ក្រុងតូក្យូៈ រដ្ឋាភិបាលប្រទេស បារាំង កាលពីថ្ងៃអាទិត្យ បានប្រាប់ដល់ជប៉ុនថា ខ្លួននឹងស្វែងរកការច្របាច់បញ្ចូលគ្នារវាងក្រុមហ៊ុនផលិតរថយន្ត Renault និងក្រុមហ៊ុន Nissan បន្ទាប់ពីការចាប់ខ្លួនដ៏ភ្ញាក់ផ្អើលចំពោះលោក Carlos Ghosn អតីតប្រធានក្រុមហ៊ុន Nissan កាលពីពេលកន្លងមក។
លោក Ghosn គឺជាអ្នកដឹកនាំសម្ព័ន្ធមិត្តដ៏មានឥទ្ធិពលរវាងក្រុមហ៊ុន Nissan ក្រុមហ៊ុន Mitsubishi និងក្រុមហ៊ុន Renault មុនពេលត្រូវគេចាប់ខ្លួនកាលពីខែវិច្ឆិកា ក្រោមបទចោទប្រកាន់រាយការណ៍ហិរញ្ញវត្ថុមិនត្រឹមត្រូវ។
កាសែត Kyodo News បានរាយការណ៍ដោយលើកឡើងពីប្រភពស្និទ្ធនឹងបញ្ហានេះថា គណៈប្រតិភូមួយក្រុមរួមទាំងលោក Martin Vial នាយកក្រុមហ៊ុន Renault ដែលត្រូវបានជ្រើសតាំងដោយរដ្ឋាភិបាលបារាំង បានធ្វើសំណើពីការច្របាច់បញ្ចូលគ្នាក្នុងការចរចា ជាមួយមន្ដ្រីរបស់ប្រទេស ជប៉ុន នៅក្នុងទីក្រុងតូក្យូ។
រដ្ឋាភិបាលប្រទេស បារាំង គឺជាភាគទុនិកធំជាងគេក្នុងក្រុមហ៊ុន Renault ដោយមានភាគហ៊ុនជាង ១៥ ភាគរយ ខណៈក្រុមហ៊ុន Renault បានគ្រប់គ្រងភាគហ៊ុនចំនួន ៤៣,៤ ភាគរយរបស់ក្រុមហ៊ុនផលិតរថយន្ត Nissan។
កាសែត Kyodo បានឲ្យដឹងថា ការច្របាច់បញ្ចូលគ្នារវាងក្រុមហ៊ុនទាំង ២ នេះ ត្រូវបានគាំទ្រដោយលោកប្រធានាធិបតីបារាំង អេម៉ានុយអែល ម៉ាក្រុង។
សារព័ត៌មានប្រចាំថ្ងៃ Nikkei របស់ប្រទេស ជប៉ុន បានរាយការណ៍ពីការស្នើសុំការច្របាច់បញ្ចូលគ្នានេះដោយគណៈប្រតិភូរបស់ប្រទេស បារាំង ដោយលើកឡើងថា ក្រុមហ៊ុន Nissan ត្រូវបានជំទាស់ក្នុងការផ្ដល់ឥទ្ធិពលកាន់តែធំដល់ទីក្រុងប៉ារីសនៅលើទីផ្សារផលិតរថយន្តរបស់ប្រទេស ជប៉ុន។
លោក ម៉ាក្រុង កាលពីខែមុន បានរៀបចំការចរចាជាមួយលោកនាយករដ្ឋមន្ដ្រីជប៉ុន ស៊ីនហ្សូ អាបេ នៅក្រៅជំនួបនៃកិច្ចប្រជុំកំពូលក្រុមប្រទេសមានសេដ្ឋកិច្ចរីកចម្រើនទាំង ២០ នៅប្រទេស អាហ្សង់ទីន ដោយពួកគេបានយល់ព្រមក្នុងការធានាទំនាក់ទំនងប្រកបដោយស្ថិរភាពនៅក្នុងសម្ព័ន្ធមិត្ត ៣ ភាគី ដែលរួមទាំងក្រុមហ៊ុន Mitsubishi Motors របស់ប្រទេស ជប៉ុន ផងដែរ។
លោក អាបេ តាមការរាយការណ៍បានបញ្ជាក់ពីសារៈសំខាន់របស់ក្រុមហ៊ុនទាំង ៣ «ដែលរក្សាទំនាក់ទំនងប្រកបដោយស្ថិរភាពរបស់ពួកគេ» នៅក្នុងការចរចាកិច្ចប្រជុំកំពូលនេះ។
ប៉ុន្តែលោកនាយករដ្ឋមន្ដ្រីជប៉ុន តាមការរាយការណ៍ បានឲ្យដឹងថា ជោគវាសនារបស់ក្រុមហ៊ុននេះនឹងត្រូវសម្រេចដោយ «ក្រុមហ៊ុនឯកជន» ហើយ «រដ្ឋាភិបាលមិនគួរផ្ដល់ពីរបៀបដែលសម្ព័ន្ធមិត្តនេះគួរដំណើរការទៅមុខយ៉ាងណានោះទេ»។ នេះបើយោងតាមមន្ដ្រីជាន់ខ្ពស់របស់រដ្ឋាភិបាលជប៉ុនដែលបានដកស្រង់ដោយកាសែត Kyodo។
កាលពីសប្ដាហ៍មុនក្រុមហ៊ុន Renault បានឲ្យដឹងថា ខ្លួនចាប់ផ្តើមស្វែងរកអ្នកជំនួសលោក Ghosn បន្ទាប់ពីតុលាការទីក្រុងតូក្យូ បដិសេធការសុំនៅក្រៅឃុំរបស់លោក ដោយសារលោកប្រឈមនឹងការចោទប្រកាន់ធំៗ ៣ ពីការរាយការណ៍មិនត្រឹមត្រូវផ្នែកហិរញ្ញវត្ថុ។
រដ្ឋាភិបាលបារាំង ក៏បានអំពាវនាវឲ្យមានកិច្ចប្រជុំក្រុមប្រឹក្សានាយក ដើម្បីជ្រើសរើសអ្នកមកកាន់តំណែងជំនួសលោក Ghosn៕ AFP/LA