ភ្នំពេញៈ ក្រុមហ៊ុនអឹមហ្វូន ដែលក្ស័យធនបានជំពាក់បំណុល១៥៩ លានដុល្លារ ខណៈទ្រព្យរបស់ក្រុមហ៊ុននេះតាមការប៉ាន់ប្រមាណមានតម្លៃតែ ១០៥ លានដុល្លារប៉ុណ្ណោះ។ នេះបើតាមបុគ្គលិកដែលបានចូលរួមក្នុងកិច្ចប្រជុំរបស់ ម្ចាស់បំណុលកាលពីល្ងាចថ្ងៃចន្ទ។
លោក ប្រាង វុទ្ធី តំណាងបុគ្គលិកបាននិយាយថា លោក អ៊ុក រី ដែលតុលាការបានតែងតាំងអ្នកគ្រប់គ្រងលើទ្រព្យសម្បត្តិរបស់អឹម ហ្វូន បានផ្តល់យោបល់ដល់តំណាងកម្មករទាំងនោះពីការវាយតម្លៃនៅក្នុង កិច្ចប្រជុំ និងបានស្នើពួកគេជួយបញ្ចុះបញ្ចូលម្ចាស់បំណុលក្នុងបណ្តឹងដែលអាច អនុញ្ញាតឲ្យអឹមហ្វូនលក់ទ្រព្យរបស់ខ្លួនបាន។
លោកវុទ្ធីបន្តថា៖ «ក្នុងអំឡុងកិច្ចប្រជុំកាលពីម្សិលមិញយើងបានជួបជាមួយតំណាង ម្ចាស់បំណុលទាំងនោះមកពីក្រុមហ៊ុន Huawei ក្រុមហ៊ុន NEC ក្រុមហ៊ុនបណ្ដាញខ្សែកាបអុបទិកកម្ពុជា ក្រុមហ៊ុន Vatana និងក្រុមហ៊ុន Eltek។ ម្ចាស់បំណុលភាគច្រើនបានយល់ព្រមជាមួយយើងក្នុងការដកពាក្យបណ្ដឹង ដើម្បីឲ្យលោក អ៊ុក រី លក់ទ្រព្យនោះយកប្រាក់សងដល់ក្រុមហ៊ុនទាំងនោះ។ ប៉ុន្តែមិនមែនម្ចាស់បំណុលទាំងអស់សុទ្ធតែយល់ព្រមទេ ដូច្នេះយើងនឹងព្យាយាមជួប និងចរចាជាមួយពួកគេ»។
លោក គួយ ធន់ណា មេធាវីក្រុមហ៊ុន Eltek ជាក្រុមហ៊ុនទីមួយដែលដាក់ពាក្យបណ្ដឹង បាននិយាយថា លោកចង់ស្វែងរកដំណោះស្រាយមួយយ៉ាងឆាប់រហ័សដែលធ្វើការងារឲ្យ បុគ្គលិកទាំងនោះផងដែរ ប៉ុន្តែលោកអះអាងថា ក្រុមហ៊ុន Eltek នឹងមិនដកពាក្យបណ្ដឹងនោះទេលុះត្រាតែអឹមហ្វូនឆ្លើយតបតាមលក្ខខណ្ឌរបស់ពួកគេ។
លោកបន្តថា៖ «ពួកគេត្រូវតែយល់ព្រមថា យើងមានអាទិភាពមុនគេដើម្បីទទួលប្រាក់។ ពួកគេត្រូវតែប្រាប់យើងពីតម្លៃសរុបនៃទ្រព្យនោះ តម្លៃលក់ និងការបែងចែក។ ប្រសិនបើពួកគេយល់ព្រម យើងនឹងដកពាក្យបណ្ដឹងនោះ»។ លោកបន្ថែមថា អឹមហ្វូន ជំពាក់ក្រុមហ៊ុន Eltek ច្រើនជាង ២លានដុល្លារ ប៉ុន្តែបូកជាមួយនឹងការប្រាក់ វាមានតម្លៃជិត៥លានដុល្លារ។
