.jpg)
កម្មករកំពុងផ្ទេរជ័រកៅស៊ូដាក់ចូលក្នុងធុងយកទៅស្ទុកទុកក្នុងចម្ការកៅស៊ូនៅស្រុកមេមត់។ ហេង ជីវ័ន
ភ្នំពេញ: ក្រុមហ៊ុនដាំដុះ និងនាំចេញកៅស៊ូមួយចំនួនបានអះអាងថា ការនាំចេញកៅស៊ូក្នុងរយៈពេល ៣ ខែដំបូងឆ្នាំ ២០២០ នេះបានធ្លាក់ចុះយ៉ាងខ្លាំងមិនធ្លាប់មានដោយសារវិធានការរឹតបន្តឹងនៅច្រកព្រំដែនជាប់នឹងប្រទេស កម្ពុជា ដើម្បីទប់ស្កាត់ការរាតត្បាតជំងឺកូវីដ ១៩។
លោក ហេង ស្រេង អ្នកចាត់ការទូទៅក្រុមហ៊ុនចម្ការកៅស៊ូបឹងកេតនៅខេត្តកំពង់ចាមបានប្រាប់ ភ្នំពេញ ប៉ុស្តិ៍ ថាក្រុមហ៊ុនលោកបាននាំចេញកៅស៊ូបានតិចតួចបំផុតក្នុងរយៈពេល ៣ ខែដើមឆ្នាំ ២០២០ នេះដោយសារការរឹតត្បិតនៅច្រកព្រំដែនជាមួយវៀតណាម ដើម្បីទប់ស្កាត់ការរីករាលដាលវីរុសកូរ៉ូណា។
លោកបន្តថា រយៈពេល ៣ ខែនេះក្រុមហ៊ុនលោកបាននាំចេញកៅស៊ូទៅកាន់ទីផ្សារអន្តរជាតិចំនួនត្រឹមតែ ៥០ តោនប៉ុណ្ណោះ ខណៈក្នុងរយៈពេលដូចគ្នាឆ្នាំមុនបរិមាណនាំចេញកៅស៊ូពីក្រុមហ៊ុនរបស់លោកមានចន្លោះពី ២៥០ តោនទៅ ៣០០ តោន។
លោកបានថ្លែងថា៖ «បច្ចុប្បន្នជំងឺកូវីដ ១៩ បានធ្វើឲ្យប៉ះពាល់ដល់ការនាំចេញកៅស៊ូ ខណៈមានការរឹតបន្តឹងនៅច្រកព្រំដែនកម្ពុជាជាមួយវៀតណាមនៅពេលនេះ។ ខ្ញុំយល់ថាតម្លៃកៅស៊ូនាំចេញឆ្នាំនេះនឹងធ្លាក់ថ្លៃបន្តទៀត»។
លោក ម៉ែន សុភក្តិ ប្រធានក្រុមហ៊ុនវិនិយោគសុភក្តិនីកា ដែលជាក្រុមហ៊ុនដាំដុះ និងនាំចេញកៅស៊ូបានប្រាប់ ភ្នំពេញប៉ុស្តិ៍កាលពីថ្ងៃព្រហស្បតិ៍ថា បញ្ហាជំងឺកូវីដ ១៩ បានធ្វើឲ្យលោកខកខានក្នុងការនាំចេញកៅស៊ូនៅក្នុងខែមីនា។
លោកបន្តថា ទោះជាបែបនេះក្តីក្រុមហ៊ុនលោកក៏បាននាំចេញកៅស៊ូទៅកាន់ទីផ្សារប្រទេសចិនបានប្រហែល ១ ០០០ តោន ក្នុងរយៈពេល ២ ខែដំបូងឆ្នាំ ២០២០ នេះដែលចំនួននេះធ្លាក់ចុះតិចតួច បើធៀបរយៈពេលដូចគ្នាកាលពីឆ្នាំមុន។
លោកអះអាងថា បច្ចុប្បន្នតម្លៃកៅស៊ូក្រែបបានធ្លាក់ថ្លៃពី ១ ៣០០ ដុល្លារក្នុង ១ តោនមកនៅត្រឹម ១ ១០០ ដុល្លារក្នុង ១ តោន។ លោកហាក់ទុទ្ទិដ្ឋិនិយមចំពោះតម្លៃកៅស៊ូសម្រាប់ឆ្នាំនេះ ដោយវានឹងបន្តធ្លាក់ថ្លៃរហូតដល់ចុងឆ្នាំនេះ។
