.jpg)
កសិករកំពុងពិនិត្យគ្រាប់ម្រេចក្នុងចម្ការរបស់ខ្លួននៅខេត្តកំពតនាពេលកន្លងមក។ រូបថត ភ្នំពេញ ប៉ុស្តិ៍
កំពតៈ ទិន្នផលម្រេចកំពតដែលជាផលិតផលសម្គាល់ភូមិសាស្ដ្រ (GI) តែមួយគត់នៅក្នុងប្រទេសកម្ពុជានឹងធ្លាក់ចុះរហូតដល់ ២៦ ភាគរយនៅឆ្នាំនេះ ដោយសារតែផលប៉ះពាល់ពីការប្រែប្រួលអាកាសធាតុ។ នេះបើយោងតាមប្រធានសមាគមលើកកម្ពស់ម្រេចកំពត (KPPA)។
បើទោះបីយ៉ាងនេះក្តីលោក ងួន ឡាយ បានប្រាប់កាសែតភ្នំពេញប៉ុស្ដិ៍កាលពីម្សិលមិញថា ការធ្លាក់ចុះទិន្នផលនេះនឹងមិនប៉ះពាល់ដល់ការផ្គត់ផ្គង់ទៅទីផ្សារអន្តរជាតិទេ។
លោក ងួន ឡាយ ថ្លែងថាកាលពីដើមឆ្នាំនេះអាកាសធាតុរាំងស្ងួតខ្លាំងពេកបានធ្វើឲ្យផ្កាគ្រាប់ម្រេចជ្រុះ ខណៈរដូវប្រមូលផលមកដល់ភ្លៀងធ្លាក់ចុះខ្លាំងបានធ្វើឲ្យកសិករម្រេចមិនអាចសម្ងួតគ្រាប់ម្រេចបាន។
លោកលើកឡើងថាការផលិតនឹងធ្លាក់ចុះ ២៦ ភាគរយមកនៅត្រឹម ៧៥ តោនត្រឹមចុងខែនេះបើធៀបនឹងឆ្នាំទៅដែលមានរហូតដល់ ១០២ តោន។ លោកបញ្ជាក់ថា៖ «ដោយសារអាកាសធាតុប្រែប្រួល បណ្ដាលឲ្យមានភាពរាំងស្ងួតខ្លាំង និងទឹកភ្លៀងធ្លាក់ខ្លាំង បញ្ហាប្រឈមនេះធ្វើឲ្យការផលិតរបស់យើងទាប និងមិនទទួលបានប្រាក់ចំណេញច្រើន ដើម្បីទូទាត់លើការចំណាយនៃការផលិតទេ»។
តំបន់ GI របស់ម្រេចកំពតបច្ចុប្បន្នមានផ្ទៃដី ២៥០ ហិកតានៅក្នុងខេត្តកំពត និងខេត្តកែបក្នុងចំណោមនោះផ្ទៃដី ១១០ ហិកតាមានម្រេចទុំ និងអាចប្រមូលផលបាន។
សមាជិករបស់សមាគមនេះបានកើនឡើងពី ៣៨៧ នាក់ និងក្រុមហ៊ុនចែកចាយ ២១ កាលពីឆ្នាំមុនដល់ ៤៤០ នាក់ និងក្រុមហ៊ុនចែកចាយ ២៩ នៅឆ្នាំនេះ។ នេះបើយោងតាមលោក ងួន ឡាយ។
លោកថ្លែងថា៖ «ទោះបីការផលិតរបស់យើងក៏ទាបជាងឆ្នាំមុនផងដែរ យើងនៅតែអាចផ្គត់ផ្គង់ដល់អ្នកទិញ»។ លោកបន្តថា៖ «យើងនៅតែមានគ្រាប់ម្រេចមួយចំនួនដែលបម្រុងទុកពីឆ្នាំមុន»។
លោកបានបញ្ជាក់ថារហូតមកដល់ពេលនេះសមាគមបានលក់ម្រេច ៤០ តោនរួចហើយ ឲ្យអ្នកទិញ ខណៈតម្រូវការសរុបនៅឆ្នាំនេះមានប្រហែល ៧០ តោន។
សមាគមនេះគឺនៅតែរក្សាតម្លៃម្រេច ១៥ ដុល្លារក្នុង ១ គីឡូក្រាមសម្រាប់ម្រេចខ្មៅ ២៥ ដុល្លារសម្រាប់ម្រេចក្រហម និង ២៨ ដុល្លារសម្រាប់ម្រេចស។ នេះបើយោងតាមលោក ងួន ឡាយ។
លោក សុខ ហ៊ុយ កសិករម្រេចនៅក្នុងសមាគមនេះដែលមានចម្ការម្រេច ១០ ហិកតាបានថ្លែងថា ការផលិតរបស់លោកនៅឆ្នាំនេះធ្លាក់ចុះ ៣០ ភាគរយធៀបនឹងឆ្នាំមុន។
លោកលើកឡើងថា៖ «ជាធម្មតា ខ្ញុំបញ្ចប់ការប្រមូលផលនៅចុងខែមិថុនា ប៉ុន្តែឆ្នាំនេះការប្រមូលផលយឺត ដោយសារភ្លៀងធ្លាក់បន្ត ២ សប្ដាហ៍ ដូច្នេះយើងមិនអាចប្រមូលផលគ្រាប់ម្រេចបានទេ»។
លោកបានបន្តថា៖ «រហូតមកដល់ពេលនេះខ្ញុំមិនទាន់បានចាប់ផ្ដើមការប្រមូលផលនៅឡើយទេ ខ្ញុំពិតជាបារម្ភ ប្រសិនបើមិនមានពន្លឺថ្ងៃ ដើម្បីហាលគ្រាប់ម្រេចរបស់ខ្ញុំ បន្ទាប់មកខ្ញុំនឹងខាតបង់ច្រើនជាមិនខាន»៕LA
