The Phnom Penh Post Search

Search form




Logo of Phnom Penh Post newspaper Phnom Penh Post - បុគ្គលិក​តវ៉ា​បណ្តេញ​អគ្គ​នាយក

បុគ្គលិក​តវ៉ា​បណ្តេញ​អគ្គ​នាយក

បុគ្គលិក​តវ៉ា​បណ្តេញ​អគ្គ​នាយក

130214_01
បុគ្គលិកជាង២០០នាក់តំណាងឲ្យបុគ្គលិកធ្វើការនៅទូរគមនាគមន៍កម្ពុជាចំនួនជាង៦៤០នាក់ តវ៉ានៅកន្លែងធ្វើការរបស់ពួកគេដែលស្ថិតនៅខណ្ឌ ៧មករា កាលពីម្សិលមិញ ហេង ជីវ័ន

ភ្នំពេញៈ បុគ្គលិក​ក្រុមហ៊ុន​ទូរគមនាគមន៍​កម្ពុជា​ជាង​២០០​នាក់​តំណាង​ឲ្យ​៦៤០​នាក់​បាន​ធ្វើ​កូដកម្ម​កាល​ពី​ព្រឹក​ថ្ងៃ​ពុធ​ទាមទារ​ឲ្យ​លោក ឡៅ សារឿន អគ្គ​នាយក​ក្រុមហ៊ុន​ចុះ​ចេញ​ពី​តំណែង និង​ស្នើ​ឲ្យ​អង្គភាព​ប្រឆាំង​អំពើ​ពុក​រលួយ​ចុះ​អង្កេត​ក្នុង​អង្គភាព​មួយ​នេះ​ដែល​អ្នក​តវ៉ា​បាន​អះអាង​ថា​ពោរ​ពេញ​ទៅ​ដោយ​អំពើ​ពុក​រលួយ​និង​បក្ខ​ពួក​និយម។

ក្រុមហ៊ុន​នេះ​ជា​សហគ្រាស​របស់​រដ្ឋ​ដែល​រដ្ឋាភិបាល​គ្រោង​នឹង​ចុះ​បញ្ជី​ក្នុង​ផ្សារ​ហ៊ុន​នៅ​ឆ្នាំ ២០១៣​នេះ​ប៉ុន្តែ​អ្នក​តវ៉ា​និយាយ​ថា គម្រោង​ចុះ​បញ្ជី​គួរ​ពន្យារ​ពេល​ដោយ​សារ​តែ​អំពើ​ពុក​រលួយ។

ក្រុម​អ្នក​តវ៉ា​ដែល​មាន​កាន់​បដា​ជាច្រើន ជាមួយ​នឹង​រូបថត​លោក​នាយក​រដ្ឋមន្ត្រី ហ៊ុន សែន និង​ភរិយា​ផង​នោះ​បាន​ទាម​ទារ​យ៉ាង​ម៉ឺង​ម៉ាត់​ឲ្យ​អគ្គ​នាយក​ទូរគមនាគមន៍​កម្ពុជា​ចុះ​ចេញ​ពី​មុខ​តំណែង និង​ឲ្យ​លោក​នាយក​រដ្ឋ​មន្ត្រី​អន្តរាគមន៍​ជួយ​ដល់​ពួក​គេ។ ពួក​គេ​សរសេរ​ថា៖ «និយោជិត​ទូរគមនាគមន៍​កម្ពុជា​(ទ-ក)​ត្រូវ​ការ​អ្នក​ដឹក​នាំ​ថ្មី» ខណៈ​បដា​អ្នក​តវ៉ា​មួយ​ទៀត​បាន​លើក​ឡើង​ថា​៖​«និយោជិត​ទាំង​អស់​ត្រូវ​ការ​ឲ្យ​អគ្គ​នាយក ឡៅ សារឿន​ចុះ​ចេញ​ពី​តំណែង​និង​ត្រូវ​ការ​ឲ្យ​អង្គភាព​ប្រឆាំង​អំពើ​ពុក​រលួយ​ចុះ​ត្រួត​ពិនិត្យ ទូរគមនាគមន៍​កម្ពុជា​»។

លោក មុំ រិន អ្នក​តវ៉ា​ម្នាក់​បាន​ថ្លែង​ថា លោក ឡៅ សារឿន ប្រព្រឹត្ត​អំពើ​ពុក​រលួយ បក្ខ​ពួក​និយម មើល​ងាយ និង​ប្រមាថ​បុគ្គលិក​របស់​ខ្លួន​ឯង ដោយ​ចាត់​ទុក​ថា បុគ្គលិក​ចោរ។

