការទីផ្សារនៃ CSX បានប្រាប់ភ្នំពេញប៉ុស្ដិ៍កាលពីថ្ងៃពុធថា នៅថ្ងៃទី ៥ ខែ ធ្នូ ឆ្នាំ ២០១៩ មានការជួញដូរលើកដំបូងនៃបណ្ណបំណុលធនាគារ ABA ហើយវាក៏ជាការជួញដូរបណ្ណបំណុលលើកដំបូងផងដែរនៅ CSX។ វាជាការជួញដូរលក់រាយរវាងរូបវន្តបុគ្គលកម្ពុជាទាំងអ្នកទិញ និងអ្នកលក់។
លោកស្រីថ្លែងថា៖ «វាជាកាលបរិច្ឆេទជាប្រវត្ដិសាស្ដ្រដែលបង្ហាញថា ក្រុមវិនិយោគិនពិតជាអាចជួញដូរបណ្ណបំណុលបាននៅទីផ្សារតាមរយៈ CSX»។
លោកស្រីបញ្ជាក់ថា៖ «ក្រុមវិនិយោគិន បណ្ណបំណុលគឺអ្នកដែលចង់បានប្រាក់ចំណូលថេរ។ វាស្រដៀងគ្នានឹងការដាក់ប្រាក់បញ្ញើដែលមានការប្រាក់ថេរក្នុងធនាគារដែរ ប៉ុន្តែអ្វីដែលធ្វើឲ្យបណ្ណបំណុលមានលក្ខណពិសេសជាងការដាក់ប្រាក់បញ្ញើនៅធនាគារនោះគឺថាក្រុមវិនិយោគិនបណ្ណបំណុលអាចលក់វាពីមនុស្សម្នាក់ទៅម្នាក់ទៀតមុនពេលដល់កាលបរិច្ឆេទកំណត់ក្នុងតម្លៃព្រមព្រៀងគ្នា ដូច្នេះពួកគេអាចទទួលបានអត្រាការប្រាក់មួយចំនួនមកវិញ»។
លោកស្រីបន្តថា៖ «នៅពេលបណ្ណបំណុលមួយត្រូវបានចុះបញ្ជីនៅ CSX វាបើកចំហសម្រាប់សាធារណជន ដើម្បីទិញពីអ្នកកាន់បណ្ណបំណុលដែលមានស្រាប់។ ប៉ុន្តែការជួញដូរអាចធ្វើឡើងលុះត្រាតែមានអ្នកលក់ និងអ្នកទិញ ដោយតម្លៃរបស់ពួកគេអាចផ្គូផ្គងបាន»។
យោងតាមលោកស្រី សុផានីតា បណ្ណបំណុលត្រូវបានជួញដូរក្នុងតម្លៃចុះភាគរយដោយសារតែអ្នកលក់បានលក់វាក្រោមតម្លៃចារឹក។ មានន័យថា វាត្រូវបានលក់ក្នុងតម្លៃទាបបំផុតដែលស្ថិតក្រោមតម្លៃរបស់បណ្ណបំណុល។ បន្ទាប់ពីមានការជួញដូរខាងលើនេះទិន្នផលទីផ្សារ (អត្រាគូប៉ុង) របស់បណ្ណបំណុលធនាគារ ABA បានប្រែប្រួលពី ៧,៥ ភាគរយ ដល់ ៨,៧៨ ភាគរយ។
លោក Igor Zimarev ប្រធានផ្នែកទីផ្សារ និងជាលេខាធិការសាជីវកម្មរបស់ធនាគារ ABA បានសរសេរមកភ្នំពេញប៉ុស្ដិ៍កាលពីថ្ងៃពុធថា បច្ចុប្បន្នទំហំសរុបនៃបណ្ណបំណុលដែលចុះបញ្ជីនៅផ្សារមូលបត្រកម្ពុជាមានចំនួន ២៨៤,៨ ពាន់លានរៀល ក្នុងនោះបណ្ណបំណុលសាជីវកម្មរបស់ធនាគារ ABA មានតម្លៃចំនួន ៨៤,៨ ពាន់លានរៀល ដែលធ្វើឲ្យទំហំបណ្ណបំណុលរបស់ធនាគារ ABA មានចំណែក ៣០ ភាគរយនៃទីផ្សារ។
