.jpg)
ទិដ្ឋភាពភ្ញៀវដែលបានចូលរួមនៅក្នុង «ទិវាធានារ៉ាប់រង» កាលពីថ្ងៃម្សិលមិញ។ ហ៊ឹន ពីសី
ភ្នំពេញៈ បុព្វលាភដុលក្នុងវិស័យធានារ៉ាប់រងនៅកម្ពុជា ត្រូវព្យាករថា នឹងកើនដល់ប្រមាណ ២៦០ លានដុល្លារនៅដំណាច់ឆ្នាំ ២០១៩ នេះដោយសារតែកំណើននៅក្នុងវិស័យនេះ។ នេះបើយោងតាមក្រសួងសេដ្ឋកិច្ច ដែលបានចេញផ្សាយក្នុងទិវាធានារ៉ាប់រងកាលពីថ្ងៃម្សិលមិញ។ សេចក្តីប្រកាសព័ត៌មានបានឲ្យដឹងថា ការរីកចម្រើនដ៏ឆាប់រហ័សនៃវិស័យធានារ៉ាប់រងបានធ្វើឲ្យបុព្វលាភធានារ៉ាប់រងរយៈពេល ៥ ឆ្នាំចុងក្រោយនេះ មានកំណើនជាមធ្យម ៣៥ ភាគរយ ក្នុង ១ ឆ្នាំ។
ក្រសួងសេដ្ឋកិច្ច និងហិរញ្ញវត្ថុរំពឹងថា នៅក្នុងឆ្នាំ ២០១៩ វិស័យនេះនឹងបន្តកំណើនខ្ពស់ជាបន្តទៀតក្នុងអត្រាប្រមាណ ៣២,៣៨ ភាគរយ ដល់ ២៦០ លានដុល្លារ ដោយកើនពី ១៩៦,៤ លានដុល្លារ កាលពីឆ្នាំ ២០១៨។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបានទៅចូលរួមក្នុង «ទិវាធានារ៉ាប់រង» ខួបលើកទី១៩ នៅសណ្ឋាគារ សុខា កាលពីថ្ងៃម្សិលមិញ បានឲ្យដឹងថា វិស័យធានារ៉ាប់រងនៅកម្ពុជា កំពុងរីកចម្រើន និងបោះជំហានទៅមុខប្រកបដោយភាពរឹងមាំ ខណៈវិស័យនេះកំពុងក្លាយជាសសរស្តម្ភមួយនៃវិស័យហិរញ្ញវត្ថុមិនមែនធនាគារ។
លោកបានថ្លែងថា៖ «ធានារ៉ាប់រង គឺជាផ្នែកមួយនៅក្នុងវិស័យហិរញ្ញវត្ថុ ដែលមានតួនាទីយ៉ាងសំខាន់ និងចាំបាច់នៅក្នុងការចូលរួមចំណែកកសាងសំណាញ់សុវត្ថិភាពសង្គម និងសេដ្ឋកិច្ចជាតិ»។
តាមលោក លោក អូន ព័ន្ធមុនីរ័ត្ន ជាក់ស្តែងបុព្វលាភធានារ៉ាប់រងអាចត្រូវបានប្រើប្រាស់ជាមូលនិធិសន្សំក្នុងប្រព័ន្ធធនាគារ ឬអាចជាមូលនិធិវិនិយោគលើទីផ្សារមូលធន និងការវិនិយោគផ្សេងៗទៀតផងដែរ។
លោកបន្តថា ដើម្បីឲ្យវិស័យធានារ៉ាប់រងនៅកម្ពុជាអាចទទួលបានភាពជោគជ័យ កិច្ចសហការរវាងនិយតករធានារ៉ាប់រង និងប្រតិបត្តិករធានារ៉ាប់រង គឺជារឿងចាំបាច់។
លោកថ្លែងថា៖ «នៅពេលខាងមុខរដ្ឋាភិបាលនឹងដាក់ឲ្យប្រើប្រាស់នូវការធានារ៉ាប់រងយានយន្តឯកជនជាកាតព្វកិច្ច ស្របតាមបទប្បញ្ញត្តិនៃច្បាប់ស្តីពីការធានារ៉ាប់រងផងដែរ»។
