ភ្នំពេញៈ ស្របពេលនៃការរីករាលដាលជំងឺកូវីដ ១៩ ពិសេសព្រឹត្តិការណ៍សហគមន៍ ២០ កុម្ភៈ បច្ចុប្បន្នមានប្រជាជនខ្មែរច្រើនជាង ៥៩ ភាគរយបានធ្វើប្រតិបត្តិការទូទាត់របស់ខ្លួនតាមរយៈប្រព័ន្ធអនឡាញ ដែលឆ្លុះបញ្ចាំងអំពីការលើកកម្ពស់សេវាទូទាត់ឌីជីថលស្របទៅនឹងកិច្ចការងារលើកកម្ពស់បរិយាប័ន្នហិរញ្ញវត្ថុនៅកម្ពុជា។ នេះបើតាមរបាយការណ៍ចុងក្រោយធនាគារជាតិនៃកម្ពុជា (NBC)។
ធនាគារជាតិនៃកម្ពុជាបានឱ្យដឹងថា ការប្រើប្រាស់សេវាធនាគារឌីជីថលអាចជួយកាត់បន្ថយការចម្លងកូវីដ ១៩ តាមរយៈការកាត់បន្ថយនូវតម្រូវការនៃការប្រើប្រាស់ក្រដាសប្រាក់ដោយផ្ទាល់រវាងបុគ្គលម្នាក់ទៅបុគ្គលម្នាក់ទៀត។
ទន្ទឹមនឹងនេះ NBC ក៏បានជំរុញឱ្យគ្រឹះស្ថានធនាគារ និងហិរញ្ញវត្ថុ និងស្ថាប័ននានានៅក្នុងប្រទេសកម្ពុជាផ្តល់ការលើកទឹកចិត្តដល់អតិថិជន និងក្រុមហ៊ុនសហគ្រាសដែលជ្រើសរើសយកប្រតិបត្តិការទូទាត់ជាអេឡិចត្រូនិកជំនួសឱ្យប្រតិបត្តិការទូទាត់ដែលប្រើប្រាស់ក្រដាសប្រាក់។
អគ្គនាយិកាបច្ចេកទេសធនាគារជាតិនៃកម្ពុជា លោកស្រី ជាសិរី បានលើកឡើងថា ក្នុងនាមជាអាជ្ញាធរត្រួតពិនិត្យវិស័យធនាគារ និងហិរញ្ញវត្ថុនៅកម្ពុជាកិច្ចសហការជាមួយគ្រឹះស្ថានធនាគារ និងហិរញ្ញវត្ថុ គឺជាផ្នែកមួយដ៏មានសារៈសំខាន់នៃការខិតខំប្រឹងប្រែងរួមគ្នារបស់ជាតិដើម្បីប្រយុទ្ធប្រឆាំងនឹងរោគរាតត្បាតជំងឺកូវីដ ១៩។
លោកស្រីថ្លែងថា៖ «ទាំងនេះជាមូលហេតុដែលយើងកំពុងលើកទឹកចិត្តប្រជាជនខ្មែរទាំងអស់ឱ្យប្រើកាបូបអេឡិចត្រូនិក (E-Wallet) និងកម្មវិធីទូទាត់ដូចជា កម្មវិធីបាគងជំនួសឱ្យការទូទាត់ជាក្រដាសប្រាក់ ដើម្បីចូលរួមកាត់បន្ថយការប៉ះពាល់ និងហានិភ័យរាតត្បាត»។
ប្រធាននាយកប្រតិបត្តិធនាគារអេស៊ីលីដា លោក អ៊ិន ចាន់នី បានប្រាប់ ភ្នំពេញ ប៉ុស្ដិ៍ថា គ្រឹះស្ថានរបស់លោកបាននាំមុខការផ្លាស់ប្តូរទៅជាឌីជីថលជាមួយនឹងការចាប់ផ្ដើមដំបូង Acleda Unity ក្នុងខែកក្កដា ឆ្នាំ ២០១០ ហើយនៅតែនាំមុខក្នុងការបន្តអភិវឌ្ឍកម្មវិធីអេស៊ីលីដាទាន់ចិត្ត ដែលបានដាក់ឱ្យដំណើរការកាលពីឆ្នាំ ២០១៧។