លោកថ្លែងថា៖ «ភាគហ៊ុនរបស់ធនាគារ ABA មិនត្រូវបានជួញដូរនៅទីផ្សារនេះទេ។ អ្វីដែលយើងបានបោះផ្សាយកាលពីខែសីហា ឆ្នាំ ២០១៩ មិនមែនជាភាគហ៊ុននោះទេ ប៉ុន្តែជាបណ្ណបំណុលសាជីវកម្មដែលជាបណ្ណបំណុលលើកដំបូងពីធនាគារពាណិជ្ជ ជាបណ្ណបំណុលលើកដំបូងដែលមានចំណាត់ថ្នាក់ឥណទានអន្តរជាតិ និងជាបណ្ណបំណុលលើកដំបូងដែលបានផ្ដល់ទៅឲ្យវិនិយោគិនលក់រាយ»។
លោកបន្ថែមថា៖ «យើងជឿជាក់ថា ការចុះបញ្ជីបណ្ណបំណុលសាជីវកម្មមានរូបភាពល្អសម្រាប់ធនាគារ ABA ដោយសារតែវាបង្ហាញតម្លាភាពនៃប្រតិបត្តិការ និងការប្ដេជ្ញាចិត្តដ៏រឹងមាំរបស់យើងចំពោះវិស័យហិរញ្ញវត្ថុ។ យើងក៏សង្ឃឹមថា បណ្ណបំណុលរបស់យើងរួមចំណែកដល់ការអភិវឌ្ឍទីផ្សារមូលធនដោយផ្ដល់ជូនក្រុមវិនិយោគិននូវឧបករណ៍កាន់តែច្រើនទៀតសម្រាប់សកម្មភាពរបស់ពួកគេ ព្រមទាំងការលើកកម្ពស់រូបិយប័ណ្ណជាតិ»។
លោក ព្រំ វិសុទ្ធ ប្រធាននាយកប្រតិបត្តិក្រុមហ៊ុន Ac-leda Securities បានថ្លែងថា ធនាគារ ABA គឺជាក្រុមហ៊ុនទី ៣ ដែលបានបោះផ្សាយបណ្ណបំណុលនៅ CSX ប៉ុន្តែការបោះផ្សាយបណ្ណបំណុលរបស់ពួកគេគ្របដណ្ដប់ទាំងលើក្រុមវិនិយោគិនលក់រាយ និងវិនិយោគិនស្ថាប័ន។ តម្លៃចារឹករបស់បណ្ណបំណុលនីមួយៗមានតម្លៃ ១០០ ០០០ រៀល និងចំនួនឯកតាបណ្ណបំណុលដែលបានបោះផ្សាយមានចំនួន ៨៤៨ ២១០ យូនីត ដោយមានអ្នកកាន់បណ្ណបំណុល (វិនិយោគិន) ៦៥ នាក់។
លោកបញ្ជាក់ថា៖ «ទីផ្សារបណ្ណបំណុល គឺជាទីផ្សារដែលជួញដូរបណ្ណបំណុលដែលត្រូវបានបោះផ្សាយដោយក្រុមហ៊ុនបោះផ្សាយនៅផ្សារ CSX។ សកម្មភាពជួញដូរបានកើតមានឡើងនៅពេលដែលមានអ្នកទិញ និងអ្នកលក់នៅលើទីផ្សារនេះ»។
ធនាគារ ABA ដែលជាក្រុមហ៊ុនបោះផ្សាយបណ្ណបំណុលទី ៣ បន្ទាប់ពីគ្រឹះស្ថានមីក្រូហិរញ្ញវត្ថុ LOLC និងគ្រឹះស្ថានមីក្រូហិរញ្ញវត្ថុ Hattha Kaksekar Limited បានចុះបញ្ជីនៅ CSX កាលពីខែសីហា។
បណ្ណបំណុលនេះមាននិមិត្តសញ្ញាជួញដូរ « ABAA22A»។ បណ្ណបំណុលធនាគារ ABA មានតម្លៃសរុប ៨៤,៨២១ ពាន់លានរៀល (ប្រហែល ២១ លានដុល្លារ) រយៈកាលកំណត់របស់បណ្ណបំណុលនេះគឺ ៣ ឆ្នាំ និងអត្រាគូប៉ុងមាន ៧,៧៥ ភាគរយក្នុង ១ ឆ្នាំ៕ LA
