.jpg)
ស្តុកអំបិលរបស់កសិករនៅខេត្តកំពតនាពេលកន្លងមក។ ហេង ជីវ័ន
កំពតៈ សហគមន៍ផលិតអំបិលកម្ពុជានឹងរៀបចំកិច្ចប្រជុំសមាជិកក្រុមប្រឹក្សាភិបាលនៅសប្ដាហ៍នេះ ដើម្បីបញ្ជាក់ពីបរិមាណអំបិលដែលនឹងនាំចូល ខណៈសហគមន៍នេះប្រកាសកាលពីខែមុនអំពីកង្វះអំបិលរបស់ប្រទេសនេះ។ នេះបើយោងតាមប្រធានបច្ចេកទេសនៃសហគមន៍ផលិតអំបិលកែប-កំពត (KKSPC) បានឲ្យដឹងកាលពីម្សិលមិញ។
កាលពីខែមុន KKSPC បានបញ្ជាក់ថា កម្ពុជាត្រូវការនាំចូលអំបិលប្រហែល ៣០ ០០០ តោនសម្រាប់ផ្គត់ផ្គង់ទីផ្សារក្នុងស្រុកនៅឆ្នាំនេះ ខណៈការផលិតអំបិលមានការខ្វះខាត ដោយសារការប្រែប្រួលអាកាសធាតុភ្លៀងធា្លក់ខ្លាំង។
នេះជាលើកទី ២ ហើយដែលប្រទេសផលិតអំបិលមួយនេះស្នើសុំការនាំចូលអំបិល ខណៈកាលពីឆ្នាំ ២០០៩ កម្ពុជាក៏បាននាំចូលអំបិលក្នុងបរិមាណដូចគ្នានេះពីប្រទេសចិន។
លោក ប៊ុន ណារិន ប្រធាន KKSPC បានថ្លែងថាកិច្ចប្រជុំនេះនឹងត្រូវរៀបចំឡើងនៅសប្ដាហ៍នេះដើម្បីបញ្ជាក់ពីតម្រូវការចាំបាច់សម្រាប់ទីផ្សារក្នុងស្រុក មុនពេលដាក់របាយការណ៍នេះទៅរដ្ឋាភិបាល។
លោកថ្លែងថា៖ «យើងនឹងមានកិច្ចប្រជុំជាមួយសមាជិកក្រុមប្រឹក្សាភិបាលរបស់យើង ដើម្បីនាំចូលអំបិល បន្ទាប់មកយើងនឹងបញ្ជូនរបាយការណ៍កង្វះអំបិលនេះទៅក្រសួងឧស្សាហកម្ម និងសិប្បកម្ម ដើម្បីអន្តរាគមន៍សម្រាប់ការនាំចូល»។
លោកបានបន្តថា៖ «យើងមិនទាន់បានសម្រេចថាតើនឹងត្រូវនាំចូលពីប្រទេសណាមួយនោះទេ ប៉ុន្តែយើងប្រមូលព័ត៌មានក្នុងដៃរួចហើយអំពីតម្លៃ និងកូតា» ។
លោកបញ្ជាក់ថា៖ «រហូតមកដល់ពេលនេះយើងនៅតែមានអំបិលក្នុងដៃរបស់យើងសម្រាប់ការផ្គត់ផ្គង់ ប៉ុន្តែវានឹងប្រឈមកង្វះអំបិលនៅចុងឆ្នាំនេះ មុនពេលរដូវប្រមូលផលអំបិលបន្ទាប់មកដល់»។
មានស្រែអំបិលប្រហែល ៥ ០០០ ហិកតានៅខេត្តកំពត និងខេត្តកែប ជាមួយនឹងរដូវប្រមូលផលចាប់ពីខែមករាដល់ចុងខែមេសា៕LA