លោក ចាន់នី បានអះអាងថា៖ «ខ្ញុំគិតថា ពាក្យឌីជីថល មានន័យថា នឹងគាំទ្របរិយាប័ន្នហិរញ្ញវត្ថុកាន់តែខ្លាំងឡើង ហើយគ្រប់គ្នាសុទ្ធតែទទួលបានសេវាហិរញ្ញវត្ថុ។ បច្ចុប្បន្នអេស៊ីលីដាម៉ូបាលដែលជាកម្មវិធីឌីជីថលមានអតិថិជនជាង ១ លាននាក់កំពុងប្រើប្រាស់យ៉ាងសកម្ម»។
អង្គការសុខភាពពិភពលោកជំរុញឱ្យមានការប្រុងប្រយ័ត្ននៅពេលកាន់ក្រដាសប្រាក់ និងបានណែនាំដល់ប្រជាពលរដ្ឋគ្រប់រូបត្រូវតែលាងដៃឱ្យបានស្អាត បន្ទាប់ពីកាន់ក្រដាសប្រាក់ជាពិសេសនៅពេលប៉ះពាល់ ឬញ៉ាំអាហារ។
លោកស្រី ជា សិរី បន្ថែមថា ទោះបី NBC ពិនិត្យឃើញថា ប្រជាពលរដ្ឋភាគច្រើននិយមធ្វើប្រតិបត្តិការទូទាត់ដោយប្រើប្រាស់ក្រដាសប្រាក់ ក៏ NBC នៅតែជំរុញឱ្យពាណិជ្ជករ និងអតិថិជនងាកទៅប្រើប្រាស់ការទូទាត់ជាអេឡិចត្រូនិក ដោយសារតែការអនុវត្តនេះនឹងអាចពង្រឹងចំណេះដឹងការប្រើប្រាស់ការទូទាត់ឌីជីថល និងទាក់ទាញប្រជាពលរដ្ឋឱ្យប្រើប្រាស់ការទូទាត់បានកាន់តែទូលាយតាមរយៈកម្មវិធីទូទាត់ទាំងនោះ។
កាលពីឆ្នាំ ២០២០ ធនាគារជាតិនៃកម្ពុជាបានដាក់ដំណើរការប្រព័ន្ធទូទាត់សងប្រាក់រួមមួយដែលអនុញ្ញាតឱ្យអតិថិជនធ្វើប្រតិបត្តិការបានច្រើនមុខងារដូចជា កាបូបអេឡិចត្រូនិក (E-Wallet) ការទូទាត់ចល័ត និងកម្មវិធីធនាគារអនឡាញដែលមុខងារទាំងអស់នេះស្ថិតក្នុងកម្មវិធីតែមួយ។
បាគង (Bakong) ដែលជាប្រព័ន្ធទូទាត់របស់ធនាគារជាតិនៃកម្ពុជាត្រូវបានភ្ជាប់ជាមួយគ្រឹះស្ថានធនាគារ និងហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់នៅកម្ពុជាជាច្រើន។ បាគងអនុញ្ញាតឱ្យអ្នកប្រើប្រាស់មានលទ្ធភាពក្នុងការធ្វើប្រតិបត្តិការទូទាត់ជាឌីជីថលបានទូលំទូលាយ និងមានប្រសិទ្ធភាព។
លោកស្រី ជា សិរី បានលើកឡើងថា៖ «កម្មវិធីទូទាត់ឌីជីថលជាឧបករណ៍ដែលមានប្រសិទ្ធភាពក្នុងការធានា និងផ្តល់លទ្ធភាពឱ្យគ្រប់ផ្នែកទាំងអស់នៅក្នុងសង្គមទទួលបានការចូលប្រើប្រាស់សេវាធនាគារ។ បច្ចុប្បន្ននេះដើម្បីសុវត្ថិភាពរបស់ប្រជាជនខ្មែរដែលកំពុងប្រឈមមុខនឹងការរាតត្បាតនៃជំងឺកូវីដ ១៩ បានជំរុញឱ្យធនាគារជាតិនៃកម្ពុជា និងគ្រប់គ្រឹះស្ថានធនាគារ និងហិរញ្ញវត្ថុ យកចិត្តទុកដាក់លើការឈានទៅរកសង្គមដែលមិនប្រើប្រាស់ក្រដាសប្រាក់»៕ LA