.jpg)
ទិដ្ឋភាពភ្ញៀវចូលរួមក្នុងពិធីបុណ្យសមុទ្រនៅខេត្តកំពតលើកទី ១ កាលពីឆ្នាំ ២០១៥។ ហេង ជីវ័ន
កំពតៈ គិតមកទល់ថ្ងៃនេះមានបន្ទប់សណ្ឋាគារ និងផ្ទះសំណាក់ប្រមាណ ៥០ ភាគរយ ត្រូវបានកក់សម្រាប់ពិធីបុណ្យសមុទ្រលើកទី ៨ ដែលនឹងត្រូវរៀបចំឡើងរយៈពេល ៣ ថ្ងៃ ក្នុងខេត្តកំពតនៅខែក្រោយ។
ពិធីបុណ្យសមុទ្រនឹងចាប់ផ្តើមពីថ្ងៃទី ២០ ដល់ថ្ងៃទី ២២ ខែធ្នូ នៅតាមបណ្តោយវិថីសម្ដេចសង្ឃ ជួន ណាត ខេត្តកំពត។ នេះជាលើកទី ២ ហើយដែលខេត្តកំពតធ្វើជាម្ចាស់ផ្ទះ បន្ទាប់ពីលើកទី ១ កាលពីឆ្នាំ ២០១៥ ។
លោក សយ ស៊ីណុល ប្រធានមន្ទីរទេសចរណ៍ខេត្តកំពតបានប្រាប់ភ្នំពេញប៉ុស្តិ៍កាលពីម្សិលមិញថា ភ្ញៀវភាគច្រើនមកពីរាជធានីភ្នំពេញហើយលោករំពឹងថា ព្រឹត្តិការណ៍ឆ្នាំនេះនឹងទទួលបានភ្ញៀវទេសចរជាតិ និងអន្តរជាតិច្រើនជាងឆ្នាំ ២០១៥។
តាមទិន្នន័យក្រសួងទេសចរណ៍ក្នុងពិធីបុណ្យសមុទ្រនៅខេត្តកំពតលើកទី ១ កាលពីឆ្នាំ ២០១៥ មានភ្ញៀវទេសចរជាតិ និងអន្តរជាតិប្រមាណ ៣០ ម៉ឺននាក់បានចូលរួម។
បច្ចុប្បន្នក្នុងខេត្តកំពតមានសណ្ឋាគារចំនួន ១៨ ចំណែកផ្ទះសំណាក់ និងបាងហ្គាឡូមានប្រមាណ ២៤៦ កន្លែង។ ជារួមបន្ទប់ស្នាក់នៅក្នុងខេត្តកំពត មានសរុបប្រហែល ៣ ៥០០។ នេះបើតាមលោក ស៊ីណុល។
លោកបានបន្តថារហូតមកទល់ពេលនេះខាងអាជ្ញាធរខេត្តបានធ្វើកិច្ចការជាច្រើនរួចមកហើយដូចជា ការជួសជុលហេដ្ឋារចនាសម្ព័ន្ធ ការកែលម្អសោភណភាពទីក្រុង និងអនាម័យជាដើម ដើម្បីត្រៀមទទួលភ្ញៀវដ៏ច្រើនដែលនឹងធ្វើដំណើរមកចូលរួមក្នុងពិធីបុណ្យសមុទ្រនាពេលខាងមុខ។
លោក តុប សុភ័ក អ្នកនាំពាក្យក្រសួងទេសចរណ៍បាននិយាយថា ពិធីបុណ្យសមុទ្រនឹងផ្តល់ផលប្រយោជន៍ជាច្រើនសម្រាប់វិស័យទេសចរណ៍ និងកំណើនសេដ្ឋកិច្ចជាតិ ព្រោះតាមរយៈព្រឹត្តិការណ៍នេះកេរ្តិ៍ឈ្មោះរបស់ខេត្តជាម្ចាស់ផ្ទះនឹងត្រូវបានផ្សព្វផ្សាយយ៉ាងទូលំទូលាយទៅដល់ភ្ញៀវទេសចរទូទាំងពិភពលោក។
លោកថ្លែងថា៖ «ក្រសួងទេសចរណ៍កំពុងជំរុញឲ្យមានការស្នាក់នៅតាមផ្ទះប្រជាពលរដ្ឋ Home Stay ដើម្បីដោះស្រាយកន្លែងស្នាក់នៅក្នុងពិធីបុណ្យសមុទ្រខាងមុខ»។
លោក សុខ ដូច អ្នកទទួលភ្ញៀវនៃសណ្ឋាគារ Two Moons Hotel បាននិយាយថា សម្រាប់រយៈពេល ៣ ថ្ងៃ ក្នុងពិធីបុណ្យសមុទ្រនាពេលខាងមុខ បន្ទប់ទាំងអស់នៃសណ្ឋាគាររបស់លោកត្រូវបានអតិថិជនកក់អស់ហើយដោយតម្លៃបានកើនឡើងតិចតួចបំផុត។ លោកអះអាងថា៖ «បន្ទប់សណ្ឋាគារ Two Moons Hotel ត្រូវបានអតិថិជនកក់អស់ដោយតម្លៃបានកើនឡើងប្រមាណ ៥ ដុល្លារ ខ្ពស់ជាងពេលធម្មតា»។
លោក ម៉ាត់ លី អ្នកទទួលភ្ញៀវ និងកក់នៃសណ្ឋាគារ Makk Hotel បានប្រាប់ថាក្នុងចំណោមបន្ទប់ទាំងជាង ២០ មានប្រហែល ៨០ ភាគរយ ត្រូវបានអតិថិជនកក់តាមអនឡាញអស់ហើយ។ បើតាមការប៉ាន់ស្មាន បន្ទប់ទាំងអស់ក្នុងខេត្តកំពតនឹងត្រូវអតិថិជនកក់អស់ក្នុងពេលឆាប់ៗនេះ។ លោកបន្តថា៖ «សម្ទុះនៃការកក់នឹងកើនឡើងលឿន ហើយអាចនឹងពេញក្នុងពេលឆាប់ៗ»។
ពិធីបុណ្យសមុទ្រត្រូវបានរៀបចំឡើងជាលើកដំបូងក្នុងឆ្នាំ ២០១២ ក្នុងខេត្តព្រះសីហនុ។ ពិធីនេះតែងប្រារព្ធធ្វើឡើងជារៀងរាល់ឆ្នាំ ដោយប្តូរវេនគ្នានៅក្នុងចំណោមខេត្តទាំង ៥ ដែលនៅជាប់សមុទ្ររួមមាន ខេត្តកំពត ព្រះសីហនុ កោះកុង និងខេត្តកែប។ កាលពីឆ្នាំ ២០១៨ កន្លងមកបុណ្យសមុទ្រត្រូវបានរៀបចំធ្វើក្នុងខេត្តកោះកុង៕ LA
វីដេអូ៖
