ភ្នំពេញៈ Entrepreneurs’ Organization (EO) ដែលជាបណ្តាញនៃក្រុមអ្នកជំនួញអន្តរជាតិកំពុងស្វែងរកការបង្កើតវត្តមានរបស់ខ្លួននៅកម្ពុជា ខណៈថ្នាក់ដឹកនាំរបស់បណ្តាញនេះរំពឹងថានឹងផ្តល់នូវអត្ថប្រយោជន៍ច្រើនដល់កម្ពុជា។
EO ដែលជាបណ្តាញនៃក្រុមអ្នកជំនួញធំៗលើពិភពលោក ដែលត្រូវបានបង្កើតឡើងនៅសហរដ្ឋអាមេរិកក្នុងឆ្នាំ ១៩៨៧ កំពុងមានវត្តមានក្នុងប្រទេសចំនួន ៥៧ ទូទាំងពិភពលោក ដោយបច្ចុប្បន្នមានម្ចាស់អាជីវកម្ម និងវិនិយោគិនជាង ១៣ ០០០ នាក់ទូទាំងពិភពលោកជាសមាជិក ក្នុងនោះតំបន់អាស៊ីមាន ២ ៣១៥ នាក់។
ក្នុងបទបង្ហាញស្តីពីអត្ថប្រយោជន៍របស់ EO ដល់ម្ចាស់សហគ្រិនធំៗនៅកម្ពុជាជាង ១០ រូបកាលពីថ្ងៃចន្ទ លោកស្រី Rosemary Tan Mei Leng សមាជិកជាន់ខ្ពស់នៃ EO បាននិយាយថា លោកស្រីចង់ជួយឲ្យសហគ្រិនកម្ពុជាកាន់តែមានភាពរីកចម្រើន។
លោកស្រីបន្តថា សមាជិក EO នឹងទទួលនូវអត្ថប្រយោជន៍សំខាន់មួយចំនួនដូចជា ការផ្ទេរ និងសិក្សាពីបទពិសោធផ្ទាល់ខ្លួន និងមុខជំនាញជាមួយសមាជិកផ្សេងៗទៀត ការទទួលបទពិសោធពីអ្នកជំនាញ និងការចូលរួមក្នុងសមាជលំដាប់អន្តរជាតិជាដើម។ លោកស្រីបញ្ជាក់ថា៖ «ខ្ញុំសង្ឃឹមថា EO នឹងជួយឲ្យប្រទេស កម្ពុជា រីកចម្រើនកាន់តែលឿន»។
ខណៈលក្ខន្តិកៈរបស់ EO កំណត់ថា ដើម្បីអាចបើកសាខា (Chapter) នៅក្នុងប្រទេសមួយបានលុះត្រាតែមានសមាជិកយ៉ាងតិច ១៦ រូប។
លោកស្រីបញ្ជាក់ថា៖ «ដោយសារពេលនេះយើងមិនទាន់មានសមាជិកគ្រប់ ដូច្នេះយើងនឹងរង់ចាំដល់មានសមាជិកយ៉ាងតិច ១៦ រូបទើបយើងបើកដំណើរការនៅកម្ពុជា»។
បើតាមលោកស្រី Rosemary Tan Mei Leng កម្ពុជាអាចនឹងក្លាយជាប្រទេសទី ៧ នៅក្នុងតំបន់អាស៊ានដែលមានវត្តមានបន្ទាប់ពីប្រទេស ម៉ាឡេស៊ី ឥណ្ឌូនេស៊ី សិង្ហបុរី ហ្វីលីពីន ថៃ និងវៀតណាម។
ដើម្បីអាចក្លាយជាសមាជិកបានលុះត្រាបុគ្គលនោះជាស្ថាបនិក សហស្ថាបនិកជាម្ចាស់ ឬជាភាគទុនិកមានសិទ្ធិគ្រប់គ្រងរបស់ក្រុមហ៊ុនមួយ និងជាបុគ្គលដែលកំពុងកាន់កាប់តួនាទីមួយក្នុងចំណោមតួនាទីខាងលើ នៅក្នុងក្រុមហ៊ុនដែលមានចំណូលអប្បបរមា ១ លានដុល្លារក្នុង ១ ឆ្នាំ។
លោក គុយ វ៉ាត ដែលបានចូលរួមជាសមាជិក EO បានប្រាប់ថា បណ្តាញអ្នកជំនួញនេះនឹងជួយឲ្យសហគ្រិនធំៗនៅកម្ពុជាមានឱកាសកាន់តែច្រើនក្នុងការជួបជាមួយអ្នកជំនួញធំៗលំដាប់ពិភពលោកដើម្បីផ្លាស់ប្តូរបទពិសោធ និងសិក្សាពីគេពិសេសសហគ្រិននៅកម្ពុជាក៏អាចធ្វើការផ្សព្វផ្សាយ និងស្វែងរកទីផ្សារអន្តរជាតិផងដែរ។
លោកបន្តទៀតថា៖ «ក្រុមសហគ្រិនរបស់យើងបានទាក់ទងទៅ EO ព្រោះដោយសារបច្ចុប្បន្ននេះសង្កេតឃើញថា មានក្រុមសហគ្រិននៅកម្ពុជាកាន់តែច្រើនបានបង្ហាញពីទំនោរក្នុងការចេញទៅវិនិយោគនៅបរទេស»។
លោកបន្តថា ម៉្យាងទៀតតាមរយៈការបង្កើតការភ្ជាប់ទំនាក់ទំនងកាន់តែទូលាយនេះវានឹងអាចជួយទាក់ទាញឲ្យមានការចូលមកវិនិយោគពីបរទេសនៅកម្ពុជាបន្ថែមទៀតផង។
លោកបញ្ជាក់ថា៖ «ការបង្កើនទំនាក់ទំនងជាមួយសហគ្រិនធំៗ និងការចូលមកវិនិយោគផ្ទាល់ពីបរទេសគឺជាក្តីប៉ងប្រាថ្នារបស់យើង»៕LA