The Phnom Penh Post Search

Search form

Logo of Phnom Penh Post newspaper Phnom Penh Post - បន្ទប់​ស្នាក់នៅ ​ត្រូវ​បាន​កក់​ស្ទើរ​អស់​សម្រាប់​ពិធីបុណ្យ​សមុទ្រ

បន្ទប់​ស្នាក់នៅ ​ត្រូវ​បាន​កក់​ស្ទើរ​អស់​សម្រាប់​ពិធីបុណ្យ​សមុទ្រ

Content image - Phnom Penh Post
ទិដ្ឋភាព​ជិះ​កង់​ជា​ក្រុម​ក្នុង​ពិធីបុណ្យ​សមុទ្រ​នៅ​ខេត្ត​កោះកុង​កាលពី​ឆ្នាំ​ ២០១៤ ​។ រូបថត ភ្នំពេញ ប៉ុស្តិ៍

បន្ទប់​ស្នាក់នៅ ​ត្រូវ​បាន​កក់​ស្ទើរ​អស់​សម្រាប់​ពិធីបុណ្យ​សមុទ្រ

ភ្នំពេញៈ បន្ទប់​ស្នាក់​នៅក្នុង​ក្រុង​ខេមរភូមិន្ទ ខេត្ត​កោះកុង​ត្រូវ​បាន​ភ្ញៀវ​កក់​ស្ទើរ​អស់​ទាំង​ស្រុង ខណៈ​ខេត្ត​នៅ​ជាប់​ឆ្នេរសមុទ្រ​មួយ​នេះ​ត្រៀម​រៀបចំ​ពិធីបុណ្យ​សមុទ្រ​នៅ​ ២ ​សប្តាហ៍​ខាងមុខ​ស្រប​ពេល​អាជ្ញាធរ​អះអាង​ថា​បាន​ត្រៀម​រួច​ហើយ​សម្រាប់​ការ​មក​កម្សាន្ត​របស់​ភ្ញៀវទេសចរ​។

ពិធីបុណ្យ​សមុទ្រ​នៅ​ឆ្នាំ​នេះ​ដែល​ជា​ពិធីបុណ្យ​លើក​ទី​ ៧ នឹង​រៀបចំ​ធ្វើ​ឡើង​ចាប់ពី​ថ្ងៃទី​ ១៤-១៦ ខែ​ធ្នូ ឆ្នាំ​ ២០១៨ ដោយ​មាន​ការ​ព្យាករ​ថា​នឹង​មាន​ភ្ញៀវ​ចូលរួម​ចន្លោះ​ពី​ ៣០ ​ទៅ​ ៤០ ​ម៉ឺន​នាក់​។ នេះ​ជា​លើក​ទី​ ២ ​ហើយ​ដែល​ខេត្ត​កោះកុង​ទទួល​ធ្វើ​ជា​ម្ចាស់ផ្ទះ​សម្រាប់​ពិធីបុណ្យ​នេះ​ដោយ​លើក​ទី​ ១ រៀបចំ​ឡើង​កាលពី​ឆ្នាំ​ ២០១៤​។ កាលពី​ឆ្នាំ ២០១៧ ខេត្ត​កែប​ជា​ម្ចាស់​ផ្ទះ​ទទួល​រៀបចំ​ពិធី​នេះ​។

បុណ្យ​សមុទ្រ​ត្រូវ​បាន​រៀបចំ​លើក​ដំបូង​ក្នុង​ឆ្នាំ ២០១២ នៅក្នុង​ខេត្ត​ព្រះសីហនុ បន្ទាប់ពី​ប្រទេស​កម្ពុជា​បាន​ចូល​ជា «​សមាជិក​នៃ​ក្លិប​ដែល​មាន​ឆ្នេរសមុទ្រ​ស្អាត​ជាងគេ​នៅលើ​ពិភពលោក​»​។