លោក​បន្ត​ថា​៖ «យើង​ត្រូវ​ការ​អ្នក​ដឹក​នាំ​ថ្មី​មក​ជំនួស​គាត់​ឲ្យ​បាន​ឆាប់​រហ័ស​បំផុត​ពី​ព្រោះ​អង្គភាព​នេះ​គឺ​ជា​សហគ្រាស​សាធារណៈ​មួយ​ចំណុះ​ឲ្យ​រដ្ឋ​បាន​រក​ចំណូល​ឲ្យ​រដ្ឋ​បាន​ច្រើន​ណាស់​តែ​បើ​ទុក​បុគ្គល​ដូច​គាត់​នៅ​បន្ត​ទៀត​នោះ​វា​នឹង​ធ្វើ​ឲ្យ​បាត់បង់​ថវិកា​ជាតិ ហើយ​បុគ្គលិក​នៅ​បម្រើ​ការ​ក្នុង​អង្គភាព​នឹង​មិន​មាន​ទឹក​ចិត្ត​ធ្វើ​ការ​ទៀត​ទេ​ពី​ព្រោះ​ការ​ដឹក​នាំ​របស់​គាត់​មាន​លក្ខណៈ​ផ្តាច់​ការ​និង​គាប​សង្កត់​គ្រប់​បែប​យ៉ាង​»​។

លោក​បាន​ថ្លែង​ថា​៖«ទូរគមនាគមន៍​កម្ពុជា​ត្រូវ​ចូល​ក្នុង​ទីផ្សារ​ភាគ​ហ៊ុន​កម្ពុជា​តាំង​ពី​២០១២ ដំណាល​គ្នា​នឹង​រដ្ឋាករ​ទឹក​ស្វ័យ​ភ្នំពេញ តែ​មិន​អាច​តើ​មូលហេតុ​អ្វី​? បើ​មិន​មែន​ជា​អំពើ​ពុក​រលួយ​នោះ​»។

លោក មិញ បាន​កុសល្យ អគ្គ​នាយក​គណៈ​កម្មការ​មូលបត្រ​កម្ពុជា​បដិសេធ​មិន​ធ្វើ​អត្ថា​ធិប្បាយ​លើ​បញ្ហា​នេះ​ទេ៖ «វា​ជា​បញ្ហា​ជម្លោះ​ផ្ទៃ​ក្នុង​របស់​ក្រុមហ៊ុន​ខ្ញុំ​មិន​អាច​និយាយ​អ្វី​ទាំង​អស់»។

លោក ឡេង ហ៊ួរ អ្នក​តវ៉ា​ម្នាក់​ទៀត​បាន​ថ្លែង​បញ្ជាក់​ថា​អំពើ​ពុក​រលួយ​និង​ភាព​មិន​ប្រក្រតី​ការ​គាប​សង្កត់​មក​លើ​បុគ្គលិក​ពី​សំណាក់​លោក​អគ្គ​នាយក​វា​មិន​មែន​ទើប​កើត​ឡើង​នា​ពេល​នេះ​ទេ​វា​បាន​កើត​ឡើង​អស់​រយៈ​ពេល​ជាង​៥ឆ្នាំ​មក​ហើយ​។

លោក​បញ្ជាក់​ថា៖«ការ​ដឹក​នាំ​របស់​លោក​អគ្គ​នាយក​ប្រៃសណីយ៍ និង​ទូរគមនាគមន៍ មិន​មាន​ការ​រីក​ចម្រើន​នោះ​ទេ​គ្មាន​ទំនាក់​ទំនង​ល្អ​ជាមួយ​បុគ្គលិក​ថ្នាក់​ក្រោម រើស​បក្ខ​ពួក​និង​អ្នក​ផ្សេង​មក​ធ្វើ​ការ​នៅ​ក្នុង​អង្គភាព ខណៈ​បុគ្គលិក​មាន​សមត្ថភាព​ដែល​មាន​ស្រាប់​មិន​ត្រូវ​បាន​យក​ចិត្ត​ទុក​ដាក់ និង​មិន​ឲ្យ​តម្លៃ​»។

ក្នុង​សេចក្តី​អំពាវនាវ​ជា​ចំហ​មួយ​របស់​និយោជិត​នៃ​សហគ្រាស​រដ្ឋ ទូរគមនាគមន៍​កម្ពុជា​បាន​លើក​ឡើង​ថា លោក ឡៅ សារឿន ធ្វើ​របាយការណ៍​ក្នុង​យុទ្ធសាស្ត្រ​ផ្ទាល់​ខ្លួន​សហការ​ជាមួយ​ប្រធាន​នាយកដ្ឋាន​គណនេយ្យ និង​ហិរញ្ញវត្ថុ​ក្រោម​បង្គាប់​របស់​ខ្លួន រាយ​ការណ៍​ដោយ​បន្លំ​ទៅ​ក្រសួង​សេដ្ឋកិច្ច​និង​ហិរញ្ញវត្ថុ​ម្តង​ថា​ទូរគមនាគមន៍​កម្ពុជា រកចំណូល​បាន​២៩​លាន​ដុល្លារ ក្នុង​ឆ្នាំ​២០១១ និង​ម្តង​ថា រក​ចំណូល​បាន​២៧​លាន​។ តែ​របាយ​ការណ៍​ទាំង​ពីរ​ត្រូវ​បាន​លាត​ត្រដាង​នៅ​ក្នុង​អង្គ​ប្រជុំ​សាមញ្ញ​និង​វិសាមញ្ញ​មួយ​កាល​ពី​ឆ្នាំ​២០១២ នៃ​ក្រុម​ប្រឹក្សា​ភិបាល​របស់​ទូរគមនាគមន៍​កម្ពុជា រហូត​ធ្វើ​ឲ្យ​តំណាង​ក្រសួង​សេដ្ឋកិច្ច​ចាប់​ថ្នាក់​បាន​ថា​មាន​ភាព​មិន​ប្រក្រតី​។