លោក អូន ព័ន្ធមុនីរ័ត្ន បានឲ្យដឹងថា អត្រាបុព្វលាភធានារ៉ាប់រងធៀបនឹង GDP បានកើនឡើងជិត ១ ភាគរយ នៅក្នុងឆ្នាំ ២០១៨ ឬប្រជាជនម្នាក់បានចំណាយប្រាក់ ១២,០៤ ដុល្លារ សម្រាប់សន្សំ និងទិញការធានារ៉ាប់រងហានិភ័យរបស់ខ្លួន។
លោក យក់ ចំរើនឫទ្ធិ អគ្គនាយកក្រុមហ៊ុនធានារ៉ាប់រង Forte Insurance បានឲ្យដឹងថា បន្ទាប់ពីមានវត្តមាននៅកម្ពុជាជាង ២០ ឆ្នាំមកនេះ វិស័យនេះនៅតែមានភាពក្មេងខ្ចីនៅឡើយ ដែលទាមទារឲ្យមានការផ្សព្វផ្សាយ និងពន្យល់ឲ្យសាធារណជនយល់ដឹងច្រើនបន្ថែមទៀត។
លោកថ្លែងថា៖ «កំណើនសេដ្ឋកិច្ច និងកំណើនប្រជាជនប្រាក់ចំណូលមធ្យម នឹងធ្វើឲ្យតម្រូវការប្រើប្រាស់សេវាធានារ៉ាប់រងកើនឡើង»។
លោកបន្តថា ៖«ទិវាធានារ៉ាប់រង» នេះ អាចជាការបញ្ជូនព័ត៌មានមួយទៅកាន់សាធារណជនឲ្យយល់ដឹង មានទំនុកចិត្តកាន់តែច្រើនលើវិស័យធានារ៉ាប់រង។
លោក Liqun Yu នាយកប្រតិបត្តិក្រុមហ៊ុនធានារ៉ាប់រងអាយុជីវិត Grand China Life Insurance PLC បានឲ្យដឹងថា ទីផ្សារវិស័យធានារ៉ាប់រងនៅកម្ពុជាពេលនេះមិនទាន់ធំទូលាយទេ ដោយសារការយល់ដឹងរបស់ប្រជាជនក្នុងស្រុកនៅមានកម្រិត ប៉ុន្តែលោកជឿថា វិស័យនេះកំពុងមើលឃើញពីកំណើន។
លោកថ្លែងថា៖ «វិស័យនេះនឹងរីកចម្រើនខ្លាំងក្នុងពេលឆាប់ៗ ពិសេសបើមានការផ្សព្វផ្សាយកាន់តែទូលំទូលាយពីអត្ថប្រយោន៍នៃការប្រើប្រាស់សេវាកម្មធានារ៉ាប់រង»។
បន្ទាប់ពីបើកដំណើរការបានជាង ១ ឆ្នាំ នៅកម្ពុជា បច្ចុប្បន្ន Grand China Life Insurance PLC មានអតិថិជនក្នុងស្រុក និងជនបរទេសប្រមាណជាង ១ ៥០០ នាក់។
លោកស្រី ងួន សុខា រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា បច្ចុប្បន្នមានក្រុមហ៊ុនធានារ៉ាប់រងទូទៅចំនួន ១៣ ក្រុមហ៊ុនធានារ៉ាប់រងអាយុជីវិតចំនួន ១១ ក្រុមហ៊ុនធានារ៉ាប់រងខ្នាតតូចចំនួន ៧ ក្រុមហ៊ុនធានារ៉ាប់រងបន្តចំនួន ១ និងក្រុមហ៊ុនអន្តរការីធានារ៉ាប់រងចំនួន ៣៨។
លោកស្រីបន្តថា កាលពីឆ្នាំ ២០១៨ ក្រុមហ៊ុនទាំងអស់មានទ្រព្យសកម្មចំនួន ៤២៧,៣ លានដុល្លារ និងមូលនិធិភាគហ៊ុនិក ២៤៣,៩ លានដុល្លារ។ ការទូទាត់សំណងជូនអតិថិជន មានចំនួន ២៥,៨ លានដុល្លារ៕
