ភ្នំពេញៈ នៅដើមសប្តាហ៍នេះមូលនិធិ Asia Foundation បានប្រកាសភាពជាដៃគូរយៈពេល ៣ ឆ្នាំជាមួយ Smart Axiata ជាប្រតិបត្តិករទូរគមនាគមន៍ក្នុងស្រុកដើម្បីបង្កើតបណ្ណាល័យឌីជីថលជាសៀវភៅក្មេងៗភាសាខ្មែរ ដែលនឹងត្រូវបោះពុម្ពផ្សាយលើអនឡាញដោយមិនគិតថ្លៃ។
លោកស្រី Meloney Lindbergh តំណាងប្រចាំប្រទេសទទួលបន្ទុក Asia Foundation មានមូលដ្ឋាននៅអាស៊ីបានឲ្យដឹងថា សៀវភៅអេឡិចត្រូនិកនេះនឹងលើកកម្ពស់ការយល់ដឹង និងផ្សព្វផ្សាយប្រធានបទសំខាន់ៗដែលរួមទាំងការផ្ដល់អំណាចដល់ស្ដ្រីផងដែរ។
លោកស្រីបានថ្លែងនៅក្នុងព្រឹត្តិការណ៍កាលពីថ្ងៃចន្ទថា៖ «យើងចង់ផ្ញើសារថា ការអានជាសសរស្ដម្ភមួយក្នុងចំណោមសសរស្ដម្ភជាច្រើនដែលតម្រូវឲ្យមានការលើកកម្ពស់ការអប់រំដ៏រឹងមាំ»។
ភាពជាដៃគូនេះគឺជាផ្នែកមួយនៃយុទ្ធនាការ «ចូរយើងអាន» របស់ NGO ដែលបានផ្តល់អត្ថប្រយោជន៍រួចហើយពីការឧបត្ថម្ភរបស់ក្រុមហ៊ុន Smart។
នៅក្នុងព្រឹត្តិការណ៍នេះ អ្នកនិពន្ធសៀវភៅក្មេងៗក្នុងស្រុកជាងគំនូរ និងអ្នកបោះពុម្ពផ្សាយបានរួមគ្នាដើម្បីបង្កើតសៀវភៅរឿងឌីជីថលជាភាសាខ្មែរ។ ព្រឹត្តិការណ៍ ២ នេះបានធ្វើឲ្យមានការបោះពុម្ពផ្សាយសៀវភៅក្មេងៗចំនួន ១៦ ចំណងជើងរួចហើយនៅលើគេហទំព័រ «ចូរយើងអាន» ហើយក្រុមហ៊ុន Smart បានប្ដេជ្ញាក្នុងការឧបត្ថម្ភ ៦ ព្រឹត្តិការណ៍ទៀតនៅក្នុងរយៈពេល ៣ ឆ្នាំក្រោយ។
បើតាមលោកស្រី Lindbergh ព្រឹត្តិការណ៍ខាងមុខទំនងជាមានសៀវភៅក្មេងៗ៥០ បន្ថែមទៀតដែលបោះពុម្ពផ្សាយដោយក្រុមអ្នកនិពន្ធនៅកម្ពុជា និង ៥០ ចំណងជើងបន្ថែមទៀតមកពីជុំវិញអាស៊ីអាគ្នេយ៍ដែលត្រូវបានបកប្រែជាភាសាខ្មែរ។ សៀវភៅនោះនឹងបន្ថែមលើសៀវភៅក្មេងៗជាង ១០០ ចំណងជើង នៅពេលបច្ចុប្បន្នដែលមានគេហទំព័រ «ចូរយើងអាន»។
លោក Kanishka Wickrama ប្រធានផ្នែកហិរញ្ញវត្ថុនៅក្រុមហ៊ុន Smart បានថ្លែងថាក្រុមហ៊ុននេះបានខិតខំក្នុងការលើកកម្ពស់ការអប់រំនៅក្នុងប្រទេសកម្ពុជា និងបានកត់សម្គាល់ថា ក្រុមហ៊ុនទូរគមនាគមន៍មួយនេះ «ចង់ធ្វើដៃគូជាមួយក្រុមហ៊ុនណាមួយដែលផ្ដោតលើការបង្កើនការយល់ដឹង»។
លោកបានថ្លែងថា៖ «វាមានសារៈសំខាន់សម្រាប់ពួកយើងក្នុងការដាក់ឲ្យប្រើប្រាស់អំណាចបច្ចេកវិទ្យា ដើម្បីកែលម្អការអប់រំដោយការបង្កើតគេហទំព័រសៀវភៅអេឡិចត្រូនិក»។
លោក អ៊ឹម ខួច រដ្ឋលេខាធិការក្រសួងអប់រំដែលបានចូលរួមក្នុងព្រឹត្តិការណ៍កាលពីថ្ងៃចន្ទបានសរសើរភាពជាដៃគូរវាងក្រុមហ៊ុនបច្ចេកវិទ្យា និង NGO។ លោកថ្លែងថា៖ «នៅក្នុងប្រទេសកម្ពុជាមានការខ្វះខាតសៀវភៅសិក្សា ហើយវាពិបាកក្នុងការដឹកជញ្ជូនសៀវភៅទៅតាមខេត្តនានា»។ លោក កត់សម្គាល់ថាសៀវភៅអាចទទឹកភ្លៀងក្នុងអំឡុងរដូវវស្សា និងត្រូវខូច។
លោកបានបន្តថា៖ «ដូច្នេះ វាមានសារៈសំខាន់ខ្លាំងណាស់ក្នុងការមានបណ្ណាល័យឌីជីថលនេះ សម្រាប់សៀវភៅអប់រំ»៕LA