សេច​ក្តី​អំពាវ​នាវ​នោះ​បាន​បញ្ជាក់​ថា៖

«​តាម​រយៈ​តួ​លេខ​ក្នុង​របាយការណ៍​ស្តី​ពី​ចំណូល​ប្រចាំ​ឆ្នាំ​២០១១ បង្ហាញ​ថា​លោក ឡៅ សារឿន និង​ប្រធាន​នាយកដ្ឋាន​គណនេយ្យ​មាន​បំណង​ស៊ី​ដាច់​លុយ​២​លាន​ដុល្លារ​ដែល​ជា​ហេតុ​ធ្វើ​ឲ្យ​ប្រាក់​ចំណេញ​របស់​ទូរគមនាគមន៍​កម្ពុជា​ធ្លាក់​ចុះ​ហើយ​ឲ្យ​បុគ្គលិក​ទទួល​ប្រាក់​រង្វាន់​តែ​មួយ​ខែ​គត់​ខណៈ​អាណត្តិ​អគ្គ​នាយក​មុនៗ​ធ្លាប់​បាន​ទទួល​រហូត​ដល់​ទៅ​៣ខែ»។

លោក ឡៅ សារឿន ដែល​រង​ការ​ចោទ​ប្រកាន់​មិន​បង្ហាញ​ខ្លួន​និង​ចេញ​មុខ​ជួប​ចរចា​ជាមួយ​នឹង​អ្នក​តវ៉ា​នៅ​ខាង​ក្រៅ​ការិយាល័យ​របស់​លោក​ទេ​ហើយ​លោក​ក៏​បដិសេធ​មិន​ផ្តល់​ការ​ពន្យល់​ដល់​អ្នក​កាសែត ដែល​បាន​ចូល​សម្ភាស​នៅ​ការិយាល័យ​របស់​លោក​ផង​ដែរ ដោយ​ត្រូវ​ជំនួយការ​របស់​លោក​ប្រាប់​ថា លោក​ជាប់​រវល់។ ទោះ​យ៉ាង​ណា ភ្នំពេញ ប៉ុស្តិ៍​ព្យាយាម​ទាក់​ទង លោក ឡៅ សារឿន តាម​ទូរស័ព្ទ​បន្ថែម​កាល​ពី​ថ្ងៃ​ម្សិល​មិញ​តែ​ត្រូវ​បាន​បិទ​។

លោក កុយ ពុំ អនុ​រដ្ឋលេខា​ធិការ ក្រសួង​ប្រៃសណីយ៍ និង​ទូរគមនាគមន៍ និង​ជា​ប្រធាន​ក្រុម​ប្រឹក្សា​ភិបាល​ទូរគមនាគមន៍​កម្ពុជា​មាន​ប្រសាសន៍​នៅ​មុខ​ក្រុម​អ្នក​តវ៉ា​ថា លោក​នឹង​យក​សំណើ​របស់​អ្នក​តវ៉ា​ទៅ​ធ្វើ​ការ​ពិភាក្សា​ជាមួយ​រដ្ឋមន្ត្រី សូរ​ឃុន នៅ​ក្រសួង​។ លោក​បាន​បញ្ជាក់​ថា៖​«សូម​បង​ប្អូន​ផ្អាក​ការ​តវ៉ា ខ្ញុំ​នឹង​ស្វែង​រក​ដំណោះ​ស្រាយ​ជូន​បង​ប្អូន»​។

លោក កែវ រ៉េមី មន្ត្រី​នាំ​ពាក្យ​អង្គភាព​ប្រឆាំង​អំពើ​ពុករលួយ​មិន​អាច​ទាក់​ទង​បាន​ទេ​កាល​ពី​ថ្ងៃ​ម្សិល​មិញ​។

លោក សូរ ឃុន រដ្ឋមន្ត្រី ក្រសួង​ប្រៃសណីយ៍ និង​ទូរគមនាគមន៍​អះអាង​ថា ករណី​នេះ​កំពុង​ស្ថិត​ក្នុង​ការ​ពិចារណា​៖​«​យើង​កំពុង​ធ្វើ​កិច្ច​ការ​នេះ​ខ្ញុំ​មិន​អាច​ផ្តល់​លទ្ធផល​ឲ្យ​អ្នក​បាន​នៅ​ឡើយ​ទេ»៕

អត្ថបទគួរចាប់អារម្មណ៍