លោក ហ៊ឹប សុធារី ប្រធាន​គ្រប់គ្រង​បុគ្គលិក​នៃ​សណ្ឋាគារ Apex Koh Kong Resort Hotel បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃ​ម្សិលមិញ​ថា សម្រាប់​រយៈពេល ៣ ថ្ងៃ​នៃ​ពិធីបុណ្យ​សមុទ្រ​នាពេល​ខាង​មុខ បន្ទប់​សណ្ឋាគារ​របស់​លោក​ត្រូវ​បាន​អតិថិជន​កក់​អស់​ហើយ ដោយ​អតិថិជន​ភាគច្រើន​ជា​អ្នក​នៅ​ភ្នំពេញ​។

លោក​បាន​ថ្លែង​ថា​៖ «​បន្ទប់​ទាំង ៣២ ​ត្រូវ​បាន​គេ​កក់​អស់​តាំងពី​មុន​បុណ្យ​អុំទូក​មក​ម្ល៉េះ ខណៈ​រៀងរាល់​ថ្ងៃ​តែងតែ​មាន​អតិថិជន​ខល​មក​រក​កក់​បន្ទប់​ជា​បន្តបន្ទាប់​ថែម​ទៀត​»​។

ពេល​ធម្មតា​បន្ទប់​ស្នាក់នៅ​របស់ Apex Koh Kong Resort Hotel មាន​តម្លៃ​ចាប់ពី ១០ ​ដុល្លារ​ឡើង​ទៅ តែ​សម្រាប់​ពិធីបុណ្យ​សមុទ្រ​តម្លៃ​បាន​កើនឡើង​ជា​ប្រហែល​ ២០ ​ភាគរយ​។

លោក សុធារី បាន​អះអាង​ថា​៖ «​ជាទូទៅ​តម្លៃ​បន្ទប់​មិន​កើនឡើង​ខ្ពស់​ទេ ព្រោះ​អាជ្ញាធរ​បាន​ចុះ​មក​ណែនាំ ព្រមទាំង​ដាក់​កំហិត​លើ​ការដំឡើង​ថ្លៃ​នេះ​ផង​ដែរ​»​។

បុគ្គលិក​នៃ​សណ្ឋាគារ Koh Kong City Hotel ដែល​សុំ​មិន​បញ្ចេញ​ឈ្មោះ​បាន​ប្រាប់​ថា គិត​ត្រឹម​ថ្ងៃ​នេះ (​ថ្ងៃ​អង្គារ​) ជាង ៧០ ភាគរយ​នៃ​បន្ទប់​សរុប​ទាំង ៥៤ ត្រូវ​បាន​ភ្ញៀវ​កក់​សម្រាប់​អំឡុង​ពិធីបុណ្យ​សមុទ្រ​ដែល​ការ​កក់​ភាគច្រើន​គឺ ២ យប់​។

បុគ្គលិក​រូប​នេះ​បាន​ថ្លែង​ថា​៖ «​បើ​ទោះបី​មាន​ការ​កក់​ច្រើនក្តី​ក៏​មក​ដល់​ពេល​នេះ​ម្ចាស់​សណ្ឋាគារ​នៅ​មិន​ទាន់​បាន​កំណត់​តម្លៃ​នោះ​ទេ គ្រាន់​តែ​ប្រាប់​ថា​នឹង​មិន​កើនឡើង​ខ្ពស់​ទេ​»​។

បើ​យោង​តាម​បុគ្គលិក​ដដែល​នេះ​ពេល​ធម្មតា​បន្ទប់​ស្នាក់នៅ​សណ្ឋាគារ Koh Kong City Hotel មាន​តម្លៃ​ចាប់ពី​ជាង ២០ ដុល្លារ​ឡើង​ទៅ​។

ទោះ​ជា​សណ្ឋាគារ និង​ផ្ទះសំណាក់​មួយ​ចំនួន​ត្រូវ​បាន​អតិថិជន​កក់​ពេញ​អស់​ហើយ​ក្តី ក៏​អាជ្ញាធរ​មូលដ្ឋាន​ហាក់​មិន​មាន​ក្តីបារម្ភ​ពី​កង្វះខាត​កន្លែង​ស្នាក់នៅ​នោះ​ទេ​។