លោកបន្តថា៖ «បច្ចុប្បន្នតម្លៃកៅកំពុងធ្លាក់ចុះ ដោយសារតែជំងឺកូវីដ១៩នេះ បានកំពុងបង្កផលប៉ះពាល់ដល់ប្រទេសនាំចូលធំៗ ដូចជា ប្រទេសចិន អាមេរិក និងតំបន់អឺរ៉ុបដែលសុទ្ធតែទទួលរងផលប៉ះពាល់សេដ្ឋកិច្ចធ្ងន់ធ្ងរ ដូច្នេះតម្រូវការប្រើប្រាស់ផលិតផលពីកៅស៊ូ និងតម្រូវការកែច្នៃកៅស៊ូបានថមថយរួចហើយ»។
លោកបន្តថា៖ «ដោយសារបញ្ហាសេដ្ឋកិច្ចលើសកលលោក ខ្ញុំគិតថាតម្លៃវានឹងអត់ល្អទេនៅក្នុងរយៈពេល ៣ ទៅ ៤ ខែខាងមុខនេះ អ៊ីចឹងទេ! វានឹងអាចប៉ះពាល់ដល់ប្រាក់ចំណូល និងប្រាក់ចំណេញរបស់ក្រុមហ៊ុនដោយសារតម្លៃទីផ្សារទាប ហើយតម្លៃលក់របស់ក្រុមហ៊ុនរាល់ថ្ងៃលក់ក្នុងតម្លៃខាត មិនចំណេញនោះទេ»។
តំណាងក្រុមហ៊ុន ឫទ្ធិមុនី សំណាងលាភ ខូអិលធីឌី ដែលជាក្រុមហ៊ុនផ្គត់ផ្គង់កៅស៊ូក្រែបក្នុងស្រុក និងក្រៅស្រុកសុំមិនបញ្ចេញឈ្មោះបានឲ្យដឹងថា ក្រុមហ៊ុនរបស់អ្នកស្រីបានខកខានធ្វើការនាំចេញកៅស៊ូទៅក្រៅប្រទេសចាប់តាំងពីមានការរឹតបន្តឹងនៅព្រំដែនកម្ពុជា វៀតណាម ដែលជាវិធានការទប់ស្កាត់ការរីករាលដាលជំងឺកូវីដ ១៩ របស់រដ្ឋាភិបាលប្រទេសទាំង ២។
អ្នកស្រីបញ្ជាក់ថា៖ «ខ្ញុំនាំចេញកៅស៊ូទៅណារួច បើគេមិនហ៊ានដើរហើរ គ្មានអ្នកទិញមកពីណា ឥឡូវច្រកព្រំដែនគេក៏មិនបើកឲ្យចូលទៀត»។
កម្ពុជាបាននាំចេញកៅស៊ូចំនួន ២៨២ ០៧១ តោន ដែលមានតម្លៃ ៣៧៧ លានដុល្លារ កាលពីឆ្នាំ ២០១៩ កើនឡើង ៣០ ភាគរយបើធៀបនឹងឆ្នាំ ២០១៨។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។ ទិន្នន័យនេះបង្ហាញថា ផ្ទៃដីដាំកៅស៊ូនៅកម្ពុជាសរុប ៤០៦ ១៤២ ហិកតា ក្នុងនោះកៅស៊ូជាង ២៤៧ ១១៤ ហិកតាត្រូវបានប្រមូលផល។
បើយោងតាមរបាយការណ៍របស់ Research and Markets តម្លៃកៅស៊ូក្រែបនឹងបន្តធ្លាក់ថ្លៃចាប់ពីឆ្នាំនេះរហូតដល់ឆ្នាំ ២០២១។
របាយការណ៍នេះបានឲ្យដឹងថា ប្រទេស ចិន មានតម្រូវការកៅស៊ូច្រើនជាងគេបំផុតនៅលើសកលលោកដែលមានរហូតដល់ ៤១ ភាគរយ នៃផលិតផលកៅស៊ូសរុបលើពិភពលោក៕ LA
