ភ្នំពេញៈ ក្រុមហ៊ុន Siam Cement Group (SCG) របស់ប្រទេស ថៃ កាលពីថ្ងៃចន្ទ បានរាយការណ៍ពីកំណើនតិចតួចពីការលក់របស់ខ្លួននៅប្រទេសកម្ពុជាសម្រាប់ត្រីមាសទី ១ ឆ្នាំនេះ ខណៈការរីករាលដាលកូវីដ១៩ បានធ្វើឲ្យប៉ះពាល់ទៅដល់វិស័យសំណង់។
របាយការណ៍ហិរញ្ញវត្ថុត្រីមាសទី ១ របស់ក្រុមហ៊ុនបានឲ្យដឹងថា ក្រុមហ៊ុន SCG ប្រចាំនៅកម្ពុជាមានទ្រព្យសរុប ១ ៥១៨ ពាន់លានរៀល (៣៧៣ លានដុល្លារ) កើនឡើង ៥ ភាគរយធៀបនឹងរយៈពេលដូចគ្នាកាលពីឆ្នាំ ២០១៩។ ក្រុមហ៊ុននេះបានរាយការណ៍ថា ប្រាក់ចំណូលបានពីការលក់ក្នុងត្រីមាសទី ១ ឆ្នាំ ២០២០ មានចំនួន ២៧២ ពាន់លានរៀល (៦៧ លានដុល្លារ) ដែលរួមបញ្ចូលពីការលក់ស៊ីម៉ងត៍ និងអាជីវកម្មលក់គ្រឿងសំណង់ដែលនេះតំណាងឲ្យការកើនឡើង ៧ ភាគរយធៀបនឹងរយៈពេលដូចគ្នាកាលពីឆ្នាំមុន។
ក្រុមហ៊ុនបានឲ្យដឹងថា៖ «ជាមួយនឹងគោលដៅធានាប្រតិបត្តិការ និងការផលិតរបស់ក្រុមហ៊ុនក្នុងអំឡុងពេលនៃការឆ្លងរាតត្បាតជំងឺកូវីដ ១៩ ក្រុមហ៊ុនបានដាក់ឲ្យអនុវត្តផែនការគ្រប់គ្រងនិរន្តរភាពអាជីវកម្មគ្រប់ជ្រុងជ្រោយ។ ជាងនេះទៀតដោយចាត់ទុកការការពារសុខភាព និងសុខុមាលភាពរបស់អ្នកពាក់ព័ន្ធជាអាទិភាពក្នុងអំឡុងពេលការឆ្លងរាលដាលជំងឺកូវីដ ១៩ ក្រុមហ៊ុនបានអនុវត្តការរក្សាគម្លាតសុវត្ថិភាព និងប្រើប្រាស់ហេដ្ឋារចនាសម្ព័ន្ធបច្ចេកវិទ្យាឌីជីថល ដើម្បីជួយដល់បុគ្គលិកដែលពួកគេធ្វើការពីផ្ទះ»។
លោក Roongrote Rangsiyopash ប្រធាន និងជាអគ្គនាយកប្រតិបត្តិក្រុមហ៊ុនអេសស៊ីជីបានឲ្យដឹងថា៖ «ក្នុងបរិយាកាសដ៏រំជើបរំជួលនេះសេដ្ឋកិច្ចពិភពលោកកំពុងរងនូវផលប៉ះពាល់ពីការឆ្លងរាលដាលនៃវីរុសកូវីដ ១៩។
ក្រុមហ៊ុនអេសស៊ីជី ក៏ស្ថិតនៅក្នុងចំណោមក្រុមហ៊ុនទាំងឡាយដែលបានផ្ដោតកិច្ចខិតខំប្រឹងប្រែងរបស់ខ្លួនលើការរក្សាលំនឹងលទ្ធផលប្រតិបត្តិការនៅក្នុងត្រីមាសទី ១ ឆ្នាំ ២០២០ ឲ្យសម្រេចបានប្រហាក់ប្រហែលនឹងត្រីមាសមុនដែរ»។
លោកថ្លែងថា៖ «ក្រុមហ៊ុនមានការប្ដេជ្ញាចិត្តរឹងមាំក្នុងការចាត់វិធានការសកម្ម និងបន្ទាន់ ដើម្បីរក្សានិរន្តរភាពអាជីវកម្មដោយដាក់ចេញនូវផែនការគ្រប់គ្រងនិរន្តរភាពអាជីវកម្មដ៏រឹងមាំរួមជាមួយនឹងផែនការឆ្លើយតបនឹងការរំខាន ដោយមានការត្រៀមជាមុន គ្រប់ជ្រុងជ្រោយ និងការគោរពខ្ជាប់ខ្ជួនទៅតាមវិធានការសុខភាព និងសុវត្ថិភាពរបស់រដ្ឋាភិបាល»។
ប្រទេស កម្ពុជា បាននាំចូលសម្ភារសំណង់មានតម្លៃជាង ៣១៧ លានដុល្លារនៅត្រីមាសទី ១ ឆ្នាំ ២០២០ ដើម្បីឆ្លើយតបនឹងការអភិវឌ្ឍរបស់វិស័យនេះមុនពេលផលប៉ះពាល់ដោយសារតែកូវីដ ១៩។ នេះបើយោងតាមទិន្នន័យបានពីក្រសួងពាណិជ្ជកម្ម។
ទិន្នន័យដែលភ្នំពេញប៉ុស្ដិ៍ទទួលបានពីក្រសួងពាណិជ្ជកម្មបង្ហាញថា ចាប់ពីខែមករាដល់ខែមីនាឆ្នាំ ២០២០ កម្ពុជានាំចូលសម្ភារសំណង់មានតម្លៃ ៣១៧ លានដុល្លារ ស្មើ ៨៧៩ ៣៩៤ តោនក្នុងនោះដែកថែបមានប្រហែល ១០០ ៤៤០ តោនមានតម្លៃ ៦៦, ៨២ លានដុល្លារ និងស៊ីម៉ងត៍មានតម្លៃ ២៤ ៥៧៣ លានដុល្លារ និងមាន ៣៨៣ ៦០៣ តោន៕ LA