លោក អ៊ុក រី បានប្រាប់ភ្នំពេញ ប៉ុស្ដិ៍ថា លោកកំពុងធ្វើការយ៉ាងកៀកជាមួយភាគីពាក់ព័ន្ធទាំងអស់ ប៉ុន្តែលោកមិនបានផ្ដល់ព័ត៌មានលម្អិតទេ។ លោកបន្តថា៖ «ពេលនេះខ្ញុំមិនអាចនិយាយអ្វីបានទាំងអស់ ព្រោះខ្ញុំកំពុងឈឺក្បាលនឹងរឿងនេះយើងមិនគ្រាន់តែដោះស្រាយ ជាមួយកម្មករទាំងអស់នោះទេ ប៉ុន្តែដោះស្រាយជាមួយបណ្ដាភាគីពាក់ព័ន្ធដទៃទៀតផងដែរ។ យើងពិតជាចង់ធ្វើឲ្យបានរួសរាន់នូវបញ្ហានេះ ប៉ុន្តែវាកំពុងតែដំណើរការហើយពេលនេះ។ យើងនឹងសងប្រាក់ទាំងអស់ដល់កម្មករទាំងនោះបើយើងមានប្រាក់»។
លោក Dave Welsh នាយកប្រចាំប្រទេសនៅមជ្ឈមណ្ឌលសាមគ្គីភាពពលកម្មអន្តរជាតិអាមេរិ កាំង បានថ្លែងថា វាមិនមែនជាការទទួលខុសត្រូវរបស់កម្មករទាំងនោះ ដើម្បីចរចាជាមួយម្ចាស់បំណុលនោះទេ។ លោកសង្ឃឹមថា សិទ្ធិរបស់កម្មករទាំងនោះនឹងត្រូវបានការពារប្រសិនបើពួកគេធ្វើ តាមចំណាត់ការស្របច្បាប់។
លោកបន្តថា៖ «ច្បាប់នេះគឺមិនមែនឲ្យកម្មករធ្វើការគាបសង្កត់លើម្ចាស់បំណុល នោះទេ វាគឺសម្រាប់រដ្ឋាភិបាលដើម្បីអនុវត្តលើច្បាប់ការងារក្នុងស្រុក »។
លោក វុទ្ធី បាននិយាយថា ប្រសិនបើការទាមទាររបស់កម្មករទាំងនោះមិនត្រូវបានឆ្លើយតបនៅ ក្នុងកិច្ចប្រជុំតាមការគ្រោងទុកនៅថ្ងៃទី ៨ ខែមេសា ទេ ការតវ៉ានឹងកាន់តែធំឡើងៗ។
លោកថ្លែងថា៖ «ខ្ញុំគិតថា យើងទទួលបានលទ្ធផលវិជ្ជមានពីកិច្ចប្រជុំកាលពីម្សិលមិញ ដូច្នេះកិច្ចប្រជុំដ៏ធំរបស់យើងនឹងទទួលបានផ្លែផ្កា។ បើពួកគេមិនយល់ព្រមជាមួយយើង យើងនឹងធ្វើកូដកម្មដ៏ធំនៅខាងមុខទូតថៃ ទូត សិង្ហបុរី និងមុខផ្ទះសម្ដេចនាយករដ្ឋមន្រ្តី ហ៊ុន សែន។ ប៉ុន្តែ ពេលនេះយើងរង់ចាំមើលលទ្ធផលសិន»។
ក្រុមហ៊ុនទូរគមនាគមន៍Thaicom គ្រប់គ្រងហ៊ុនភាគច្រើននៅក្នុងការកាន់កាប់ក្រុមហ៊ុន Shenington ដែលគ្រប់គ្រងក្រុមហ៊ុន អឹម ហ្វូន បានដាក់ពាក្យសុំក្ស័យធនកាលពីខែមករាឆ្នាំនេះ៕ PB