លោក សុខ សុទ្ធី អភិបាលរង​ខេត្ត​កោះកុង​បាន​ប្រាប់​ថា​លោក​មិន​មាន​ក្តីបារម្ភ​ពី​កង្វះ​កន្លែង​ស្នាក់នៅ​សម្រាប់​ភ្ញៀវ​ក្នុង​ឱកាស​ពិធីបុណ្យ​សមុទ្រ​ខាង​មុខ​ទេ ព្រោះ​ក្រុម​ការងារ​បាន​ធ្វើការ​មួយ​ចំនួន​រួចហើយ​ដូចជា​ការត្រៀម​ប្រើប្រាស់​ផ្ទះ​ប្រជាពលរដ្ឋ​ដើម្បី​ទទួល​ភ្ញៀវ (​ជួល​ស្នាក់នៅ​) បោះតង់ និង​ទៅ​ស្នាក់នៅ​ក្នុង​ប្រទេស​ថៃ​ជាដើម​។

លោក​មាន​ប្រសាសន៍​ថា​៖ «​យើង​បាន​ត្រៀម​កន្លែង​ស្នាក់នៅ​ជាច្រើន​សម្រាប់​ភ្ញៀវ​ក្នុង​អំឡុង​ពិធីបុណ្យ​សមុទ្រ​នាពេល​ខាង​មុខ​ក្នុង​ករណី​ចំនួន​ភ្ញៀវ​កើនឡើង​លើស​ការរំពឹង​ទុក យើង​នឹង​ទាក់ទង​ជាមួយ​អាជ្ញាធរ​ខេត្ត​ត្រាត និង​ចន្ទបុរី [​ប្រទេស​ថៃ​] ដើម្បី​ឲ្យ​ភ្ញៀវ​របស់​យើង​អាច​ចូល​ទៅ​ស្នាក់នៅ​ទី​នោះ​តែ​ម្តង​»​។

បើ​តាម​លោក សុទ្ធី បច្ចុប្បន្ន​នៅ​ខេត្ត​កោះកុង​មាន​សណ្ឋាគារ និង​ផ្ទះ​សំណាក់​ជិត ២ ០០០ ស្មើ​នឹង​ប្រហែល ២០ ០០០ បន្ទប់​។

ខេត្ត​កោះកុង​មាន​រមណីយដ្ឋាន​ទេសចរណ៍​ជាច្រើន​ដូចជា អារ៉ែង ជីផាត និង​ព្រៃកោងកាង​ជាដើម​។

ក្នុង​កិច្ចប្រជុំ​មួយ​ជាមួយ​គណៈអភិបាល​ខេត្ត​កោះកុង​កាលពី​ថ្ងៃទី​​ ២៥ ខែ​វិច្ឆិកា រដ្ឋមន្ត្រី​ក្រសួង​ទេសចរណ៍​លោក ថោង ខុន បាន​ឲ្យ​ដឹង​ថា ភាគី​ថៃ​ (​ខេត្ត​ត្រាត​) បាន​សន្យា​ផ្តល់​កិច្ចសហការ​ក្នុង​ការត្រៀម​ទទួល​ភ្ញៀវ​ស្នាក់នៅ​ពី​ប្រទេស​កម្ពុជា​ក្នុង​តម្លៃ​សមរម្យ​ដោយ​គេ​បាន​ត្រៀម​បន្ទប់​ស្នាក់នៅ​មិន​តិច​ជាង ៦០០ បន្ទប់​នោះ​ឡើយ​។

ដើម្បី​ពង្រឹង​គុណភាព​សេវាកម្ម​ទេសចរណ៍​នាពេល​កន្លង​មក​ក្រសួង​ទេសចរណ៍​បាន​ចេញ​សារាចរ​ណែនាំ​មួយ​ដោយ​ណែនាំ​ពី​សណ្តាប់ធ្នាប់ អនាម័យ គុណភាព​សេវាកម្ម ការ​កំណត់​តម្លៃ ការគ្រប់គ្រង​កាកសំណល់ មធ្យោបាយ​ដឹកជញ្ជូន​ភ្ញៀវ និង​ការគ្រប់គ្រង​ទៅ​លើ​រមណីយដ្ឋាន​ទេសចរណ៍​ជាដើម​៕ LA

អត្ថបទគួរចាប់អារម្មណ៍