ភ្នំពេញៈ ក្រុមហ៊ុនផ្សារមូលបត្រកម្ពុជា (CSX) បានបង្ហាញអំពីការទទួលបាននូវប្រតិបត្តិការដ៏ល្អប្រសើរគិតត្រឹមដំណាច់ចុងត្រីមាសទី ២ ឆ្នាំនេះក្នុងនោះសន្ទស្សន៍របស់ខ្លួនបានកើនឡើង ១៨ ភាគរយ ធៀបនឹងត្រីមាសទី ១ ទោះបីការរីករាលដាលជំងឺកូវីដ ១៩ កំពុងប៉ះពាល់ដល់ទីផ្សារមូលធនជាច្រើនក្នុងតំបន់ និងពិភពលោក។
យោងតាមព្រឹត្តិបត្រព័ត៌មានក្រុមវិនិយោគិន និងការវិនិយោគបានពីគណៈកម្មការមូលបត្រកម្ពុជា (SECC) ដែលចេញផ្សាយកាលពីដើមសប្ដាហ៍មុន មូលធននូបនីយកម្មទីផ្សារមានចំនួន ២ ៥០៧ លានដុល្លារ កាលពីចុងត្រីមាសទី ២ ខណៈទំហំជួញដូរមាន ៣ ៧០៦ ៩៤៥ ភាគហ៊ុន ដែលកើនឡើង ៥៦១ ភាគរយ និងតម្លៃជួញដូរមានចំនួនប្រហែល ១៦,២០ លានដុល្លារ ដែលបានកើនឡើងខ្ពស់បំផុតរហូតដល់ ១ ៦០០ ភាគរយ។
ក្នុងចំណោមទំហំជួញដូរនេះភាគហ៊ុន ABC របស់ធនាគារអេស៊ីលីដាឈរលំដាប់លេខ ១ មានចំនួន ៨០,៨៨ ភាគរយ បន្ទាប់មករដ្ឋាករទឹកស្វយ័តក្រុងភ្នំពេញ (PWSA) មាន ៦,៦ ភាគរយ តំបន់សេដ្ឋកិច្ចពិសេសភ្នំពេញ (PPSP) មាន ៥,៤៧ ភាគរយ កំពង់ផែស្វយ័តក្រុងព្រះសីហនុ (PAS) មាន ២,៨៦ ភាគរយ កំពង់ផែស្វយ័តភ្នំពេញ (PPAP) មាន ២,២៥ ភាគរយ និងក្រុមហ៊ុន GTI មាន ១,៩៤ ភាគរយ។
លោក Jong Weon Ha អនុប្រធាន CSX បានប្រាប់ភ្នំពេញប៉ុស្ដិ៍កាលពីថ្ងៃអាទិត្យថា សន្ទស្សន៍ CSX បានធ្លាក់ចុះមកនៅត្រឹមកម្រិតទាបបំផុតនៅចុងត្រីមាសដំបូង ប៉ុន្តែងើបឡើងវិញនៅត្រីមាសទី២។
លោកបានថ្លែងថា៖ «ទោះបីជាវីរុសនេះបន្តវត្តមានក៏ដោយ ក៏ទីផ្សាររបស់យើងបានដំណើរការល្អប្រសើរកាលពីត្រីមាសទី ២។ តម្លៃសន្ទស្សន៍បានចាប់ផ្ដើមកើនឡើងកាលពីដើមត្រីមាសទី ២ ដោយសារតែទីផ្សារនេះបានស្ទុះងើបឡើងវិញ»។
លោកសម្គាល់ថា ការស្ទុះងើបខ្លាំងនេះដោយសារវត្តមានរបស់ភាគហ៊ុន ABC នៅចុងខែឧសភា។
ទោះយ៉ាងណាលោកបានឲ្យដឹងថា តម្លៃសន្ទស្សន៍នេះនឹងបន្តធ្លាក់ចុះតិចតួចនៅត្រីមាសខាងមុខ ដោយសារតែការធ្លាក់ចុះរបស់ ABC ដែលកំពុងបង្ហាញនិន្នាការធ្លាក់ចុះបន្តិចនៅត្រីមាសទី ៣ ដោយសារតែតម្លៃភាគហ៊ុន ABC ដែលប្រភពមូលធននូបនីយកម្មសំខាន់បានធ្លាក់ចុះ និងមានស្ថិរភាពក្នុងរយៈពេល ៤ សប្ដាហ៍ចុងក្រោយនេះ បន្ទាប់ពីការស្ទុះងើបឡើងវិញរយៈពេលខ្លី៕ LA