ភ្នំពេញៈ ទីផ្សារអំបិលឆ្នាំនេះនឹងមិនល្អដូចឆ្នាំមុនទេ ទាំងបរិមាណទិន្នផលផលិតបាន និងតម្លៃ គឺធ្លាក់ចុះដូចៗគ្នា។ នេះបើយោងតាមក្រុមអ្នកផលិតអំបិលនៅខេត្តកំពត។
លោក ប៊ុន បារាំង អ្នកផលិតអំបិលក្នុងខេត្តកំពតបានប្រាប់ភ្នំពេញប៉ុស្តិ៍នៅថ្ងៃនេះថា ការប្រែប្រួលអាកាសធាតុ (ភ្លៀងធ្លាក់ក្នុងរដូវប្រាំង) កំពុងធ្វើឱ្យបរិមាណអំបិលផលិតបានក្នុងឆ្នាំនេះធ្លាក់ទាបជាងឆ្នាំមុន បើទោះបីរយៈពេលផលិតអាចនៅសល់ប្រមាណ ១ ខែទៀតក៏ដោយ។
លោកបន្តថា មិនត្រឹមតែទិន្នផលធ្លាក់ចុះទេ សូម្បីតែតម្លៃក៏ធ្លាក់ចុះដែរ ដោយពេលនេះអំបិលមានតម្លៃប្រមាណ ១០០០០ រៀលក្នុង ១ បាវទម្ងន់ ៥០ គីឡូក្រាម។
លោកនិយាយថា៖ «ឆ្នាំមុនគេអាចលក់បានក្នុងរង្វង់ ១២ ០០០ រៀលទៅ ១៣ ០០០ រៀល ប៉ុន្តែពេលនេះបានត្រឹមតែ ១០ ០០០ រៀលប៉ុណ្ណោះ ហើយផលក៏មិនច្រើនដូចមុនដែរ»។
លោកឱ្យដឹងទៀតថា ទន្ទឹមនឹងបញ្ហាទាំង ២ ខាងលើទីផ្សារចែកចាយអំបិលក៏កំពុងរងផលប៉ះពាល់ពីការរឹតត្បិតការដឹកជញ្ជូននៃព្រឹត្តិការណ៍សហគមន៍ ២០ កុម្ភៈផងដែរ ពិសេសតំបន់រាជធានីភ្នំពេញ។
ដូចនឹងការលើកឡើងខាងលើ អ្នកផលិតអំបិលក្នុងខេត្តកំពតលោក ប៊ុន ណារិន បានប្រាប់ថា ចាប់ពីចុងខែមីនាមកភ្លៀងបានធ្លាក់នៅតាមតំបន់មួយចំនួនក្នុងខេត្តកំពត ដែលធ្វើឱ្យការផលិតអំបិលត្រូវជួបបញ្ហា។ លោកបន្តថា ក្រៅពីបញ្ហាទិន្នផល ការបញ្ចេញលក់លើទីផ្សារក៏ជួបបញ្ហាទាក់ទងនឹងការដឹកជញ្ជូនផងដែរ ពិសេសក្នុងរយៈពេលប៉ុន្មានថ្ងៃចុងក្រោយនេះ។
គិតត្រឹមដំណាច់ខែមីនា ផលអំបិលក្នុងស្តុកក្នុងខេត្តកំពតសម្រេចបានប្រមាណ ៤០ ០០០ តោនរួចមកហើយ។ នេះបើយោងតាមលោក ប៊ុន ណារិន។
ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពត លោក សុខ គឹមជឿន មិនអាចទាក់ទងបានទេ ប៉ុន្តែកាលពីដើមខែមីនាលោកបានប្រាប់ភ្នំពេញប៉ុស្តិ៍ថា ការប្រមូលផលអំបិលនៅខេត្តកំពតឆ្នាំនេះនឹងមិនលើសឆ្នាំ ២០២០ ឡើយ ព្រោះស្ថានភាពអាកាសធាតុមិនសូវអំណោយផលល្អដូចឆ្នាំ ២០២០។ លោកថ្លែងថា៖ «អំបិលដែលខេត្តកំពតប្រមូលបានក្នុងឆ្នាំនេះនឹងមិនច្រើនដូចឆ្នាំមុនឡើយ ព្រោះគ្រាន់តែដើមខែមីនានេះមានភ្លៀងកក់ខែចំនួន ២ លើករួចមកហើយ»។
យោងតាមលោក គឹមជឿន ក្នុងឆ្នាំ ២០២១ នេះផ្ទៃដីធ្វើស្រែអំបិលនៅខេត្តកំពតមិនប្រែប្រួលទេបើធៀបនឹងឆ្នាំ ២០២០ ដោយមាន ៣ ៧២៦ ហិកតា។
កាលពីឆ្នាំ ២០២០ ខេត្តកំពតផលិតអំបិលបានប្រមាណ ៨៥ ០០០ តោន និងខេត្តកែបផលិតបានជាង ២០ ០០០ តោន។ ជាមធ្យមប្រទេសកម្ពុជាត្រូវការអំបិលប្រើប្រាស់ក្នុងរង្វង់ ១០ ម៉ឺនតោនក្នុង ១ ឆ្នាំ។
របាយការណ៍ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឱ្យដឹងថា ក្នុងឆ្នាំ ២០២០ ផ្ទៃដីធ្វើស្រែអំបិលក្នុងខេត្តកំពត និងខេត្តកែបមានទំហំសរុប ៤ ៧៤៨ ហិកតា។ បើអាកាសធាតុអំណោយផលក្នុង ១ ហិកតាគេអាចផលិតអំបិលបានជាមធ្យម ២០ តោនក្នុងរយៈពេល ១ ឆ្នាំ៕